ស្រីៗពេលមករដូវ តែជួបអាការជាឈឺចុកពោះ ចុកលើថ្ងាស រដូវមកម្ដងឈប់ ម្ដងមក ហើយមកតិចៗ ហើយមានខែខ្លះមកខ្លាំងខុសធម្មតា​ ដែលជាហេតុ នាំឱ្យស្រ្តីអស់កម្លាំងខ្លាំង ឈឺក្បាល វិលមុខ អារម្មណ៍ឆេវឆាវ...ជាដើម។ ដូច្នេះហើយ ដើម្បីជួយដោះស្រាយនិងកាត់បន្ថយអាការទាំងនេះបាន​ស្រ្តីគួរតែព្យាយាម សម្រាកឱ្យបានគ្រប់គ្រាន់ កាត់បន្ថយស្រ្តេសញុំា អាហារជំនួយសុខភាពផងដែរ ។

ខាងក្រោមនេះគឺជាភេសជ្ជៈដែលស្រ្តីអាចយកមកផឹកក្ដៅៗអំឡុងពេលមករដូវ​ ដើម្បីជួយបន្ធូរ​ការឈឺចាប់ក្នុងខ្លួន។

ដោយយោងតាមរយៈគេហទំព័រ timesofindia ភេសជ្ជៈដែលជួយដល់ស្រ្តីពេលមករដូវមានដូចជា៖

១.តែខ្ញី៖ តែនេះមានសមត្ថភាព ជួយទៅបំបាត់ការឈឺចាប់ពេលមករដូវ ជួយកាត់បន្ថយការរលាក ផ្សេងៗកើតមានអំឡុងពេលរដូវ តាមរយៈការសិក្សានៅឆ្នាំ២០១៨អ្នកជំនាញ​បានណែនាំផងដែរថាតែនេះក៏បានជួយបំបាត់អាការរមួលក្រពើដូចគ្នា។ ចំពោះរបៀបធ្វើតែនេះ​​គ្រាន់តែ​ហាន់ខ្ញី១ចំណិត ក្រូចឆ្មា១ចំណិត​រួចដាក់ក្នុងទឹកក្ដៅឧណ្ហៗ១កែវផឹក។

២.តែរមៀត៖ រមៀតគឺត្រូវបានប្រជាជនយើង និយមយកទៅប្រើប្រាស់ធ្វើជាគ្រឿងទេស នៅក្នុងផ្ទះបាយជាច្រើន​ រួមទាំងផលិតជាផលិតផល ថែរក្សាសម្រស់ផងដែរ ។ រមៀតនៅទីនេះគឺជាតែដែលមានប្រយជន៍សម្រាប់ស្រីអំឡុងពេលមករដូវ​ ដើម្បីជួយបំបាត់អាការស្លេកស្លាំង ការឈឺចុកចាប់ ជួយឱ្យរដូវមកស្រួលឆាប់អស់ កាត់បន្ថយអារម្មណ៍ឆេវឆាវជាដើម។ របៀបផឹក អាចយកម្សៅរមៀត ក្នុងបរិមាណត្រឹមត្រូវ ដាក់ផឹកលាយជាមួយទឹកដោះគោក្ដៅឧណ្ហៗ។

៣.តែ flax៖ សម្បូរដោយ ជាតិសរសៃ ជាតិដែក ម៉ាញេស្យូម ជាតិខ្លាញ់អូមេហ្កា៣ ដែលល្អសម្រាប់ស្រ្តីពេលមករដូវ ព្រោះអាចជួយបំបាត់ភាពស្លេសស្លាំង ខ្សោយកម្លាំង ដោយសារការមករដូវមានឈាមច្រើន ។

ជាចុងក្រោយ សូមស្រ្តីៗដែលមករដូវមានការឈឺចាប់ជាប់មិនដាច់​ អាចសាកផឹកភេសជ្ជៈទាំង៣មុខនេះបាន ដើម្បីជួយសម្រួលការឈឺចាប់ដែលកើតឡើង ហើយបើនៅតែមិនបាត់គួរតែទៅជួបពេទ្យពិនិត្យរកមើលមូលហេតុឱ្យបានត្រឹមត្រូវ ប្រសើរជាងនៅទ្រាំឈឺរាប់ខែមិនបាត់៕

អត្ថបទដោយ៖ ប៉ែត ធីតា