មើមយ៉េន ដែលជាបន្លែ​កំពុងល្បី និងមានមនុស្សជាច្រើនជឿថា បន្លែមួយមុខនេះ មានលក្ខណៈពិសេសខ្លាំងក្លាក្នុងការចូលទៅជួយបំប៉នសុខភាពឈាម ដោយអ្នកទទួលទានអាចយកទៅធ្វើម្ហូប ញុំាឆៅ ឬក៏ស្ងោរញុំា ជាដើម​។ ទន្ទឹមនឹងនេះ បន្លែមើមយ៉េន ក៏ត្រូវបានគេយល់ថា វាអាចជួយសុខភាពបានច្រើន និងការពារកុំឱ្យកើតជំងឺរុាំរ៉ៃដែរ។

យោងតាមប្រភព healthline​ បានឱ្យដឹងថា មើមយ៉េន ដែលមានចំណុះប្រមាណជា ​១០០​​ក្រាម មានផ្ទុកទៅដោយ ជាតិដែក ៤%,​ វីតាមីនC ៤%, វីតាមីនB ៤%, ៤៤ កាឡូរី, ប្រូតេអ៊ីន ១,៧ក្រាម,​​ ខ្លាញ់ ០,២ ក្រាម, កាបូអ៊ីដ្រាត ១០ក្រាម, ជាតិសរសៃ ២ក្រាម, រួមមានជាតិរ៉ែដទៃទៀតដូចជា​ Folate​, ម៉ង់ហ្គាណែស, ទង់ដែង, ប៉ូតាស្យូម​​ និងម៉ាញ៉េស្យូម។ ជាមួយនឹងសារធាតុដ៏សម្បូរទាំងនេះ នឹងអាចចូលទៅជួយទ្រទ្រង់ដល់សុខភាពរាង្គកាយរួមមាន៖

១. ជួយរក្សាតុល្យភាព និងបញ្ចុះសម្ពាធឈាម​

តាមការសិក្សាបានបង្ហាញថា ​មើមយ៉េន​ មានសមត្ថភាពខ្ពស់ ជួយដល់អ្នកដែលមានបញ្ហាលើសឈាមដោយកម្រិតសម្ពាធឈាមកុំឱ្យឡើងខ្ពស់។ មួយវិញទៀតបន្លែនេះ អាចបន្ថយកម្រិតសម្ពាធឈាម ស៊ីស្តូលិក និង diastolic មានន័យថា ជួយទៅដល់សម្ពាធក្នុងឈាម ដែលត្រូវបានវាស់ដោយប្រើលេខពីរកម្រិត។ លេខទីមួយហៅថាសម្ពាធឈាមស៊ីស្តូលិក គឺវាស់សម្ពាធក្នុងសរសៃឈាម នៅពេលបេះដូងលោត ចំណែកលេខទីពីរហៅថាសម្ពាធឈាម diastolic គឺវាស់សម្ពាធក្នុងសរសៃឈាម នៅពេលដែលបេះដូងសម្រាកនៅចន្លោះពេលលោត។ មើមយ៉េន ក៏មានសារធាតុនីត្រាត ដែលវាបំលែងទៅជាទ្រីអុកស៊ីតផងដែរ ដែលជាម៉ូលេគុល ជួយទៅពង្រីកសរសៃឈាម ធ្វើឱ្យសម្ពាធឈាមធ្លាក់ចុះ។

២. ជួយដល់សុខភាពខួរក្បាល

សមត្ថភាពខួរក្បាល អាចថយចុះទៅតាមអាយុ​របស់យើង និងអាចវិវត្តន៍ចេញជាជំងឺវង្វេង ឆាប់ភ្លេចភ្លាំងច្រើន...ជាដើម ដោយសារតែកម្រិតរបបអាហារ និងទម្លាប់មិនប្រចាំថ្ងៃមួយចំនួន។ ហេតុនេះ​ ការទទួលទាន មើមយ៉េន នឹងផ្តល់នូវសារធាតុនីត្រាត ជួយឱ្យប្រព័ន្ធឈាមរត់ដែលហូរទៅកាន់ខួរក្បាល ធ្វើឱ្យដំណើរការល្អ ជាហេតុធ្វើឱ្យខួរក្បាលប្រព័ន្ធដំណើរការប្រសើរ។

៣. មានលក្ខណៈពន្យឺតការវិវត្តនៃជំងឺមហារីក 

នៅក្នុងមើមយ៉េន មានផ្ទុកសារធាតុ​​ពិសេសក្នុងការការពារ និង​រារាំងការកកើតនូវកោសិកាមហារីកជាច្រើនរួមមាន betaine, ferulic acid, rutin, kaempferol, and caffeic acid។ តួយ៉ាង ការសិក្សាជាច្រើនបានរកឃើញថា កម្រិត betaine ខ្ពស់ក្នុងឈាមអាចផ្សាភ្ជាប់ជាមួយនឹងការថយចុះហានិភ័យនៃការវិវត្តទៅជាជំងឺមហារីក។

៤. ជួយដល់ប្រព័ន្ធរំលាយអាហារ

មើមយ៉េន មានសមត្ថភាពជួយដល់ប្រព័ន្ធរំលាយអាហារធ្វើឱ្យពោះវៀនធំដំណើរការបានយ៉ាងល្អ ដោយ បន្លែនេះសម្បូរដោយជាតិសរសៃ មើមយ៉េន ក្នុង១ពែង មានជាតិសរសៃ ៣,៤ ក្រាម អាចជួយលើកកម្ពស់សុខភាពរំលាយអាហារ ការពារការទល់លាមក ជំងឺរលាកពោះវៀន ជាដើម។ លើសពីនេះ ជាតិសរសៃ​​ ដែលមាននេះទៅជួយ កាត់បន្ថយហានិភ័យនៃជំងឺរ៉ាំរ៉ៃ ដូចជា មហារីកពោះវៀនធំ ជំងឺបេះដូង និងជំងឺទឹកនោមផ្អែមប្រភេទទី២​។

គូសបញ្ជាក់បន្ថែមផងដែរ ប្រភេទមើមយ៉េនក្រឡុក នាពេលបច្ចុប្បន្ននេះ គឺត្រូវបានក្លាយជាជម្រើសអាហារល្អពិសេសសម្រាប់អ្នកចង់សម្រកទម្ងន់ និងថែស្បែក។ ជាទូទៅប្រភេទទឹកមើមយ៉េននេះ គឺគេភាគច្រើនទទួលទានជារៀងរាល់ព្រឹក-ល្ងាច និងជារៀងរាល់ថ្ងៃ៕

អត្ថបទដោយ៖ ប៉ែត ធីតា