ការធ្វើលំហាត់ប្រាណជារឿងល្អបំផុតចំពោះសុខភាពរបស់យើងដែលមនុស្សគ្រប់រូបមិនគួររំលងទេ ប៉ុន្តែមានមនុស្សមួយចំនួនធំបែរជាធ្វេសប្រហែសមិនសូវចាប់អារម្មណ៍នៅក្នុងការធ្វើលំហាត់ប្រាណទៅវិញ ខណៈអ្នកដែលធ្វើសកម្មភាពរាងកាយទំនងជាមានជំងឺរ៉ាំរ៉ៃតិចជាងអ្នកដែលមិនធ្វើលំហាត់ប្រាណសោះ។ គ្រាន់តែអ្នកព្យាយាមធ្វើលំហាត់ប្រាណ អ្នកបានការពារជំងឺ ៥មុខនេះ។
១. ដកស្រ្តេស៖ បើអ្នកមានអាម្មណ៍ស្មុគស្មាញ និងអារម្មណ៍ស្រ្តេស ពេលខ្លះអ្នកគិតច្រើនពេក ក៏គ្មានដំណោះស្រាយដែរ។ បើអ្នកចង់ដោះស្រាយបញ្ហានេះ និងរក្សាសុខភាពបានរឹងមាំ គឺការបញ្ចូលសកម្មភាពធ្វើលំហាត់ប្រាណជាប្រចាំថ្ងៃ។ ពេលអ្នកធ្វើលំហាត់ប្រាណបែប aerobicគឺជួយខួរក្បាលឱ្យស្រលះ និងអារម្មណ៍ស្រស់ថ្លា។
២. ការពារជំងឺទឹកនោមផ្អែម៖ យោងតាមសារព័ត៌មានសុខភាព Mayoclinic បានបញ្ជាក់ថា ពេលអ្នកធ្វើលំហាត់ប្រាណកាន់តែខ្លាំង(អាចរយៈពេល១ម៉ោង ក្នុង១ថ្ងៃ) កាន់តែជួយបញ្ចុះជាតិស្ករដើម្បីការពារជំងឺទឹកនោមផ្អែម។ ហើយអ្នកគួរតែហូបបន្លែ និងត្រីឱ្យបានច្រើន។ ហើយពិសារទឹកច្រើន ឱ្យបានច្រើន ដើម្បីពង្រឹងសុខភាពកាន់តែល្អ។ អ្នកត្រូវបញ្ឈប់អាហារ និងភេសជ្ជៈណា មានជាតិស្ករច្រើន។
៣. សម្ពាធឈាមខ្ពស់ឱ្យមានលំនឹងវិញ៖ អ្នកដែលគ្មានលំហាត់ប្រាណសោះ ងាយរងសម្ពាធឈាមខ្ពស់ ហើយងាយប៉ះពាល់ដល់ជីវិតដែរគឺដាច់សរសៃខួរក្បាល។ ការអនុញ្ញាតឱ្យខ្លួនឯងឡើងគីឡូបន្តិចម្តងៗ ចំពោះមនុស្សដែលមានអាយុលើសពី ៤០ឆ្នាំ អាចដាច់សរសៃឈាមនិងគាំងជំងឺបេះដូង។ ដូចនេះ ការធ្វើលំហាត់ប្រាណជួយបញ្ចុះឈាមឱ្យមានលំនឹង។
៤. ការពារជំងឺមហារីក៖ លោកវេជ្ជបណ្ឌិតBoling បានមានប្រសាសន៍ឱ្យដឹងថា “ដោយសារតែភាពធាត់បានបង្កើនឱ្យមានហានិភ័យនៃជំងឺមហារីកមួយចំនួន ការបញ្ចូលទម្លាប់លំហាត់ប្រាណទៅក្នុងទម្លាប់របស់អ្នកប្រចាំថ្ងៃគឺវាអាចកាត់បន្ថយហានិភ័យរបស់អ្នកដោយជួយអ្នករក្សាទម្ងន់ឱ្យមានស្ថេរភាពល្អ”។
៥. កុំឱ្យមានជំងឺពុកឆ្អឹង៖ ជំងឺពុកឆ្អឹងច្រើនតែកើតឡើងទៅលើស្ត្រី បើអ្នកមិនចង់ឱ្យឆ្អឹងរបស់អ្នកផុយស្រួយខ្លាំងពេលឈានចូលដល់អាយុ៥០ឆ្នាំ ការធ្វើលំហាត់ប្រាណគឺជាវិធីល្អបំផុត ដែលវាជួយធ្វើឱ្យឆ្អឹងរបស់អ្នកកាន់តែរឹងមាំ និងកាត់បន្ថយហានិភ័យនៃជំងឺពុកឆ្អឹងបាននាពេលអនាគតបាន៕ អត្ថបទដោយ៖ ទ្រ សុភាព