មនុស្សជាច្រើន កំពុងជួបនឹងបញ្ហាជំងឺទទួលទានអាហារខុសប្រក្រតី ដែលបញ្ហានេះជាសញ្ញានៃបញ្ហាផ្លូវចិត្តមួយផងដែរ។ ការញ៉ាំខុសប្រក្រតីនេះ វានឹងនាំអ្នកឱ្យមានទម្លាប់បង្កើតចំណង់ទទួលទានអាហារមិនល្អ ប៉ះពាល់សុខភាព ដូចជាការញ៉ាំច្រើន ឃ្លានមិនឈប់ ឬការមិនចង់ញ៉ាំអាហារតែម្ដងផងដែរ។ ក្នុងករណីធ្ងន់ធ្ងរជំងឺនេះ ប៉ះពាល់ខ្លាំងដល់សុខភាព និងអាចប៉ះពាល់ជីវិតប្រសិនបើមិនស្វែងរកការព្យាបាល។

ផ្អែកតាមការឱ្យដឹងពី scientificworldinfo បានឱ្យដឹងថាភាពមិនប្រក្រតីនៃការញ៉ាំអាហារនេះ កើតឡើងលើបុរសស្រ្តី គ្រប់ដំណាក់កាលនៃជីវិត ប៉ុន្តែភាគរយច្រើនកើតលើស្ត្រីវ័យជំទង់ដែលចង់បានរាងស្អាត ប្រើវិធីសម្រកដោយបង្ខំ បង្អត់អាហារខ្លួនឯង។ អ្នកខ្លះទៀត ញ៉ាំច្រើនខ្លាំងពេក រហូតព្យាយាមបង្ខំឱ្យខ្លួនឯងក្អួតចេញមកវិញក៏មាន។ ភាពមិនប្រក្រតីនៃការញ៉ាំអាហារនេះ ក៏អាចធ្វើឱ្យមនុស្សមានជំងឺផ្លូវចិត្ត៦ប្រភេទផ្សេងៗគ្នា ប៉ុន្តែHealthy Cambodia សូមលើកយកជំងឺ១ ដកស្រង់ចេញពីប្រភពscientificworldinfo ចែករំលែកនោះគឺជំងឺសរសៃប្រសាទ (Anorexia nervosa)។

Anorexia nervosa គឺជាជំងឺកើតច្រើនបំផុតក្នុងចំណោមជំងឺផ្លូវចិត្តទាំង៦ប្រភេទ លើមនុស្សមានការងប់ងល់នឹងការសម្រកទម្ងន់ ភ័យខ្លាចលើសគីឡូ ព្យាយាមកាត់បន្ថយកាឡូរី ដោយការតមឬបង្អត់អាហារខ្លាំងពេក។ យូរៗនឹងធ្វើឱ្យមានរោគ​សញ្ញា​រាងកាយ ដូចជា រូបរាងចាប់ផ្ដើមចុះគីឡូខុសប្រក្រតី បរិមាណឈាមមិនធម្មតា,ចង្វាក់បេះដូងមិនទៀងទាត់ ,សម្ពាធ​ឈាម​ទាប,ហើមដៃឬជើង,ការប្រែពណ៌ស្បែក,ស្បែកស្ងួត,ការទល់លាមកនិងឈឺពោះ,សក់ស្តើងឬជ្រុះ,រដូវមកមិនទៀងឬមិនមករដូវ រាងកាយខ្សោយ អស់កម្លាំង ពិបាកគេង វិលមុខឬអាចដួលសន្លប់,ការខះជាតិទឹក។

ទាំងនេះជារោគសញ្ញា បង្ហាញឱ្យឃើញ ពីផលប៉ះពាល់ទៅលើសុខភាពផ្លូវចិត្ត ដោយសារការសម្រកខុសបច្ចេកទេស។ បើវាវិវត្តកាន់តែធ្ងន់ធ្ងរ មានហានិភ័យណាស់ដល់អាយុជីវិត គួរតែឆាប់ស្វែងរកដំណោះស្រាយពីគ្រូពេទ្យ។ ហេតុនេះ មិនថាការញ៉ាំច្រើនពេក ឬព្យាយាមបង្អត់ខ្លួនឯង រហូតក្លាយជាមនុស្សដែលមិនចង់ញ៉ាំអាហារអ្វីទាំងអស់ ពេលញ៉ាំធ្វើទុក្ខ សុទ្ធសឹងតែជាអាការនៃបញ្ហាសុខភាពទាំងផ្លូវកាយផ្លូវចិត្ត គួរទទួលទានឱ្យមានបរិមាណត្រឹមត្រូវ និងឱ្យត្រូវតាមក្បួនខ្នាតប្រសិនបើអ្នកចង់សម្រកគីឡូ គួរស្វែងរកអ្នកជំនាញដើម្បីណែនាំ៕

អត្ថបទដោយ៖ Senghong