ទម្លាប់ថែស្បែកនៅពេលព្រឹកជាកត្តាសំខាន់សម្រាប់មនុស្សគ្រប់រូប ប្រសិនជាអ្នកថែស្បែកបានត្រឹមត្រូវ ធ្វើឱ្យស្បែករបស់អ្នកមានសុខភាពល្អ ក្មេងជាងវ័យ បានមួយផ្នែកធំ។ ប៉ុន្តែបើអ្នកមិនចេះពីរបៀបថែទេ ស្បែករបស់អ្នកនឹងប្រឈមជាមួយស្នាមជ្រីវជ្រួញមុនអាយុមិនខាន។

យោងតាមណែនាំពី healthline បានបញ្ជាក់ឱ្យដឹងថា ទម្លាប់៤នៅពេលព្រឹកសម្រាប់ថែស្បែក មនុស្សគ្រប់គ្នាត្រូវតែធ្វើ ប្រសិនជាចង់បានស្បែកស្អាត តឹងណែន និងក្មេងជាងវ័យ៖

ជំហ៊ានទី១៖ ពេលព្រឹកអ្នកត្រូវលាងសម្អាតមុខដំបូងគេបង្អស់ ពីព្រោះធូលី បាក់តេរីដែលទុំជាប់ជាមួយកន្លែងគេងរបស់អ្នក វានឹងមកទុំជាប់លើមុខរបស់អ្នក ហើយបើអ្នកមិនបានលាងសម្អាតឱ្យស្អាតទេវាបង្កទៅជាមុន និងស្នាមអុចខ្មៅមិនខាន។

ជំហ៊ានទី២៖ បន្ទាប់ពីលាងមុខរួច អ្នកត្រូវយកទឹកថូណឺមកជូតមុខរបស់អ្នកម្តងទៀត ដើម្បីច្បាស់ថាមុខរបស់អ្នកជ្រះល្អ មិនមានបាត់តេរីឬមេរោគនៅលើស្បែក។

ជំហ៊ានទី៣៖ បន្ទាប់ពីអ្នកច្បាស់ថាមុខរបស់អ្នកជ្រះល្អហើយ អ្នកចាំបាច់ត្រូវតែលាបសេរ៉ូមដើម្បីការពារ និងផ្តល់សំណើមទៅដល់ស្បែកមុខ។ មនុស្សជាច្រើនមិនសូវចាប់អារម្មណ៍ក្នុងការប្រើប្រាស់សេរ៉ូមទេ ប៉ុន្តែជាក់ស្តែងសេរ៉ូមគឺមានសារសំខាន់ណាស់សម្រាប់ស្បែកមុខនៅពេលព្រឹក វាមានតួនាទីជួយចិញ្ចឹមស្បែក ការពារស្បែកពីការប្រតិកម្មរបស់ឡេឬម្សៅ។

ជំហ៊ានទី៤៖​ បន្ទាប់ពីលាបសេរ៉ូមរួច អ្វីដែលអ្នកមិនអាចខ្វះបាននៅពេលព្រឹកគឺឡេការពារកម្តៅថ្ងៃ។ អ្នកមិនអាចខ្វះឡេការពារកម្តៅថ្ងៃបានទេបើទោះជាអ្នកធ្វើការនៅកន្លែងម្លប់ក៏ដោយ។ វេជ្ជបណ្ឌិតជាច្រើនតែងណែនាំថា ប្រសិនជាអ្នកធ្វើការនៅកម្លែងម្លប់ កន្លែងម៉ាស៊ីនត្រជាក់ អ្នកគប្បីប្រើឡេការពារកម្តៅថ្ងៃដែលមាន SPF 30 ដោយឡែកចំពោះអ្នកដែលធ្វើការត្រូវកម្តៅថ្ងៃខ្លាំងគប្បីប្រើឡេការពារកម្តៅថ្ងៃដែលមានកម្រិត SPF ៥០ បូកឡើងទៅ។

គូសបញ្ជាក់ផងដែរថា ប្រសិនជាអ្នកចង់ថែរក្សាស្បែកមុខរបស់អ្នកឱ្យនៅក្មេង គ្មានមុន គ្មានជាំ និងអាចម៌រុយ អ្នកត្រូវអនុវត្តវិធីថែស្បែកពេលព្រឹកទាំង ៤ខាងលើជារៀងរាល់ថ្ងៃ។ ចង់ដឹងថាបានផលឬអត់ អ្នកអាចសាកល្បងធ្វើបែបនេះរយៈពេលចាប់ពី ១ខែ ទៅ២ខែអ្នកនឹងដឹងមិនខាន៕

អត្ថបទដោយ៖ មឿន គន្ធា