បើតាមលោក Brain Tracy ជាបុគ្គលឆ្នើមផ្នែកអ្នកចិត្តសាស្រ្តបាននិយាយថា “ទម្លាប់ពេលព្រឹកជាអ្នកកំណត់វាសនាអារម្មណ៍របស់មនុស្សយើងពេញមួយថ្ងៃតែម្តង។ អារម្មណ៍ពេលព្រឹកបែបណា មួយថ្ងៃហ្នឹងអារម្មណ៍ក៏ចាប់ផ្តើមបន្តគ្នាដែរ។ នេះជាឥទ្ធិពទម្លាប់លពេលព្រឹក ពេលអ្នកធ្វើ ៤ចំណុចនេះ ដូចអ្នកដកបន្លាអារម្មណ៍អវិជ្ជមានចេញផ្លូវចិត្តដែរ។
១.ការមានហេតុផល ដើម្បីក្រោកពីគេង៖ តាមលោក Hector Garcia និងលោក Francesc Miralles ជាអ្នកស្រាវជ្រាវកោះអូគីណាវ៉ា បានរកឃើញថា “ប្រជាជនប៉ុននៅទីនោះមានអាយុវែង និងក្រោកពីគេងនៅពេលព្រឹកព្រលឹមបានយ៉ាងឆាប់រហ័សបំផុត ព្រោះតែក្នុងអារម្មណ៍ពួកគេមានហេតុផលប្រើជីវិតពេញមួយថ្ងៃ ជាប្រយោជន៍ដល់សង្គមរបស់ពួកគេដែរ”។ ងាយយល់ណាស់ បើអ្នកជំពាក់លុយ ហេតុផលនេះ ធ្វើឱ្យឆាប់ភ្ញាក់ពីគេងទៅធ្វើការងារ យកលុយមកសងគេ។ នៅត្រង់នេះ ខ្ញុំចង់បញ្ជាក់ថា អារម្មណ៍មានហេតុផលគឺវាបែបហ្នឹងឯង។
២. ពេលភ្ញាក់ពីគេងញ៉ាំទឹក១កែវសិន៖ ការញ៉ាំទឹកមួយកែវនេះ ពេលអ្នកក្រោកពីគេងមិនត្រឹមតែរាងកាយអ្នកទេ ជួយជម្រុះជាតិពុលចេញពីរាងកាយផងដែរ។ គ្រាន់តែអ្នកតាមដានអារម្មណ៍អ្នកក្រេបជាតិទឹក១កែវពេលព្រឹក ខ្ញុំជឿថា អ្នកនឹងមានអារម្មណ៍ប្លែកគឺអារម្មណ៍ត្រជាក់ចិត្ត។ ព្រោះរាងកាយរបស់អ្នកបានសម្រាកពេញមួយយប់ហើយ វាត្រូវការជាតិទឹក ដើម្បីដាស់អារម្មណ៍ស្រស់ថ្លា កុំឱ្យអ្នកជំងឺឈឺក្បាលផងដែរ។
៣. រីករាយជាមួយកាហ្វេ១កែវ៖ មានមនុស្សច្រើនណាស់ដែលរីករាយជាមួយការផឹកកាហ្វេនៅពេលព្រឹក។ តាមការសិក្សាពី The Time of India បច្ចុប្បន្ននេះមានមនុស្សរាប់ពាន់លាននាក់ចាប់ផ្តើមថ្ងៃថ្មីរបស់ពួកគេ ដោយប្រើកាហ្វេ។ កាហ្វេ អាចជួយឱ្យពួកគេមានថាមពល ខួរក្បាលស្វាងពីងងុយគេង គិតបានរហ័ស និងលែងស្ពឹកស្រពន់។ ជាមួយគ្នានេះ កាហ្វេក៏អាចជួយកាត់បន្ថយចំណង់អាហារ ដែលអាចជំនួយឱ្យការសម្រកគីឡូ ថែរាង កាន់តែមានប្រសិទ្ធភាព។ ប៉ុន្តែបើផឹកកាហ្វេផ្អែម ប្រហែលជាមិនសូវជាល្អសម្រាប់អ្នកសម្រកគីឡូប៉ុន្មានទេ។
៤. អ្នកត្រូវគិតថា ថ្ងៃថ្មី៖ តាមសារព័ត៌មាន Entrepreneur បានចុះផ្សាយថា “ពេលអ្នកភ្ញាក់ពីគេង អ្នកត្រូវស្រមៃគិតថា ថ្ងៃនេះ ជាថ្ងៃថ្មី ឱ្យរឿងអាក្រក់ៗ ទៅតាមអតីតកាល។ ហើយជារៀងរាល់ ជាការចាប់ផ្តើមជីវិតថ្មី ជាឱកាសល្អ ដើម្បីឆ្ពោះទៅមុខ... ពាក្យទាំងនេះធ្វើឱ្យមានអារម្មណ៍សុខ បើអ្នកស្រមៃពាក្យលើកត្រឹមតែ ៣ ទៅ៥នាទី ហើយចាំក្រោកពីគ្រែរបស់អ្នក”៕ អត្ថបទដោយ៖ ទ្រ សុភាព