ជំងឺលើសសម្ពាធឈាម ជាជំងឺដែលអាចបង្កគ្រោះថ្នាក់ដល់ជីវិតគ្រប់ពេលវេលា។ កាលណាសម្ពាធឈាមកាន់តែឡើងខ្ពស់ខ្លាំង វាអាចបង្កហានិភ័យទៅជាជំងឺបេះដូង គាំងបេះដូង ដាច់សរសៃឈាមខួរក្បាល ទឹកនោមផ្អែម ខ្សោយតម្រងនោម(ក្រលៀន)ជាដើម។ ទោះបីជាវាមិនបង្ករោគសញ្ញាជាទូទៅគ្រប់គ្នាក៏ដោយ ជំងឺនេះក៏អាចបង្ហាញចេញជារោគសញ្ញាដូចជា៖ ឈឺក្បាល ឈឺឬចុករោយកញ្ចឹងក ហឹងត្រចៀក ញ័រទ្រូង ចង្វាក់បេះដូងលោតមិនទៀងទាត់ ឈឺទ្រូង ស្រវាំងភ្នែក អស់កម្លាំង ជាដើមនេះបើផ្អែកតាមការឱ្យដឹងពីCDCអាមេរិក។

បើលោកអ្នកឧស្សាហ៍មានរោគសញ្ញាសង្ស័យថាខ្លួនឯងមានបញ្ហាលើសសម្ពាធឈាម លោកអ្នកក៏អាចតាមដានសុខភាពខ្លួនឯងបាននៅផ្ទះតាមរយៈការវាស់សម្ពាធឈាមផងដែរ។ លោកអ្នកអាចវាស់ជាមួយគ្រូពេទ្យ ឬអាចវាស់ដោយខ្លួនឯងដោយប្រើប្រាស់ម៉ាស៊ីនវាស់សម្ពាធឈាមស្វ័យប្រវត្តិ ដែលអាចរកទិញបានតាមឱសថស្ថាននានាតម្លៃរបស់វាអាចមានចាប់ពី២០$ ឬ៨ពាន់រៀលឡើង ទុកសម្រាប់តាមដានសម្ពាធឈាមខ្លួនឯងជាប្រចាំបាន។ ផ្អែកតាមប្រភពmedicalnewstoday ដើម្បីវាស់សម្ពាធឈាមបានត្រឹមត្រូវ ៖

១ ចៀសវាងធ្វើការវាស់នៅក្នុងបន្ទប់ត្រជាក់

២ ចៀសវាងការធ្វើលំហាត់ប្រាណ ជក់បារី ផឹកជាតិកាហ្វេអ៊ីន ទឹកគ្រឿងស្រវឹង មុនវាស់ឈាម៣០នាទី

៣ ត្រូវឱ្យប្លោកនោមបញ្ចេញចោល(នោម)មុនពេលវាស់ ព្រោះនៅពេលប្លោកនោមពេញអាចធ្វើឱ្យសម្ពាធឈាមប្រែប្រួល

៤ ត្រូវដកដង្ហើមវែងៗ និងសម្រាកឱ្យបាន៥នាទីមុនវាស់

៥ ត្រូវដាក់ក្រណាត់រុំ ដែលមានភ្ជាប់ជាមួយម៉ាស៊ីន លើស្បែកដើមដៃផ្ទាល់ រុំកុំឱ្យរបូតតែកុំឱ្យតឹងពេក

៦ ចៀសវាការនិយាយអំឡុងពេលធ្វើវាស់ឈាម

៧ ត្រូវដាក់ជើងឱ្យរាបស្មើរហើយអង្គុយឱ្យត្រង់ខ្លួន

ពេលចាប់ផ្ដើមចុចប៊ូតុងវាស់ ករណីលទ្ធផលបង្ហាញឃើញថា 120/80mm Hg នោះមានន័យថាសម្ពាធឈាមនៅកម្រិតធម្មតា។ លទ្ធផល 120ទៅ១២៩/80mm Hg សម្ពាធឈាមចាប់ផ្ដើមកើនឡើង។ លទ្ធផល 130ទៅ១៣៩/៨០ទៅ៨៩ mm Hg សម្ពាធឈាមលើសក្នុងដំណាក់កាលពី1។ លទ្ធផល 140ឬខ្ពស់ជាងនេះ/៩០ឬខ្ពស់ជាងនេះ ឈានចូលដល់ដំណាក់កាលទី២ និងខ្ពស់ជាង180/120 mm Hg ចូលដល់វិវត្តិលើសសម្ពាធឈាមធ្ងន់ធ្ងរឆាប់តៅពេទ្យភ្លាមៗ។

គួរបញ្ជាក់ដែលថា ករណីលោកអ្នកវាស់ឃើញលើសពីកម្រិតធម្មតា គួរទៅស្វែងរកការប្រឹក្សារកដំណោះស្រាយបន្ថែមពីគ្រូពេទ្យ។ សម្រាប់ការវាស់មិនតម្រូវឱ្យវាស់រាល់ថ្ងៃទេ អាចវាស់១សប្ដាហ៍ម្ដង ១ខែ ៦ខែ ១ឆ្នាំម្ដង ឬវាស់នៅពេលដែលអ្នកមានអារម្មណ៍ថាមិនស្រួលខ្លួន។ បើមិនចង់ធ្លាក់ខ្លួនចូលជំងឺរ៉ាំរ៉ៃនៅថ្ងៃមុខ សូមព្យាយាមតាមដាននិងថែសុខភាពជាប្រចាំនិងការពារខ្លួនកុំឱ្យមានបញ្ហាលើសសម្ពាធឈាមឱ្យសោះ៕

អត្ថបទដោយ៖ Senghong