មើមយ៉េន គឺជាមើមមួយប្រភេទដែលសម្បូរទៅដោយសារធាតុចិញ្ចឹម និងសារធាតុប្រឆាំងអុកស៊ីតកម្ម ដែលប្រឆាំងទៅនឹងការបំផ្លាញកោសិកា និងកាត់បន្ថយហានិភ័យនៃជំងឺបេះដូង។ ជាការពិតណាស់ មើម Beetroot ដែលអ្នកគ្រប់គ្នាតែងហៅថា មើមយ៉េននេះ គឺជាបន្លែមួយប្រភេទក្នុងចំណោមបន្លែដែលមានផ្ទុកសារធាតុbetalains ដែលជាសារធាតុប្រឆាំងអុកស៊ីតកម្មដ៏មានឥទ្ធិពលដែលធ្វើឱ្យមើមយ៉េនមានពណ៌ក្រហមឆ្អៅរស់រវើក។
បើយោងតាមប្រភព WebMD បានបញ្ជាក់ឱ្យដឹងផងដែលថា សារធាតុbetalainsដែលមាននៅក្នុងមើមយ៉េននេះមានតួនាទីក្នុងការកាត់បន្ថយការរលាក និងអាចជួយការពារប្រឆាំងនឹងជំងឺមហារីក និងជំងឺផ្សេងៗជាច្រើនមុខទៀត។ ខាងក្រោមនេះជាអត្ថប្រយោជន៍នៃមើមយ៉េនរួមមាន៖
-បង្កើនភាពធន់៖ ទឹកមើមយ៉េនមានតួនាទីជួយការពារបេះដូង និងសួតរបស់អ្នក ហើយធ្វើលំហាត់ប្រាណរួចញុំាទឹកមើមយ៉េនកាន់តែល្អចំពោះសុខភាព។ សារធាតុ nitric oxide នៅក្នុងមើមយ៉េនក៏មានតួនាទីក្នុងការបង្កើនលំហូរឈាមទៅកាន់សាច់ដុំរបស់អ្នកផងដែរ។ គួរបញ្ជាក់ថា ដើម្បីបង្កើនប្រសិទ្ធភាពនៃមើមយ៉េន អ្នកគួរតែហាត់ប្រាណរួចផឹកទឹកមើមយ៉េនមួយកែវ។
-ការពារជំងឺបេះដូង និងជំងឺដាច់សរសៃឈាមខួរក្បាល៖ មើមយ៉េនសម្បូរទៅដោយសារធាតុfolate (វីតាមីនB9) ដែលជួយដល់ដំណើរការកោសិកាលូតលាស់។ ជាមួយគ្នានេះ សារធាតុfolateមានតួនាទីសំខាន់ក្នុងការគ្រប់គ្រងការខូចខាតដល់សរសៃឈាម ដែលអាចកាត់បន្ថយហានិភ័យនៃជំងឺបេះដូង និងជំងឺដាច់សរសៃឈាមខួរក្បាល។
-បន្ថយសម្ពាធឈាមឱ្យនៅទាប៖ មើមយ៉េនមានជាតិនីត្រាតខ្ពស់ ដែលប្រែទៅជានីទ្រីកអុកស៊ីតនៅក្នុងរាងកាយ។ សារធាតុនេះមានតួនាទីបន្ថយសម្ពាធឈាមឱ្យនៅទាប។
-បង្កើនប្រព័ន្ធភាពសុំារបស់អ្នក៖ មើមយ៉េនមានជាតិសរសៃខ្ពស់ និងជំរុញដល់ការលូតលាស់នៃបាក់តេរីល្អនៅក្នុងពោះវៀនរបស់អ្នក។ ការមានបាក់តេរីល្អច្រើនក្នុងប្រព័ន្ធរំលាយអាហាររបស់អ្នក អាចជួយប្រឆាំងនឹងជំងឺ និងពង្រឹងប្រព័ន្ធភាពសុំារបស់អ្នក។ ជាតិសរសៃក៏ជួយសម្រួលដល់ការរំលាយអាហារ និងកាត់បន្ថយហានិភ័យនៃការទល់លាមកផងដែរ។
ចំណាំ៖ ថ្វីបើមើមយ៉េនមានគុណប្រយោជន៍យ៉ាងច្រើនសម្រាប់សុខភាពក្ដី ប៉ុន្តែមើមយ៉េនក៏អាចបង្កឱ្យអ្នកកើតក្រួសក្នុងតម្រងនោមផងដែរ។ ដូច្នេះប្រសិនបើអ្នកធ្លាប់មានគ្រួសក្នុងតម្រងនោម ចូរជៀសវាងការញុំាទឹកមើមយ៉េន៕
