បច្ចុប្បន្ននេះ ឪពុកម្ដាយគ្រប់គ្នាដឹងច្បាស់ហើយថា អាហារកែច្នៃ និងភេសជ្ជៈផ្អែមជាច្រើនដែលមិនស្គាល់ប្រភព ដែលដាក់លក់តាមតូបមួយចំនួនមិនសូវមានអនាម័យ និងមិនមានជីវជាតិប៉ុន្មាននោះទេ។ អ៊ីចឹងប្រសិនបើកូនៗរបស់អ្នកញុំាច្រើនអាចបង្កឱ្យកូនរបស់អ្នកឈឺ ឬប៉ះពាល់ដល់សុខភាពជាខ្លាំង។ ដូច្នេះដើម្បីធ្វើការកាត់បន្ថយការញុំាអាហារមិនស្គាល់ប្រភពច្បាស់លាស់ សូមអ្នកអានចំណុចខាងក្រោមនេះ។

បើយោងតាមការចុះផ្សាយរបស់ RaisingChildren បានបង្ហាញប្រាប់ថា អាហារដែលល្អចំពោះសុខភាពសម្រាប់កុមារក្នុងវ័យសិក្សាមាន ៥ក្រុមរួមមាន បន្លែ ផ្លែឈើ គ្រាប់ធញ្ញជាតិ ទឹកដោះគោ ទឹកបរិសុទ្ធ និងអាហារសម្បូរប្រូតេអ៊ីន។

១.ផ្លែឈើ និងបន្លែបៃតង៖ ការ៉ុត​ ផ្កាខាត់ណា ត្រសក់ ដំឡូង ម្ទេសផ្លោក ផ្សិត ប៉ោម ប័រ បានផ្តល់ឱ្យកូននូវវីតាមីន សារធាតុប្រឆាំងនឹងអុកស៊ីតកម្ម ជាតិសរសៃ និងទឹក។ ដែលសារធាតុទាំងអស់នេះបានជួយការពារកូនរបស់អ្នកពីជំងឺបេះដូង ជំងឺដាច់សរសៃឈាមខួរក្បាល និងជំងឺមហារីក។

២.អាហារសម្រន់ និងគ្រាប់ធញ្ញជាតិ៖ នំបុ័ង នំបុ័ងស្រូវសាលី អង្ករសម្រូប ពោត និងសណ្ដែកសៀង សុទ្ធតែជាអាហារផ្ដល់នូវភាពលូតលាស់ទាំងរាងកាយ និងខួរក្បាលរបស់កុមារ។

៣.ទឹកដោះគោ៖ ទឹកដោះគោគឺជាប្រភពដ៏សំខាន់ដែលសម្បូរទៅដោយប្រតេអ៊ីន និងកាល់ស្យូម ដែលល្អសម្រាប់ការលូតលាស់ និងការពារឆ្អឹងរបស់កុមារ។

៤.ប្រូតេអ៊ីន៖ អាហារដែលសម្បូរប្រូតេអ៊ីនរួមមាន ត្រី មាន់ ស៊ុត សណ្ដែក និងតៅហ៊ូ ដែលសម្បូរទៅដោយ ជាតិដែក សង្ក័សី វីតាមីនបេ១២ និងអាស៊ីត​ខ្លាញ់អូមេហ្កា៣ បានផ្ដល់សារៈប្រយោជន៍ដល់កូននូវការលូតលាស់ផ្នែករាងកាយ។

៥.ទឹកបរិសុទ្ធ៖ ទឹកជាភេសជ្ជៈដែលល្អបំផុតសម្រាប់កុមារ ហើយអ្នកត្រូវចៀសវាងកុំឱ្យកូនរបស់អ្នកញុំាភេសជ្ជៈផ្អែម ឬភេសជ្ជៈពណ៌ណាមួយដែលមិនស្គាល់ប្រភពច្បាស់លាស់។ មួយវិញទៀត អ្នកអាចផ្ដល់ជាទឹកផ្លែឈើស្រស់​សម្រាប់កូនរបស់អ្នកកាន់តែល្អ។

ដើម្បីកុំឱ្យកូនរបស់អ្នកញុំាអាហារនៅសាលាដែលមិនស្គាល់ប្រភពច្បាស់លាស់ អ្នកគួរតែចេះរៀបចំអាហារសម្រាប់កូនអ្នក ដែលអ្នកអាចទិញប្រអប់អាហារមួយ ឬពីរដែលសមល្មម បន្ទាប់មកអ្នកអាចរៀបចំអាហារទៅតាមក្រុមខាងលើដូចដែលយើងបានរៀបរាប់។ ចូរអ្នកជ្រើសរើសអាហារខាងលើណាមួយដូចជា នំបុ័ងស្រូវសាលី ប៉ោម ត្រី បាយ ដែលច្នៃជារូបភាពប្លែក រួចរៀបដាក់ក្នុងប្រអប់ដាក់ចូលក្នុងកាបូបរបស់កូន ហើយប្រាប់កូនៗថា ម៉ាក់បានរៀបចំអាហារឱ្យកូនញុំានៅក្នុងកាបូប ពេលកូនទៅរៀនកូនអាចដកយកមកញុំាបានណា។

អត្ថបទដោយ៖ Daddy_Rath