ជំងឺមហារីកសុដន់គឺជាជំងឺមួយដែលស្រ្តីប្រឈមកើតច្រើនជាងបុរស ហើយងាយនឹងគ្រោះថ្នាក់ដល់អាយុជីវិតខ្លាំងមែនទែន។ ដូច្នេះហើយការចៀសវាងកត្តាបង្កជំងឺនេះឡើងមកស្រ្តីគួរតែដឹង និងចៀសវាងឱ្យបានច្រើន។ អាស្រ័យហេតុនេះហើយក្នុងអត្ថបទនេះនិងមកប្រាប់ពីរោគសញ្ញាជំងឺមហារីកសុដន់ និងកត្តាបង្កជំងឺនេះឡើងមក មានកត្តាខ្លះយើងអាចចៀសវាងបាន។

នេះបើយោងតាមរយៈការចែករលែករបស់មន្ទីរពេទ្យកាល់ម៉ែត បានឱ្យដឹងថា​ជំងឺមហារីកសុដន់បែងចែកជា២ប្រភេទ យើងបែងចែកជំងឺមហារីកសុដន់នេះជា២ប្រភេទ ប្រភេទទី១មហារីកដែលកើតចេញពីបំរែបំរួលកោសិកានៅក្នុងបំពង់ទឹកដោះ ទី២ មហារីកដែលកើតចេញពីបំរែបំរួលកោសិកានៅក្នុងកន្សោមដោះ។

រោគសញ្ញាជំងឺមហារីកសុដន់មានដូចខាងក្រោម៖

រោគសញ្ញានៃជំងឺមហារីកសុដន់មាន៖     

- ប្រែប្រួលទំហំ និងទំរង់សុដន់

- សញ្ញាឈឺសុដន់

- ស្បែកសុដន់ប្រែប្រួល ក្រហម ហើម  រឺមានលក្ខណះដូចសំបកក្រូចពោធិសាត់

- មានចេញឈាម រឺទឹករងៃពីក្បាលសុដន់

- មានដុំស្អិតនៅក្នុងសុដន់

- ក្បាលសុដន់លឹបចូលក្នុង

- មានឡើងហើមកូនកណ្តុរក្រោមក្លៀក

កត្តាហានិភ័យដែលអាចអោយកើតជំងឺមហារីកសុដន់រួមមាន៖

  - កត្តាប្រវត្តិក្រុមគ្រួសារ (ម្តាយបង្កើត បងស្រី ប្អូនស្រីបង្កើត) កត្តាហ្សែន ៥-១០%

- អ្នកលើសទំងន់ច្រើនជាងគីឡូស្តង់ដា (BMI) និងអ្នកមានលើសគីឡូច្រើនក្រោយអស់រដូវ

- កត្តារបបចំណីអាហារ (អាហារសំបូរដោយជាតិខ្លាញ់)

- អ្នកដែលពិសារគ្រឿងស្រវឹងច្រើន

- អ្នកដែលប្រើពពួកអ័រម៉ូនយូរឆ្នាំ

- អ្នកមិនមានកូន សុដន់តឹងណែន

- អ្នកមានកូនដំបូងនៅអាយុច្រើនលើសពី ៣0ឆ្នាំ  និងស្ត្រីមិនបំបៅដោះកូន

- ស្ត្រីដែលមានរដូវដំបូងមុនអាយុ ១២ឆ្នាំ និងអស់រដូវក្រោយ ៥៥ឆ្នាំ។

  វិធីបង្ការពីជំងឺមហារីកសុដន់៖

- ពិនិត្យ គៀប និងអេកូសុដន់ជារៀងរាល់ឆ្នាំចាប់ពីអាយុ ៣៥ឆ្នាំឡើង

- ធ្វើលំហាត់ប្រាណអោយបានទៀងទាត់ដើម្បីរក្សាទំងន់អោយនៅស្តង់ដា (BMI)

- កុំជក់បារី និងបន្ថយការពិសារគ្រឿងស្រវឹង

- បន្ថយការប្រើប្រាស់អ័រម៉ូនរយៈពេលយូរលើសពី ១០ឆ្នាំ

- បំបៅដោះកូន ចន្លោះ ១ឆ្នាំកន្លះទៅ ២ឆ្នាំ

ជាចុងក្រោយបើសិនបងប្អូនមានរោគសញ្ញាដូចបានរៀបរាប់ខាងលើគួរប្រញាប់ទៅពិគ្រោះជាមួយវេជ្ជបណ្ឌិតជំនាញឱ្យបានត្រឹមត្រូវ ដើម្បីចៀសវាងមានបញ្ហាកាន់តែធ្ងន់ធ្ងរពិបាកព្យាបាល តែបើយើងមកពិគ្រោះទាន់ពេលការព្យាបាលឱ្យមានប្រសិទ្ធភាព៕