កាលពីពេលថ្មីៗនេះប្រជាជនកម្ពុជាយើងបានស្លាប់បាត់បង់ជីវិតចំនួន៤នាក់ ក្រោយបរិភោគសត្វកំភេមខ្មោច។ នេះបើយោងតាមការចុះផ្សាយរបស់នាយកដ្ឋានប្រយុទ្ធនឹងជំងឺឆ្លង CDC។

ជាក់ស្ដែងយោងតាមនាយកដ្ឋានប្រយុទ្ធនឹងជំងឺឆ្លង បានបង្ហោះសារនៅលើបណ្តាញសង្គមហ្វេសប៊ុក កាលពីយប់ថ្ងៃទី១១ ខែសីហា ដោយក្រើនរំឭកពលរដ្ឋកុំឱ្យបរិភោគសត្វ ឬរុក្ខជាតិដែលមិនស្គាល់ ឬមិនបានដឹង។

នាយកដ្ឋានប្រយុទ្ធនឹងជំងឺឆ្លង បានឱ្យដឹងថា៖«ប្រជាពលរដ្ឋយើងបានស្លាប់ចំនួន៤នាក់ហើយនៅក្នុងខេត្តឧត្តរមានជ័យ និងព្រះវិហារ ដោយសារបរិភោគសត្វកំភេមខ្មោចនិងសត្វស្រដៀងគ្នានេះ ដោយពុលនឹងជាតិ Cantharidin ដែលមាននៅក្នុងខ្លួនសត្វទាំងនេះ។ ក្រោយបរិភោគសត្វកំភេមខ្មោចនឹងបង្កឱ្យ ពងមាត់ ក្អួតឈាម បាត់បង់ស្មារតី នោមឈាម និងខូចតម្រងនោមនិងបង្កឱ្យស្លាប់បាន»។

គួរជម្រាបថា នៅឯខេត្តព្រះវិហារវិញ ប្តីប្រពន្ធមួយគូរស់នៅក្នុងភូមិស្រអែមត្បូង ឃុំកន្ទួត ស្រុកជាំក្សាន្ត បានទទួលមរណភាពនាពេលថ្មីៗនេះ បន្ទាប់ពីពួកគាត់បានបរិភោគសត្វកំភេមខ្មោចចន្លោះពី ៣ ទៅ៥ ក្បាល។ ហើយប្រមាណ១០នាទីក្រោយ ពួកគេក៏ក្អួត រមាស់ និងមានពងបែកក្នុងមាត់។ ទោះមានការជួយសង្រ្គោះពីគ្រូពេទ្យ ក៏មិនអាចជួយជីវិតពលរដ្ឋទាំង២នាក់នេះបានដែរ ដោយប្រពន្ធបានស្លាប់នៅថ្ងៃទី៥ ខែសីហា ប្តីស្លាប់ថ្ងៃទី៦ ខែសីហា ឆ្នាំ២០២៣ ៕

អត្ថបទដោយ៖ ស្រីណុច