រោគអាការចម្លែកចាប់ផ្តើមប្រែប្រួលក្នុងរយៈពេលខ្លី ដោយគ្រាន់ទម្លាក់ខ្លួនគេងលើផ្ទៃរាបស្មើរប្រែចេញជាថប់ដង្ហើម ស្ទះក្នុងទ្រូងដូចជាមានអ្វីមកសង្កត់ រួមជាមួយនឹងអារម្មណ៍ច្របូកច្របល់ផងនោះ សូមកុំប្រហែសឱ្យសោះ ព្រោះនេះគឺជារោគសញ្ញាដំបូងបង្អស់នៃបញ្ហាជំងឺថប់បារម្ភ។
ជំងឺថប់បារម្ភ គឺជាស្ថានភាពអារម្មណ៍តានតឹងមួយប្រភេទដែលបណ្ដាលឱ្យអ្នកជំងឺមានការភ័យខ្លាច តប់ប្រមល់ អារម្មណ៍មិនស្ងប់ ពិបាកសម្រេចចិត្ត គិតច្រើន និងការមិនសប្បាយចិត្ត។ បញ្ហាជំងឺនេះ អាចបណ្ដាលមកពីជានៃផលប៉ះពាល់ពីស្ថានភាពតានតឹងពេក ដែលជះឥទ្ធិពលមកពីកត្តាការងារ ការសិក្សា គ្រួសារ និងមជ្ឈដ្ឋានជុំវិញ...។ (នេះបើយោងទៅតាមប្រភពចេញផ្សាយរបស់គេហទំព័រ mayoclinic)
រោគសញ្ញានៃជំងឺថប់បារម្ភជាទូទៅរួមមាន៖
- អារម្មណ៍ភ័យ ថប់ៗដង្ហើម ឬស្ទះៗក្នុងទ្រូង
- មានអារម្មណ៍ថានឹងមានគ្រោះថ្នាក់ ឆាប់ភ័យស្លន់ស្លោរ ឬមានអត្រាចង្វាក់បេះដូងលោតកើនឡើង
- ដកដង្ហើមលឿន (hyperventilation) ប្រៀបដូចខ្វះខ្យល់អុកស៊ីសែន
- បែកញើស ញ័រដៃជើង គ្មានមូលហេតុ
- មានអារម្មណ៍ខ្សោយ ឬអស់កម្លាំង
- មានបញ្ហាក្នុងការផ្តោតអារម្មណ៍ ឬគិតអំពីអ្វីផ្សេងក្រៅពីការបារម្ភបច្ចុប្បន្ន
- មានបញ្ហាក្នុងការគេង ពិបាកគ្រប់គ្រងដំណេក (ភាគច្រើនថប់ដង្ហើមពេលទម្លាក់ខ្លួនគេង)
- ជួបប្រទះបញ្ហាក្រពះពោះវៀន
- ពិបាកគ្រប់គ្រងអារម្មណ៍ខ្លួនឯង ...។
ប្រភេទជំងឺថប់បារម្ភត្រូវបានគេបែងជាច្រើនប្រភេទ៖
- Agoraphobia (ag-uh-ruh-FOE-be-uh)៖ ភ័យខ្លាច ភ័យស្លន់ស្លោ មានអារម្មណ៍ថាគាំងៗ អស់សង្ឃឹម ឬខ្មាស់អៀន។
- ថប់បារម្ភដោយសារតែស្ថានភាពសុខភាពរាងកាយ
- ជំងឺថប់បារម្ភទូទៅ រួមមានការថប់បារម្ភជាប់រហូត ហួសហេតុ និងការបារម្ភអំពីសកម្មភាព ឬព្រឹត្តិការណ៍នានា សូម្បីតែបញ្ហាធម្មតា និងទម្លាប់ក៏ដោយ
- ថប់បារម្ភដោយសារអារម្មណ៍មិននឹងន ធ្វើឱ្យពិបាកដកដង្ហើម ឈឺទ្រូង ឬបេះដូងលោតញាប់
- ថប់បារម្ភដោយសារភាពបរាជ័យ និងមជ្ឈដ្ឋានជុំវិញ ជះឥទ្ធិពលមកពីសង្គម និងមជ្ឈដ្ឋានជុំវិញ
- ជំងឺថប់បារម្ភកើតឡើងងដោយសារការបាត់បង់...។
គួរបញ្ជាក់បន្ថែមដែរថា ក្នុងករណីប្រសិនណាបើមានបញ្ហាថប់បារម្ភដែលកើតចេញពីរោគសញ្ញាដូចដែលរៀបរាប់ខាងលើសូមប្រញាប់ទៅរកគ្រូពេទ្យចិត្តសាស្ត្រប្រឹក្សាយោបល់ ដើម្បីដោះស្រាយឱ្យបានទាន់ពេលវេលា បើមិនដូច្នោះទេ ស្ថានភាពថប់បារម្ភនេះ នឹងវិវត្តន៍ទៅជារុំារ៉ៃ អាចធ្លាក់ចូលក្នុងស្ថានភាពបាក់ទឹកចិតត្ត៕
អត្ថបទដោយ៖ ប៉ាវ ភក្តី