ការទទួលទានអាហារពេលព្រលឹមបានក្លាយរឿងរ៉ាវដែលត្រូវបានគេណែនាំពាសពេញពិភពលោក និងហាមប្រាណឱ្យមនុស្សគ្រប់រូបកុំផ្តាច់របបអាហារពេលឱ្យសោះបើទោះបីអ្នកស្ថិតនៅក្នុងស្ថានភាពសម្រកទម្ងន់ក្តី។ ជាក់ស្តែង តាមការសិក្សានៅសាកលវិទ្យាល័យLowa លើមនុស្សពេញវ័យចំនួន៦៥៥០នាក់​អស់រយៈពេល១២ឆ្នាំ បានឱ្យដឹងជាលទ្ធផលថា ក្រុមមនុស្សដែលមិនញ៉ាំអាហារពេលព្រឹកមានហានិភ័យក្នុងការស្លាប់លឿនជាងមនុស្សដែលញ៉ាំអាហារពេលព្រឹកដល់ទៅ៨៧%​ដោយសារតែជួយជំងឺបេះដូង ​ឬជំងឺដាច់សរសៃរឈាមខួរក្បាល។ លើសពីនេះទៅទៀត​ អ្នកដែលកាត់ផ្តាច់អាហារពេលព្រឹកចោលងាយក៏អាចប្រឈមនឹងការកើនឡើងហានិភ័យនៃជំងឺធាត់និងជំងឺទឹកនោមផ្អែមប្រភេទទី២​ដែលជាជំងឺពិបាកក្នុងការព្យាបាលមួយផងដែរ។

ទាក់ទិនទៅនឹងបញ្ហាដែលចោទមានខាងលើ ថ្ងៃនេះ Healthy Cambodia នឹងសូមលើកយកអាហារចំនួនប៉ុន្មានមុខខាងក្រោមនេះ ដែលពិតជាជំនួយដល់សុខភាពនាពេលព្រឹក និងជម្រុញឱ្យប្រព័ន្ធរំលាយអាហារកាន់តែមានដំណើរការល្អប្រសើរឡើងដោយយោងតាមប្រភព femina.in ៖

១. ទឹកក្តៅ និងទឹកឃ្មុំ៖ ទឹកឃ្មុំសម្បូរទៅដោយសារធាតុរ៉ែ វីតាមីន សារជាតិ flavonoids និងអង់ស៊ីមដែលចាំបាច់ ដើម្បីរក្សាពោះវៀនឱ្យស្អាត និងមានសុខភាពល្អ។ ការទទួលទានទឹកឃ្មុំជាមួយទឹកក្តៅឧណ្ឌនៅអំឡុងពេលពោះទទេនឹងជួយបណ្តេញជាតិពុលព្រមទាំងបង្កើនការរំលាយអាហារ និងផ្តល់ថាមពលដល់រាងកាយក្នុងរយៈពេលខ្លី ដើម្បីបំពេញមុខងារប្រចាំថ្ងៃ។

២. គ្រាប់អាល់ម៉ុន៖​ អាល់ម៉ុន គឺជាប្រភព ម៉ង់ហ្គាណែស វីតាមីនE ប្រូតេអ៊ីន ជាតិសរសៃ អូមេហ្គា៣ និងអាស៊ីតខ្លាញ់អូមេហ្គា៦។ ការទទួលទានអាល់ម៉ុនលាយជាមួយនឹងទឹកដោះគោស្រស់ នឹងផ្តល់ឱ្យនូវសារជាតិចិញ្ចឹមខ្ពស់ បំប៉នក្រពះពោះវៀន សម្រួលអង្គចងចាំ ថែមទាំងធ្វើឱ្យមានអារម្មណ៍ថាឆ្អែតបានយូរ។

៣. ស្រូវសាឡី៖ ជាប្រភេទអាហារមានជាតិសរសៃខ្ពស់ ជួយគ្រប់គ្រងជាតិស្ករ និងអ័រម៉ូន insulin ក្នុងចរន្តឈាមបានល្អ ។ ការសិក្សាជាច្រើនបានរកឃើញថា អ្នកញ៉ាំអាហារពេលព្រឹកជាមួយស្រូវសាឡី ១០០ ក្រាមជារៀងរាល់ព្រឹក អាចជួយបញ្ចុះខ្លាញ់អាក្រក់ និងការពារកុំឲ្យកើតជំងឺបេះដូង។ ជានេះទៅទៀត ភេសជ្ជៈម្សៅស្លឹកស្រូវសាលីខ្ចី (Wheat grass powder) ក្តៅឧណ្ឌៗ ក៏អាចធ្វើឱ្យមុខងារប្រព័ន្ធរំលាយអាហារប្រសើរឡើង ការពារការទល់លាមក ដោះស្រាយបញ្ហាក្រពះពោះវៀន និងការចាល់អាស៊ីត។

៤. ផ្លែ​ល្ហុងទុំ៖ ការទទួលទានផ្លែល្ហុងនៅពេលពោះទទេ គឺជាវិធីដ៏ល្អមួយក្នុងការសម្អាតរាងកាយពីជាតិពុលនិងធានាឱ្យចលនាពោះវៀនដើរបានរលូន។ ទន្ទឹមនឹងនេះដែរ ផ្លែល្ហុងអាចបញ្ចុះកូឡេស្តេរ៉ុលអាក្រក់និងការពារជំងឺបេះដូង។ តួយ៉ាងក្រុមអ្នកជំនាញបានណែនាំ ឱ្យញ៉ាំផ្លែល្ហុងទុំមុនអាហារពេលព្រឹករយៈពេល៤៥នាទីជារៀងរាល់ថ្ងៃ ដើម្បីទទួលបានសុខភាពពោះវៀនកាន់តែល្អប្រសើរឡើង។

៥. ផ្លែឪឡឹក៖ ផ្លែឈើមួយមុខនេះ ត្រូវបានគេដឹងថា មានផ្ទុកជាតិទឹក ៩០% និងពោរពេញទៅដោយអេឡិចត្រូលីត ជួយសម្រួលដល់សុខភាពក្រពះ។ ផ្លែឪឡឹក ជាប្រភេទផ្លែឈើមានជាតិទឹកច្រើន និងជាតិស្ករឆ្អែត ដោយមានកាឡូរីតិចតួចបំផុត (ផ្លែឪឡឹកមួយពែងមាន ៤០កាឡូរី) ។ ជាងនេះទៀតសោត ផ្លែឪឡឹកក៏មានផ្ទុកនូវសារធាតុ Lycopene ខ្ពស់ដែលជួយដល់សុខភាពបេះដូង និងភ្នែកដែរ។

៦. ទឹកគ្រាប់ជី៖ គ្រាប់ជី ផ្ទុកពោរពេញទៅដោយប្រូតេអ៊ីន ជាតិសរសៃ កាល់ស្យូម សារធាតុប្រឆាំងអុកស៊ីតកម្ម និងអូមេហ្គា ៣។ គ្រាប់ជី មានសមត្ថភាពពង្រីងសុខភាពក្រពះ ធ្វើឱ្យឆ្អែតបានយូរ។ វិធីល្អបំផុតក្នុងការញ៉ាំ គឺត្រាំជាមួយទឹកក្តៅឧណ្ឌៗ ព្រោះនៅពេលដែលត្រាំបែបនេះ គ្រាប់ជីអានឹងរីកបានលឿន ឆាប់បង្កើតបានសារធាតុកូតជែឡាទីណូសដែលជួយឱ្យធ្វើចលនាបានលឿននៅក្នុងប្រព័ន្ធរំលាយអាហារ។ យ៉ាងណាមិញ ការទទួលទានទឹកគ្រាប់ជីក្តៅឧណ្ឌៗនេះ ត្រូវបានគេប្រទះឃើញមានអ្នកសម្រកទម្ងន់ជាច្រើនប្រសើរប្រាស់នូវវិធីមួយនេះ។

៧. ស៊ុត៖ ប្រភពសារធាតុ Choline ដែលមាននៅក្នុងស៊ុត មានសារៈសំខាន់បំផុតសម្រាប់សុខភាពសរសៃប្រសាទខួរក្បាល ដើម្បីដែលមានតួនាទីចូលទៅបំពេញអង់ចងចាំ ប្រឆាំងការលាក។​ ជាងនេះទៅទៀត សារជាតិSelenium ដែលមាននៅក្នុងស៊ុត អាចជួយការពារការកកឈាម ជំងឺដាច់សរសៃឈាមខួរក្បាល និងគាំងបេះដូង។

ជារួមមកវិញ ការស្រស់ស្រូបអាហារនាពេលព្រឹកពិតជាចាំបាច់ខ្លាំង ចំពោះសុខភាពបងប្អូនក្នុងរយៈពេលពេញមួយថ្ងៃ និងសម្រាប់ទៅថ្ងៃអនាកតផងដែរ។ ជាតឹកតាងដូចបានលើកឡើងនៅក្នុងផ្នែកខាងលើ ប្រសិនបើអ្នកផ្តាច់ចោលនូវអាហារពេលព្រឹក សុខភាពពិតអាចនឹងធ្លាក់ចូលក្នុងស្ថានភាពអាក្រក់។ តែក៏មិនមែនមានន័យថា បងប្អូនអាចទទួលទានអាហារគ្រប់មុខនោះទេ យើងត្រូវមានជម្រើសអាហារណាដែលសុខភាព ដូចទៅនឹងក្រុមអាហារទាំង៧ដែលបានរៀបរាប់ខាងលើនេះផ្ទាល់៕