ជឿថាចំពោះការគេង មនុស្សគ្រប់គ្នានរណាក៏ចេះដែរ គ្រាន់តែបិទភ្នែកសោះទោះគេងអង្គុយក៏លក់ដែរឱ្យតែងងុយ។ ប៉ុន្តែបើសិក្សាឱ្យលម្អិតទៅ ការគេងគឺជារឿងសំខាន់បំផុត ជាពិសេសចំពោះសម្រស់ផ្ទាល់តែម្តង។ ប្រសិន មនុស្សម្នាក់មានរបៀបគេងខុស នោះនឹងធ្វើឱ្យវ័យ ក៏ដូចជាសម្រស់របស់ពួកគេឆាប់ចាស់ជ្រីវជ្រួញ ជាពិសេសគឺស្បែកមុខ។ ចង់ដឹងថាគេគេងបែបណាទើបអាចពន្យាភាពចាស់ និងស្នាមជ្រីវជ្រួញកុំឱ្យកើតនៅលើមុខបាន តោះអានអត្ថបទខាងក្រោម។

យោងតាមការបញ្ជាក់ពីគេហទំព័រ everydayhealth បានឱ្យដឹងថា របៀបបែបបទឥរិយាបទនៃការគេងរបស់មនុស្សម្នាក់ៗគឺខុសៗពីគ្នា អ្នកខ្លះចូលចិត្ត គេងចំហៀង ខ្លះគេងផ្ងារ ខ្លះគេងផ្កាប់ ទៅតាមទម្លាប់របស់ពួកគេ។ ប៉ុន្តែនៅក្នុងទម្លាប់ទាំងអស់នេះគឺមានទម្លាប់ខ្លះមិនល្អនោះទេ ហើយអ្នកគួរតែបញ្ឈប់ទម្កាប់មិនល្អទាំងនោះចោល បើមិនចង់ឱ្យស្បែកមុខជ្រីវជ្រួញមុនអាយុ។ ដូច្នេះរបៀបគេងដើម្បីបង្កើនសម្រស់ និងការពារស្បែកមុខកុំឱ្យជ្រីវជ្រួញសូមគេងតាមរបៀបខាងក្រោម៖

១. គេងឱ្យត្រង់ខ្លួន៖ ការគេងត្រង់ខ្លួន គឺវាជួយធ្វើឱ្យរចន្តឈាមនៅក្នុងខ្លួនរបស់អ្នករត់បានល្អ និងបញ្ជូនឈាមទៅគ្រប់សារពាង្គកាយនៅក្នុងខ្លួន ជួយធ្វើឱ្យស្បែកមានសុខភាពល្អ និងមិនងាយជ្រីវជ្រួញផងដែរ។

២. ហាមគេងចំហៀង៖ អ្នកមិនត្រូវគេងចំហៀង ឬគេងផ្កាប់មុខជាដាច់ខាត ពីព្រោះការគេងបែបនេះប្រៀបដូចជាអ្នកបានដាក់បន្ទុកទៅលើផ្ទៃមុខរបស់អ្នកអ៊ីចឹង។ នៅពេលដែលអ្នកគេងចំហៀង គឺធ្វើឱ្យស្បែកមុខរបស់អ្នកទៅផ្អឹបជាប់ជាមួយស្រោមខ្នើយ ហើយទម្ងន់ផ្នែកក្បាល និងផ្នែកខ្លួនខាងលើរបស់អ្នកត្រូវបានទ្រដោយផ្ទៃមុខ ជាហេតុធ្វើឱ្យស្បែកមុខឆាប់កើតនូវស្នាមជ្រួញ និងទៅជាជាំបានប្រសិនជាអ្នកមិនបញ្ឈប់គេងចំហៀងទេនោះ។ មួយវិញទៀត ការគេងចំហៀង ឬគេងផ្កាប់មុខ គឺវាធ្វើឱ្យរចន្តឈាមរបស់អ្នករត់មិនបានល្អនោះទេ ជាហេតុធ្វើឱ្យប៉ះពាល់ទៅដល់សុខភាពផងដែរ។

៣. ការជ្រើសរើសស្រោមខ្នើយ៖ ស្រោមខ្នើយដែលល្អ និងមិនធ្វើឱ្យប៉ះពាល់ទៅដល់ស្បែកមុនគឺជាស្រោមខ្នើយដែលធ្វើអំពីកប្បាសឬសរសៃសូត្រ ដែលមានសភាពទន់ និងរលោង។ ប្រសិនជាអ្នកមិនអាចទិញស្រោមខ្នើយកប្បាសឬសូត្រមិនបាន អ្នកអាចប្រើស្រោមខ្នើយប្រភេទផ្សេងក៏បានឱ្យតែមានសភាពទន់រលោង មិនធ្វើឱ្យកកិតស្បែក។ មួយវិញទៀត ការសម្អាតស្រោមខ្នើយគឺសំខាន់បំផុត ១សប្តាហ៍ត្រូវបោកស្រោមខ្នើយយ៉ាងហោចណាស់ក៏២ដងដែរដើម្បីកម្ចាត់ជាតិកខ្វក់និងធូលីដីដែលទុំជាប់។

៤. របៀបប្រើផលិតផលមុនចូលគេង៖ ការថែរក្សាស្បែកមុខនៅពេលយប់គឺសំខាន់បំផុត ពីព្រោះស្បែកមុខរបស់អ្នកកត្រូវរងជាមួយកម្តៅថ្ងៃ ជាតិកខ្វក់ និងធូលីដីពេញមួយថ្ងៃហើយ ដូច្នេះពេលយប់ជាពេលដែលត្រូវស្រោចស្រង់និងព្យាបាលស្បែកមុខមកវិញ។ អ្នកគួរជ្រើសប្រើផលិតផលដែលមានសារធាតុផ្សំចេញពីវីតាមីនA និងវីតាមីន C ឱ្យបានច្រើនបំផុតពីព្រោះវាមានតួនាទីជួយជួសជុលស្បែកដែលខូចដោយសារកម្តៅថ្ងៃឬជាតិកខ្វក់ឱ្យប្រសើរឡើងវិញ។ ជួយបង្កើនការផលិតខូឡាជែលដល់ស្បែក បង្រួមរន្ធញើស និងការពារកុំឱ្យមានស្នាមជ្រីវជ្រួញ រួមទាំងពន្យាភាពចាស់ផងដែរ។

៥. គេងឱ្យបាន៧ទៅ៩ម៉ោង៖ ដើម្បីគេងបានរយៈពេល៧ទៅ៩ម៉ោងក្នុង១យប់ អ្នកត្រូវចូលគេងចាប់ពីម៉ោង៩ដល់ម៉ោង៥ព្រឹក ឬចាប់ពី១០យប់ដល់ម៉ោង៦ព្រឹក។ ការគេងពេញម៉ោង និងគ្រប់គ្រាប់បែបនេះគឺជួយធ្វើឱ្យស្បែករបស់យើងមានពេលសម្រាកបានគ្រប់គ្រាន់ សុខភាពល្អ និងពន្យាភាពចាស់បានមួយកម្រិតផងដែរ។

គូសបញ្ចាក់ផងដែរថា បន្ទាប់ពីបានដឹងពីទម្លាប់ខាងលើហើយ តើរាល់ថ្ងៃអ្នកមានទម្លាប់ដូចដែលបានរៀបរាប់ខាងលើដែរឬទេ? ប្រសិនជាអ្នកមានទម្លាប់ល្អគួរបន្តធ្វើ ប៉ុន្តែប្រសិនជាអ្នកមានទម្លាប់អាក្រក់អ្នកគួរបញ្ឈប់វាភ្លាម ពីព្រោះវាមានតែធ្វើឱ្យអ្នកទទួលផលមិនល្អ។ កុំភ្លេចណា រាល់យប់អ្នកមានទម្លាប់គេងបែបណា ចាំប្រាប់អេតមីនក្នុងខមិនផង៕

អត្ថបទដោយ៖ មឿន គន្ធា