ស្រ្តីអំឡុងពេលពពោះភាគច្រើនជួបប្រទះទៅនឹងបញ្ហាបាក់សម្រស់យ៉ាងខ្លាំង ពីព្រោះអរម៉ូនអេស្រ្តូសែនរបស់ស្រ្តីពេលពពោះមានការផ្លាស់ប្តូរខ្លាំងបណ្តាលឱ្យស្រ្តីឆាប់ខឹង មួម៉ៅ មុខមានស្នាមជាំ ពោះបែកសង្វារ ស្បែកខ្លួនប្រាណខ្មៅស្រអាប់ផងដែរ។ ដូច្នេះថ្ងៃនេះក្រុមការងារចាបបៃតងនឹងលើកយកដំណោះស្រាយបញ្ហា មុខជាំ និងសង្វារមកចែកជូនម៉ាក់ៗទាំងអស់គ្នា។

ជាការពិតណាស់ យោងតាមការណែនាំពី mayoclinic បានឱ្យដឹងថាស្រ្តីមានផ្ទៃពោះទាំងអស់ត្រូវថែទាំខ្លួនប្រាណឱ្យបានដិតដល់ បើទោះជាអំឡុងពេលពពោះអ្នកមិនអាចលាបឡេ ឬប្រើប្រាស់ថ្នាំបំបាត់សង្វារផ្សេងៗបានក៏ដោយ ប៉ុន្តែអ្នកអាចអនុវត្តវិធីសាស្រ្តធម្មជាតិទាំង ៨ ខាងក្រោមបានអំឡុងពេលពពោះមានប្រសិទ្ធភាពបំផុត៖

វិធីការពារ និងបំបាត់ជាំមុខ

១. អ្នកម្ដាយដែលកំពុងពពោះគ្រប់រូបត្រូវការពារខ្លួន ដោយចៀសពីពន្លឺព្រះអាទិត្យ ឬកម្ដៅថ្ងៃនាពេលថ្ងៃត្រង់ ពីព្រោះថាពន្លឺព្រះអាទិត្យអាចបង្កឱ្យស្បែករបស់អ្នកឡើងជាំខ្លាំង។ ដូច្នេះប្រសិនបើអ្នកចេញក្រៅត្រូវប្រើឡេការពារកម្ដៅថ្ងៃសម្រាប់អ្នកមានផ្ទៃពោះដែលមានការណែនាំពីវេជ្ជបណ្ឌិត ឬស្លៀកសម្លៀកបំពាក់ឱ្យបានជិតៗជាដើម។

២. ត្រូវញុំាទឹក ៨កែវក្នុងមួយថ្ងៃ(២លីត្រកន្លះទៅ៣លីត្រ) ដើម្បីបង្កើនសំណើមលើស្បែក និងរក្សាអរម៉ូនឱ្យបានល្អប្រសើរ។

៣. ត្រូវលាងសម្អាតផ្ទៃមុខពី ២ ទៅ ៣ដងក្នុងមួយថ្ងៃ ដើម្បីកម្ចាត់ខ្លាញ់លើមុនរបស់អ្នក ហើយការទម្លាប់ធ្វើបែបនេះនឹងជួយឱ្យស្បែកមុខរបស់អ្នកមានសំណើម ស្រស់ស្អាត និងមានអនាម័យ។ ចៀសវាងប្រើផលិត ស្ក្រាប់មុខ និងថ្នាំបំបាត់ជាំផ្សេងៗដោយគ្មានការណែនាំពីវេជ្ជបណ្ឌិតជំនាញដាច់ខាត។

៤. គេងឱ្យបានគ្រប់គ្រាន់៨ម៉ោងក្នុងមួយថ្ងៃ ដើម្បីរក្សាស្បែករបស់អ្នកឱ្យមានតុល្យភាព ពីព្រោះថាប្រសិនបើអ្នកគេងមិនបានគ្រប់គ្រាន់នោះទេ​ នោះវានឹងធ្វើឱ្យស្បែកឆាប់ចាស់ ជ្រីវជ្រួញ។

៥. ត្រូវញុំាបន្លែបៃតង ឬបន្លែសម្បូរជាតិដែកឱ្យបានគ្រប់គ្រាន់ ដើម្បីបង្កើនសម្រស់ស្បែក និងល្អចំពោះសុខភាពរបស់កូន។

វិធីការពារ និងបំបាត់ស្នាមសង្វារ

១. ត្រូវលាបប្រេងសម្បូរជាតិវីតាមីន E(សម្រាប់ស្រ្តីមានផ្ទៃពោះ) ឬប៊ឺ ផ្លែកាកាវ ដើម្បីបំបាត់ស្នាមសង្វារលើស្បែករបស់អ្នក។

២. ត្រូវញុំាអាហារឱ្យបានទៀងទាត់ទាន់ពេលវេលា ដើម្បីការពារស្បែករបស់អ្នកក្រោយពេលសម្រាលកុំឱ្យមានភាពជ្រីវជ្រួញឬបែកសង្វារ។

៣. ត្រូវលាបប្រេងដូងចាប់ពីពេលមានផ្ទៃពោះខែដំបូងរហូតដល់កើត ពីព្រោះប្រេងដូងជាប្រេងដ៏ល្អបំផុតក្នុងចំណោមប្រេងទាំង ៨ប្រភេទដែលវាជួយទប់ទល់ និងបំបាត់បញ្ហាសង្វារយ៉ាងមានប្រសិទ្ធភាព។ បញ្ជាក់៖ អ្នកត្រូវរកទិញប្រេងដូងដែលមានប្រភពច្បាស់លាស់ ធម្មជាតិ និងច្បាស់ថាមិនមានសារធាតុអ្វីប៉ះពាល់ដល់កូន។

គូសបញ្ជាក់ផងដែរថា ដើម្បីឱ្យដឹងពីវិធីការពារ ស្នាមជាំ និងសង្វារអំឡុងពេលពពោះកាន់តែច្បាស់ ចាបបៃតងសូមទឹកចិត្តឱ្យអ្នកម្ដាយគ្រប់រូបត្រូវពិគ្រោះជាមួយវេជ្ជបណ្ឌិតឯកទេស ដើម្បីបង្កើនប្រសិទ្ធភាពក្នុងការថែរក្សាស្បែករបស់អ្នកឱ្យបានល្អប្រសើរ ដូចជាការហាត់ប្រាណ ការញុំាវីតាមីន និងការគេងឱ្យបានគ្រប់គ្រាន់ជាដើម៕

 អត្ថបទដោយ៖ មឿន គន្ធា