បច្ចុប្បន្ននេះមាតាបិតានៅកម្ពុជាបានយកចិត្តទុកដាក់ខ្លាំងលើការអប់រំកូន ជាពិសេស​នៅអំឡុងវ័យកុមារត្រូវបញ្ចូនឱ្យចូលរៀននៅសាលាលើកដំបូង។ និយាយអំពីអាយុកុមារវិញ បើផ្អែកតាមកម្មវិធីសិក្សាមតេ្តយ្យសិក្សាអន្តរជាតិបានឱ្យដឹងថា កុមារចាប់ពីអាយុ២ឆ្នាំដល់៦ឆ្នាំ ជាវ័យមួយដែលកំពុងចង់ចេះ ចង់ដឹង រៀនស្គាល់អ្វីជាអ្វី ត្រូវការការអភិវឌ្ឍន៍ ដូច្នេះកុមារអាយុចាប់ពី២ឆ្នាំឡើងអាចចូលរៀននៅសាលាបានហើយ។

តាមប្រសាសន៍លោកគ្រូ សំ ចៃ នាយកប្រតិបត្តិ និងសហស្ថាបនិកនៃសាលាអន្តរជាតិប្រាយស្តារភ្នំពេញ បានមើលឃើញពីអត្ថប្រយោជន៍ជាច្រើន ដែលមាតាបិតាគួរយកកូនចូលសាលានៅអាយុចាប់ពី២ឆ្នាំឡើង ព្រោះវាជួយដល់ការអភិវឌ្ឍន៍លើឯករាជភាព និងភាពអាស្រ័យគ្នាទៅវិញទៅមក ការអភិវឌ្ឍន៍បុគ្គលិកលក្ខណៈ ទំនាក់ទំនងជាមួយមនុស្សនៅជុំវិញខ្លួន និងការអភិវឌ្ឍន៍មនោសញ្ចេតនាគឺជាមូលដ្ឋានគ្រឹះដ៏សំខាន់សំរាប់កុមារតូចៗ។ ពេលក្មេងចូលសាលាគេបង្រៀនអំពីការភិវឌ្ឍន៍បុគ្គលិកលក្ខណៈទាំងអស់នោះឱ្យមានភាពវិជ្ជមាន យល់ដឹងពីខ្លួនឯង ជឿជាក់នៅក្នុងទំនាក់ទំនង និងចេះគ្រប់គ្រងអារម្មណ៍។

សាលារៀនមិនត្រឹមតែផ្តល់ការអប់រំនោះទេ តែបានជំរុញឱ្យកុមាររៀនអំពីទំនាក់ទំនងជាមួយមនុស្សជុំវិញខ្លួនតាមវិធីផ្សេងៗជាច្រើនរួមទាំងការអភិវឌ្ឍន៍ភាសារ អក្សរ លេខ សិល្បះ និងគំនិតឆ្នៃប្រឌិត។ កុមាររៀនភាសាណាចេះភាសានោះ តុងនិយាយបែបណា កាត់និយាយតាមបែបនោះ អ្នកនៅជុំវិញធ្វើបែបណាគាត់ធ្វើតាមបែបនោះដែរ។ ដូច្នេះយើងត្រូវប្រុងប្រយ័ត្នក្នុងការដាក់គាត់ឱ្យនៅក្នុងមជ្ឈដ្ឋានណាមួយ។ សត្វក៏ត្រូវប្រែពណ៌ទៅតាមបរិស្ថាននៅជុំវិញខ្លួនពួកគេដែរ។

សម្រាប់កុមារតែងមានចម្ងល់ច្រើន ដូច្នេះគាត់ចូលចិត្តសួរចង់ចេះ ចង់ដឹងនិងចង់ឱ្យបកស្រាយបញ្ហានានានៅជុំវិញខ្លួនគេ។ ដូច្នេះហើយសាលារៀនជាកន្លែងដែលមានមិត្តរួមថ្នាក់ មានលោកគ្រូ អ្នកគ្រូចាំឆ្លើយជូនដល់ពួកគេ និងបណ្តុះឱ្យពួកគេចេះឆ្ងល់កាន់ច្រើនទៀត។

តាមបទពិសោធន៍លោកគ្រូ សំ ចៃ បានលើកឡើងថា ការរស់នៅប្រកបដោយផាសុខភាព និងសុខុមាលភាពរាងកាយ កុមារនៅអាយុនេះត្រូវអភិវឌ្ឍកាយសម្បទា និងការសិក្សា ជាពិសេសការអភិវឌ្ឍន៍ឥរិយាបថវិជ្ជមានចំពោះសុខភាព ការថែរក្សាខ្លួនឯង និងសកម្មភាពរាងកាយ។ ពួកគេត្រូវរៀនឱ្យដឹងថាអ្វីមានសុវត្ថិភាព អ្វីមានគ្រោះថ្នាក់ដល់រាងកាយរបស់ពួកគេ។

ជាមួយគ្នានេះ បន្ទាប់ពីនាំកូនចូលសាលាហើយ ដើម្បីជួយជំរុញការអភិវឌ្ឍន៍និងពង្រឹងការសិក្សាឱ្យកាន់តែមានប្រសិទ្ធភាព លោកគ្រូ សំ ចៃ សង្កត់ធ្ងន់ថា មាតាបិតាត្រូវយកចិត្តទុកដាក់លើការរៀបចំត្រៀមលក្ខណៈមុនទៅសាលារៀន ពិនិត្យកាលវិភាគប្រចាំសប្តាហ៍ឱ្យដឹងថាថ្ងៃនេះរៀនអ្វី មានកម្មវិធីអ្វីខ្លះ ដើម្បីងាយស្រួលរៀបចំឯកសណ្ឋានឱ្យត្រូវនឹងកម្មវិធីរបស់សាលា។ មួយវិញទៀតពិនិត្យកិច្ចការផ្ទះបានដាក់នៅក្នុងកាតាបហើយឬនៅ។ ព្រមទាំងរៀបចំអាហារ សំភារៈសិក្សា សម្លៀកបំពាក់សម្រាប់ផ្លាស់ប្តូរ និងរៀបចំខ្លួនរបស់កូនឱ្យស្អាតបាតមានរបៀបផងដែរ។

ពេលនៅក្នុងសាលារៀន មាតាបិតាត្រូវមានមធ្យោបាយទំនាក់ទំនងជាមួយសាលា ឬលោកគ្រូអ្នកគ្រូ ដូចជាតេលេក្រាម លេខទំនាក់ទំនងបន្ទាន់។ល។ មាតាបិតាត្រូវមានទំនាក់ទំនងជាមួយគ្នា​ ដើម្បីឱ្យដឹងថាកូនមានបញ្ហាណាមួយអំឡុងពេលសិក្សាឬអត់ ទាំងពីការគេង ការញ៉ាំ ឬគ្រោះថ្នាក់ជាយថាហេតុណាមួយកើតឡើង ដឹងទាន់ពេលវេលា។

បន្ថែមពីនេះ ត្រូវដឹងអំពីកាលវិភាគប្រចាំសប្តាហ៍ ប្រតិទិនប្រចាំឆមាសរបស់សាលា ត្រូវចូលរួមគ្រប់កម្មវិធីរបស់សាលាមានដូចជាជំនួបអាណាព្យាបាលជាមួយលោកគ្រូអ្នកគ្រូ ជំនួបបញ្ចប់ការសិក្សាប្រចាំឆ្នាំ ការណែនាំ និងកម្មវិធីផ្សេងៗទៀតដើម្បីតាមដានការសិក្សារបស់កុមារ និងវិធីជួយគាត់បន្ថែមបើសិនជាមាន។

ដោយឡែកលោកគ្រូបានរំលឹកថា ពេលកូនៗចេញពីសាលារៀនត្រូវពិនិត្យកាតាបរបស់គាត់តើមានសម្ភារៈគ្រប់គ្រាន់ត្រឡប់មកវិញទេ? តើមានកិច្ចការផ្ទះ រឺមានអ្វីមិនប្រក្រតីទេ? បន្ទាប់មករឿងដែលគួរធ្វីនោះគឺត្រូវ ឱ្យពួកគាត់ធ្វើកិច្ចការផ្ទះដែលសាលាដាក់ឱ្យហើយ ព្យាយាមនិយាយជាមួយកូន ក៏គាត់បង្ហាញពីអ្វីដែលពួកគាត់បានរៀន បានឃើញ ចេះជំនាញអ្វីខ្លះ ឬបានលេងអ្វីខ្លះ។ ការធ្វើដូចនេះ ក៏ដូចជាបានឱ្យកូនរលឹកអ្វីដែលបានរៀនឡើងវិញ ហើយត្រូវចេះនិយាយសរសើរកូនៗនៅអ្វីដែលពួកគេធ្វើបានផងដែរ។

គួរបញ្ជាក់ថា សាលាអន្តរជាតិប្រាយស្តារភ្នំពេញមានទទួលសិស្សចាប់អាយុ២ឆ្នាំ រហូតដល់ថ្នាក់ទី៦ បង្រៀនដោយគ្រូបរទេស មានបទពិសោធន៍ជាច្រើនឆ្នាំ ហើយពោរពេញទៅដោយសេចក្តីស្រលាញ់ និងការយកចិត្តទុកដាក់ពេញលេញ។ សាលាមានទីតាំងធំទូលាយ មានផាសុកភាព ដែលមានទីតាំងស្ថិតនៅខណ្ឌសែនសុខ រាជធានីភ្នំពេញ សម្រាប់ព័ត៌មានលំអិតបន្ថែម អាចធ្វើការទំនាក់ទំនងទៅកាន់សាលាផ្ទាល់តាមរយៈលេខទូរស័ព្ទ 012408789/ 015905789៕

អត្ថបទដោយ៖ Senghong