ដូចដែលយើងដឹងកន្លងមកហើយថា អ្នកជំងឺទឹកនោមផ្អែមមាន ៣ប្រភេទ គឺអ្នកជំងឺទឹកនោមផ្អែមប្រភេទទី១, អ្នកជំងឺទឹកនោមផ្អែមប្រភេទទី២ និងស្ត្រីដែលមានជំងឺទឹកនោមផ្អែមអំទ្បុងពេលមានផ្ទៃពោះ(អ្នកជំងឺទឹកនោមផ្អែមប្រភេទទី៣)។

ទន្ទឹមនឹងគ្នានេះ លោកវេជ្ជបណ្ឌិត ស៊ុំ សត្ថា ឯកទេសជំងឺ ទឹកនោមផ្អែម ក្រពេញ និងអ័រម៉ូន នៃមន្ទីពេទ្យកាល់ម៉ែតបានមានប្រសាសន៍ថា ចំពោះការព្យាបាលជាអាទិភាពអ្នកជំងឺទឹកនោមផ្អែមប្រភេទទី១ គឺត្រូវប្រើប្រាស់ Insulin, រីឯអ្នកជំងឺទឹកនោមផ្អែមប្រភេទទី២ អាចនឹងប្រើប្រាស់ថ្នាំគ្រាប់ខ្លះ ឬក៏ប្រើប្រាស់ Insulin ផងដែរ, ចំណែកឯស្ត្រីដែលមានផ្ទៃពោះហើយមានជំងឺទឹកនោមផ្អែមអំទ្បុងពេលដែលមានផ្ទៃពោះនោះ Insulin គឺជាឱសថដែលមានសុវត្ថិភាពជាងគេ បើធៀបជាមួយនឹង Metformine។

ជាមួយគ្នានេះដែរ លោកវេជ្ជបណ្ឌិត ស៊ុំ សត្ថា បានលើកឡើងថា Insulin ត្រូវបានគេរកឃើញមកទល់នឹងពេលនេះ គឺមួយសតវត្សរ៍គត់ (1921-2021) ដោយអ្នកប្រាជ្ញឈ្មោះ Frederick Banting និង Charles Best។

ក្នុងនោះដែរ លោកវេជ្ជបណ្ឌិត បានបន្ថែមថា ជាទូទៅគ្រូពេទ្យប្រើប្រាស់ Insulin ទៅលើអ្នកជំងឺតាមរយៈការចាក់ ហើយការចាក់នេះយើងអាចប្រើ Seringue ឬក៏ប្រើប៊ិច ហើយបច្ចេកវិទ្យាទំនើប គឺមានការប្រើប្រាស់ Insulin Pump។

នៅប្រទេសកម្ពុជាយើង មន្ទីរពេទ្យកាល់ម៉ែត គឺជាមន្ទីរពេទ្យទី១ ដែលចាប់ផ្ដើមប្រើប្រាស់ Insulin Pump សម្រាប់ព្យាបាលអ្នកជំងឺដើម្បីជាគុណប្រយោជន៍។

ដូច្នេះខាងក្រោមនេះ គឺជាអត្ថប្រយោជន៍នៃការប្រើប្រាស់ Insulin Pump មានដូចជា៖

-Insulin Pump មានមុខងារប្រហាក់ប្រហែលហ្នឹងលំពែងដែរ។

-កាត់បន្ថយចំនួនម្ជុលដែលត្រូវចាក់ សម្រាប់ Insulin Pump គឺយើងចាក់តែ ម្ដងរាល់ ៣ថ្ងៃ។

-Insulin Pump មានភាពសុក្រឹតជាងការចាក់ដោយប្រើ Syringe ឬក៏ប្រើប៊ិច។

-តាមរយៈការប្រើប្រាស់ Pompe à insuline អាចកាត់បន្ថយនូវហានិភ័យនៃការចុះជាតិស្ករក្នុងឈាម។

-ប្រសិទ្ធិភាពក្នុងការគ្រប់គ្រង HbA1c របស់ Insulin Pump គឺខ្ពស់ជាងការប្រើប្រាស់ Insulin តាមវិធីចាក់។

-កាត់បន្ថយការឡើងជាតិស្ករក្នុងឈាមពេលព្រឹក ពីព្រោះគ្រូពេទ្យអាចធ្វើការសម្របសម្រួលល្បឿន Insulin នាពេលយប់ដល់អ្នកជំងឺ។

អាស្រ័យដូចដែរ លោកវេជ្ជបណ្ឌិត ស៊ុំ សត្ថា បានរៀបរាប់ខាងលើអញ្ចឹង សម្រាប់អ្នកជំងឺទឹកនោមផ្អែមប្រភេទទី១, អ្នកជំងឺទឹកនោមផ្អែមប្រភេទទី២ ក៏ដូចជាស្ត្រីដែលមានជំងឺនោមផ្អែមអំទ្បុងពេលមានផ្ទៃពោះ អាចប្រឹក្សាជាមួយនឹងក្រុមវេជ្ជបណ្ឌិតឯកទេសជំងឺក្រពេញអ័រម៉ូន និងជំងឺទឹកនោមផ្អែម នៃមន្ទីរពេទ្យកាល់ម៉ែត ដើម្បីបានទទួលនូវអត្ថប្រយោជន៍នៃការព្យាបាលដោយប្រើប្រាស់ Insulin Pump៕

អត្ថបទរៀបរៀងដោយ៖ម៉ាង វិសិដ្ឋារតន៍