ពេលខ្លះយើងយកកំហឹង ការស្អប់ និងការច្រណែន មកបំផ្លាញក្តីសុខក្នុងការទំនាក់ទំនងទៅវិញ។ បើយើងបណ្តោយឱ្យអារម្មណ៍អវិជ្ជមានដឹកនាំមុខនោះ នៅក្នុងរង្វង់គ្រួសារ ការងារ ដៃគូសហការចូលហ៊ុននានា និងចំណងស្នេហាជាដើម ច្បាស់ជាបែកបាក់មិនខានទេ។ តាមលោកគ្រូ ហឿ សេធុល ជាអ្នកប្រឹក្សាយោបលផ្នែកបញ្ហាផ្លូវចិត្តបានលើកឡើងថា បើអ្នកចង់ឱ្យទំនាក់ទំនងល្អជាមួយនរណាឬជាមួយគ្រួសារ និងដៃគូ អ្នកត្រូវចេះគ្រប់គ្រងលើអារម្មណ៍ខ្លួនឯង។ កុំយកកំហឹងមកដោះស្រាយបញ្ហា វាធ្វើឱ្យបញ្ហារីកកាន់តែធំប៉ុណ្ណោះ។ អ្នកត្រូវគិតបែបក្តីមេត្តាធ្វើឱ្យអ្នកមានទំនាក់ទំនងល្អជាមួយមនុស្សជុំវិញខ្លួន។
ហើយលោកគ្រូ បានបន្តថា ការគិតបែបក្តីមេត្តាធ្វើឱ្យបេះដូងរបស់អ្នកឆាប់យល់ពីអារម្មណ៍របស់អ្នកដទៃបានលឿន។ តើត្រូវធ្វើដូចម្ដេចទើបអ្នកមានក្ដីមេត្តាលើអ្នកដទៃ? លោកគ្រូ សេធុល លើកឡើងថា ការទាក់ទងនឹងការបង្កើតក្ដីមេត្តាលើអ្នកដទៃគឺ ត្រូវចេះរៀនយកខ្លួនយើងទៅដាក់ក្នុងស្ថានភាពអ្នករបស់អ្នកដទៃ ហើយឆ្លុះបញ្ចាំងមើលថាប្រសិនបើយើងស្ថិតក្នុងស្ថានភាពនោះតើយើងនឹងធ្វើដូចគេគិតដូចគេ ដែរឬទេ។ ពេលនោះអ្នកនឹងទទួលបានចម្លើយ ហើយយល់ពីការគិតរបស់គេ ក្នុងស្ថានភាពមួយនោះ ពេលនោះហើយដែលអ្នកនឹងមានចិត្តអាណិត មេត្តាដល់គេ។
តាមលោក ម៉ារទីន មានប្រសាសន៍ថា ការគិតផ្លូវល្អឬគិតបែបវិជ្ជមាននេះ មិនមែនមានតាំងពីកំណើតមកទេ គឺតម្រូវឱ្យអ្នកចេះហាត់រៀនគិតរឿងវិជ្ជមាន ឬគិតល្អៗ ឱ្យច្រើន កុំដាក់សម្ពាធលើខ្លួនឯង វាគ្មានប្រយោជន៍អ្វីទេ។ គាត់បានបន្តថា អ្នកដែលគិតរឿងអ្វីមួយក្នុងផ្លូវអាក្រក់ ពេលមានឧបសគ្គ និងការឈឺចាប់ គេច្បាស់ជាឈប់នៅស្ងៀមមួយកន្លែងមិនខានឡើយ។ ចំណែកគិតផ្លូវល្អនឹងមានកម្លាំងចិត្តបោះជំហានទៅមុខយ៉ាងអង់អាចរហូតដល់ឆ្លងវាផុត។” និយាយទៅនៅក្នុងរឿងគិតវិជ្ជមាននេះ វាជាច្បាប់ធម្មជាតិថា ឱ្យតែអ្នកមានក្តីសង្ឃឹមតែ ១%ក្នុងការដើរទៅមុខ ឥទ្ធិពលនៃក្តីសង្ឃឹមក៏រីកធំឡើង ១០%ទៅ១០០%ថែមទៀត នេះជារបៀបមនុស្សជោគជ័យបង្កើតសេចក្តីសុខឱ្យខ្លួនឯង។ អ្នកឃើញទេ! ការគិតពីររបៀបនេះ ធ្វើឱ្យជីវិតអ្នកមានទំនាក់ទំនងល្អជាមួយអ្នកដទៃហើយមានក្តីសុខផ្លូវចិត្តផងដែរ៕ អត្ថបទដោយ៖ ទ្រ សុភាព