តួនាទីនីមួយៗនៃល្បាយលាយផ្សំទាំង២នៃទឹកដោះគោល្មៀត ត្រូវមនុស្សជាតិនាំគ្នាដឹងជាច្រើនកន្លងមកហើយថា ល្មៀត ក្លាយជាឱសថថែរក្សា និងកែរោគស្បែកគ្រប់ប្រភេទយ៉ាងពូកែស័ក្កសិទ្ធិ។ តួយ៉ាង បើយោងទៅតាមប្រភព medicalnewstoday.com បានលើកយកនូវហេតុផលចំនួន៥​ដែលអ្នកគួរតែញ៉ាំទឹកដោះគោល្មៀត១កែវជារៀងរាល់ថ្ងៃ៖

១.​ការពារការខូចខាតកោសិកា៖ ការសិក្សាមួយចំនួនបានបង្ហាញថា សារធាតុប្រឆាំងអុកស៊ីតកម្មនៅក្នុងល្មៀត អាចជួយជួសជុលកោសិការាងកាយរបស់មនុស្ស មានឥទ្ធិពលវិជ្ជមានលើការកាត់បន្ថយការខូចខាតកោសិកា និងជួយកាត់បន្ថយហានិភ័យនៃជំងឺជាច្រើន។

២. ធ្វើឱ្យអារម្មណ៍ប្រសើរឡើង៖ មានភ័ស្តុតាងបង្ហាញប​ន្ថែមថា ល្មៀត និងទឹកដោះគោ អាចជួយធ្វើឱ្យអារម្មណ៍ប្រសើរឡើងចំពោះអ្នកដែលទទួលទានវាជាប្រចាំ។ តួយ៉ាងការសិក្សាតូចមួយដែលមានអ្នកចូលរួម ៦០ នាក់ បានរកឃើញថាការប្រើថ្នាំគ្រាប់ដែលផលិតឡើងពីសមាសធាតុល្មៀត អាចជួយកាត់បន្ថយរោគសញ្ញាចំពោះអ្នកដែលមានជំងឺធ្លាក់ទឹកចិត្តខ្លាំង។ រីឯ ទឹកដោះគោវិញមានសារធាតុ វីតាមីន D គ្រប់គ្រាន់អាចគាំទ្រដល់ការផលិតសេរ៉ូតូនីនដែលជាអរម៉ូនទាក់ទងនឹងអារម្មណ៍ចំណង់អាហារ និងការគេង។ តាមការវិភាគរបស់ក្រុមអ្នកជំនាញចិត្តសាស្រ្ត និងអាហារូត្ថម្ភក្នុងឆ្នាំ២០១៩ រំលេចភស្តុតាងឱ្យដឹងដែរថា វីតាមីន D អាចជួយឃុំគ្រងអារម្មណ៍របស់មនុស្សដែលមានបញ្ហាស្ត្រេសមិនឱ្យវិវិត្តន៍ទៅជាជំងឺធ្លាក់ទឹកចិត្តធ្ងន់ធ្ងរបានទេ។

៣. ជំនួយដល់មុខងារខួរក្បាល និងបង្កើនការចងចាំ៖ មានស្រាវជ្រាវមួយចំនួនបានបង្ហាញដែរថា មនុស្សវ័យចំណាស់ដែលទទួលទានផលិតផលទឹកដោះគោស្រស់ជារៀងរាល់ថ្ងៃ មានបរិមាណជាតិ glutathione ខ្ពស់ ដែលជាអង់ទីអុកស៊ីដង់ដ៏ខ្លាំងក្លានៅក្នុងខួរក្បាល។ ការទទួលទានទឹកដោះគោស្រស់បីពេលក្នុងមួយថ្ងៃ នឹងទទួលបានកម្រិតអង់ទីអុកស៊ីដង់ខ្ពស់ជាងប្រមាណ ៣០% បើប្រៀបធៀបទៅនឹងអ្នកដែលមិនបានទទួលសោះ។ ម្យ៉ាងទៀត សារជាតិ glutathione និងសមាសធាតុផ្សេងទៀតក្នុងទឹកដោះគោជួយជម្រុញដល់មុខងារខួរក្បាលឱ្យមានដំណើរការល្អ បង្កើនអង្គចងចាំ និងកាត់បន្ថយនៃបញ្ហាជំងឺភ្លេចភ្លាំង វង្វេង ដាច់សរសៃឈាមខួរក្បាលផងដែរ។

៤.ការថយចុះកម្រិតជាតិស្ករក្នុងឈាម៖ ល្មៀត ជួយកាត់បន្ថយជាតិស្ករក្នុងឈាមយ៉ាងឆាប់រហ័សចំពោះអ្នកដែលមានជំងឺទឹកនោមផ្អែមប្រភេទទី ២។ អ្នកវិទ្យាសាស្ត្របានបែងចែកអ្នកចូលរួមចំនួន ៥០ នាក់ដែលមានជំងឺទឹកនោមផ្អែមប្រភេទទី ២ ជាពីរក្រុម។ អស់រយៈពេល ១០សប្តាហ៍ ក្រុមមួយបានប្រើថ្នាំសម្រាញ់ពីសមាសធាតុល្មៀត ២០០០មីលីក្រាម ក្នុងមួយថ្ងៃបានកាត់បន្ថយកម្រិតជាតិស្ករក្នុងឈាមយ៉ាងឆាប់រហ័សជាងក្រុមផ្សេងទៀតបានលេបថ្នាំ placebo។

៥. ជួយសុខភាពឆ្អឹង៖ ឥទ្ធិពលនៃសារធាតុចិញ្ចឹមផ្សំរវាង កាល់ស្យូម ផូស្វ័រ ប៉ូតាស្យូម ប្រូតេអ៊ីន សារជាតិខ្លាញ់ឆ្អែត និងវីតាមីនK ២ មានសារៈសំខាន់ចាំបាច់បំផុតសម្រាប់ការថែរក្សាឆ្អឹង និងធ្មេញឱ្យបានរឹងមាំ។ បន្ថែមជាមួយគ្នានេះទៅទៀត ការសិក្សាមួយបានបង្ហាញថា ការញ៉ាំទឹកដោះគោស្រស់ជាប្រចាំនឹងជួយបញ្ជៀសហានិភ័យនៃជំងឺពុកឆ្អឹង និងបញ្ហារលាកសន្លាក់ ជាពិសេសចំពោះមនុស្សវ័យចំណាស់។ ប្រូតេអ៊ីន និង វីតាមីនជ្រាបចូលទៅបំប៉នសុខភាពឆ្អឹងឱ្យមានការលូតលាស់ល្អ បណ្តុះរនាំងការពារប្រឆាំងនឹងបាក់តេរីក្នុងសារពាង្គកាយ។