រលាកច្រមុះរុំារ៉ៃយូរៗដោយមិនមានការព្យាបាលត្រឹមត្រូវអាចធ្វើឱ្យច្រមុះអ្នកដុំសាច់​ ងាយអាឡែស៊ីជាមួយអាហារ ឆា​ប់ឆ្លងមេរោគចូលច្រមុះ​ ឆាប់ផ្ដាសាយ ហៀរសំបោរមិនងាយបាត់ បាត់បង់ក្លិនអាហារ អាចមានការឈឺចាប់​និងពិបាកដកដង្ហើមខ្លាំង។

ដោយក្រឡែកឃើញពីបញ្ហារលាកច្រមុះនេះច្រើន​ក្រុមការងារចាបបៃតងសូមលើកយកប្រភេទអាហារដែលជាមុខសញ្ញាធ្វើឱ្យច្រមុះងាយរលាកក៏ដូចជាអ្នកដែលមានបញ្ហាច្រមុះគួរតែចៀសវាងដាច់ខាតបើមិនចង់ឱ្យច្រមុះកាន់តែយ៉ាប់ជាងមុន។

ដោយយោងតាមរយៈគេហទំព័រ​ healthlineបានបញ្ជាក់ឱ្យដឹងថាប្រភេទអាហារដែលប៉ះពាល់ដល់សុខភាពច្រមុះមានដូចខាងក្រោម៖

១.អាហារសម្បូរជាតិស្ករ៖ដូចជាពពួកស្ករចម្រាញ់ដែលគេប្រើដាក់ក្នុងភេសជ្ជៈដូចជាទឹកសូដា គ្រឿងកំប៉ុង​ ស្ករគ្រាប់ជាដើមដែលសម្បូរដោយសារធាតុស្ករចម្រាញ់ខ្ពស់គឺអាចប៉ះពាល់ខ្លាំងដល់ច្រមុះអាចបណ្ដាលឱ្យការរលាករបស់ច្រមុះកាន់តែធ្ងន់ធ្ងរជាងមុនបន្ថែមទៀតនិងអ្នកដែលមិនទាន់មានបញ្ហាច្រមុះគួរតែចៀសវាងឬកាន់បន្ថយជាមុនដើម្បីការពារកើតជំងឺរលាកច្រមុះឬដុះសាច់ច្រមុះឡើងមក។

២.ទឹកដោះគោ៖យើងដឹងហើយថាទឹកដោះគោដែលមានខ្លាញ់ទាបគឺល្អក្នុងការញុំាផ្ដល់ផលប្រយោជន៍ដល់សុខភាពខ្លាំង។ក៏ប៉ុន្ដែប្រសិនណាអ្នកកំពុងតែមានបញ្ហារលាកច្រមុះរុំារ៉ៃ ដុះសាច់ កំពុងតែហៀរសំបោរខ្លាំង​គួរតែចៀសវាងការទទួលទានទឹកដោះគោ​ពីព្រោះថា​ទឹកដោះគោអាចនឹងបង្កើតជាស្លេស្មមកច្រើនឡើងៗដែលធ្វើឱ្យច្រមុះរបស់អ្នកកាន់តែយ៉ាប់ជាងមុន​ បញ្ហាហៀរសំបោរក៏មិនងាយបាត់។

៣.អាហារសម្បូរសារធាតុអ៊ីស្តាមីន៖មានដូចជាប្រភេទសាច់កែច្នៃ​ សាច់​ក្រក ត្រីងៀត គ្រឿងកំប៉ុង គ្រឿងស្រវឹង ទឹកដោះគោជូរ ផ្លែឈើស្ងួត ឈីស ទឹកត្រី ផ្លែប៉េងប៉ោះ…ជាដើមសុទ្ធសឹងជាប្រភេទអាហារដែលសម្បូរដោយសារធាតុអ៊ីស្តាមីននេះ ។ប្រសិនបើអ្នកកំពុងតែតឹងច្រមុះ ហៀរសំបោរ ពិបាកដង្ហើមខ្លាំង ច្រមុះរលាកគួរតែកាត់បន្ថយអាហារទាំងអស់នឹងព្រោះអាចបណ្ដាលឱ្យសភាពជំងឺរបស់អ្នកកាន់តែវិវត្តិខ្លាំងជាងមុន។

ជាចុងក្រោយប្រសិនណាអ្នកកំពុងតែមានបញ្ហាច្រមុះអ្នកគួរតែចៀសវាងប្រភេទអាហារ៣មុខនេះជាមុនសិនដើម្បីជួយឱ្យច្រមុះរបស់អ្នកបានប្រសើរជាងមុន។ហើយអ្នកដែលមិនទាន់បានបញ្ហាច្រមុះគួរតែចេះការពារខ្លួនជាមុនសិនមុននឹងញុំាអាហារ៕

អត្ថបទដោយ៖ប៉ែត ធីតា