ជំងឺមហារីកកំពុងជាប្រធាបបទមួយកំពុងតែក្ដៅ ដែលមហាជនកំពុងតែមានការព្រួយបារម្ភជាខ្លាំង តែយ៉ាងណាក្ដីប្រសិនបើអ្នកយកចិត្តទុកដាក់ក្នុងការការពារ និងថែសុខភាពល្អ រួមទាំងទទួលទានរបបអាហារឱ្របានត្រឹមត្រូវ នោះក៏ជាផ្នែកមួយជួយកាត់បន្ថយការកើតមហារីកដ៏ធំផងដែរ។
ជាមួយគ្នានេះដែរ ផ្លែឈើ និងបន្លែជាអាហារមួយប្រភេទដែលសម្បូរទៅដោយសារធាតុប្រឆាំងអុកស៊ីតកម្មខ្ពស់ ដូច្នេះពួកគេអាចប្រឆាំងនឹងជំងឺមហារីកបាន។ ប្រសិនបើបរិភោគ ជាប្រចាំវាជួយកាត់បន្ថយហានិភ័យនៃការវិវត្តទៅជាជំងឺមហារីកផ្សេងៗទៀតផង។
ខាងក្រោមនេះជាផ្លែឈើ និងបន្លែដែលអ្នកត្រូវទទួលទាន៖
១‑ខ្ទឹមស៖តាមការស្រាវជ្រាវមួយបានបង្ហាញថា ខ្ទឹមសមានឥទ្ធិពលប្រឆាំងនឹងអុកស៊ីតកម្មខ្ពស់ ដូច្នេះវាអាចទប់ស្កាត់ជំងឺមហារីកបានច្រើនប្រភេទរួមមាន មហារីកសុដន់ ជំងឺមហារីកក្រពេញប្រូស្តាត មហារីកពោះវៀនធំ មហារីកបំពង់អាហារ មហារីកក្រពះ មហារីកខួរក្បាល និងមហារីកលំពែង។
២‑គ្រាប់ធញ្ញជាតិ៖តាមការស្រាវជ្រាវបានរកឃើញថា គ្រាប់ធញ្ញជាតិអាចរារាំងការរីករាលដាលនៃកោសិកាមហារីកពោះវៀនធំ ហើយគ្រាប់ធញ្ញជាតិជាច្រើនមានលក្ខណៈប្រឆាំងនឹងជំងឺមហារីក និងការពារការកើតឡើងនៃជំងឺមហារីកក្នុងខ្លួនជាពិសេស ជំងឺមហារីកសុដន់ មហារីកពោះវៀនធំ និងមហារីកថ្លើម។
៣‑បន្លែផ្លែឈើពណ៌ស៖ដូចជា ស្ពៃក្តោបពណ៌ស ខ្ញី ចេក ផ្លែត្របែក ដែលមានផ្ទុកនូវសារធាតុប្រឆាំងអុកស៊ីតកម្មសំខាន់ៗ ដើម្បីជួយប្រឆាំងនឹងការរលាក និងជួយរក្សាកម្រិតជាតិស្ករក្នុងឈាម ជួយបញ្ចុះកូឡេស្តេរ៉ុលក្នុងឈាម ការពារប្រឆាំងនឹងជំងឺមហារីកពោះវៀនធំ មហារីកសុដន់ និងមហារីកក្រពេញប្រូស្តាត។
៤‑ផ្លែឈើនិងបន្លែពណ៌ទឹកក្រូចលឿង៖ដូចជាម្នាស់ ល្ហុង ត្រសក់ផ្អែម ពោត ការ៉ុត ម្ទេស ទឹកក្រូច មានផ្ទុកសារធាតុប្រឆាំងនឹងអុកស៊ីតកម្ម ហើយផ្ដល់វីតាមីនអា និងវីតាមីនសេ ដើម្បីជួយពង្រឹងប្រព័ន្ធភាពស៊ាំរបស់រាងកាយ មិនតែប៉ុណ្ណោះវាក៏ជួយថែរក្សាភ្នែកផងដែរ ហើយកាត់បន្ថយហានិភ័យនៃជំងឺភ្នែកឡើងបាយ មហារីកសួត មហារីកក្រពះ មហារីកមាត់ មហារីកប្លោកនោម៕
អត្ថបទស្រាវជ្រាវដោយ៖ម៉ាង វិសិដ្ឋារតន៍