នៅពេលចាប់ផ្ដើមពពោះស្រ្តីគ្រប់រូបគួរតែដឹងពីការថែទាំ​កូននៅក្នុងផ្ទៃ​ដើម្បីឱ្យគេលូតលាស់ប្រកបដោយសុខភាពមាំមួនល្អ ខួរក្បាលឆ្លាតវៃ មានរូបរាងកាយពេញលេញមិនខុសប្រក្រតី។ មូលហេតុទាំងនេះហើយស្រ្តីគ្រប់រូបគួរតែដឹងឱ្យបានច្បាស់ពីអ្វីដែលគួរធ្វើ និងគួរតែចៀសវាងដាច់ខាត បើមិនចង់ប៉ះពាល់ដល់កូននៅក្នុងផ្ទៃ​ អាចសម្រាលមុនខែឬក៏រលូតកូនឡើងមកដែលធ្វើឱ្យមានវិប្បដិសារីនៅក្នុងជីវិត។

ផ្សារភ្ជាប់ជាមួយបញ្ហានេះហើយទើបក្រុមការងារចាបបៃតង សូមលើកយកអ្វីដែលស្រ្តីគួរតែចៀសវាងនិង​គួរធ្វើអំឡុងពេលមានផ្ទៃពោះមកបង្ហាញឱ្យស្រ្តីមានផ្ទៃពោះគួរតែដឹង។ ដោយយោងតាមរយៈគេហទំព័រhealthlineបានបញ្ជាក់ឱ្យដឹងថាអ្វីដែលស្ត្រីមានផ្ទៃពោះគួរចៀសវាងមានដូចជា៖

១.គ្រឿងស្រវឹង៖ អំឡុងពេលមានផ្ទៃពោះដាច់ខាតស្រ្តីមិនគួរទទួលទានគ្រឿងស្រវឹងឡើយ ទោះបីតិចតួចក៏ដោយក្ដីព្រោះគ្រឿងស្រវឹងអាចធ្វើឱ្យទារកនៅក្នុងផ្ទៃមានបញ្ហា ដូចជា ខ្វះទម្ងន់​ អាចពិការអវយវៈ​ មានបញ្ហាអាកប្បកិរិយា និយាយស្ដីជាដើម។ ដូច្នេះហើយប្រសិនបើអ្នកកំពុងតែមិនអាចបញ្ឈប់ការផឹកស្រាបានទេ ប្រញាប់រកជំនួយកាន់តែលឿនកាន់តែល្អសម្រាប់សុខភាពកូននៅក្នុងផ្ទៃ។

២.អាហារឆៅ៖ ដូចជាសាច់ឆៅ ស៊ុតឆៅ បន្លែឆៅ គ្រឿងសមុទ្រឆៅ… ស្រ្តីមានផ្ទៃពោះគួរតែចៀសវាងព្រោះអាចមានផលប៉ះពាល់ដល់កូននៅក្នុងផ្ទៃបានអាចបង្កឱ្យកូនកើតមិនគ្រប់ខែ ឬអាចនឹងរលូតក៏មានដែរ ដូច្នេះសូមចៀសវាង។

៣.កុំជក់បារី៖ ការសិក្សាមួយបាននិយាយថា ស្រ្តីដែលមានទម្លាប់ជក់បារីអំឡុងពេលមានផ្ទៃពោះអាចមានហានិភ័យខ្លាំងណាស់ចំពោះទារកនៅក្នុងផ្ទៃបាន​ បណ្ដាលឱ្យកូនខ្វះទម្ងន់ អាចឈានដល់ពិការសរីរាង្គកាយ។

៤. កាហ្វេ៖ មានជាតិកាហ្វេអ៊ីន ដែលអាចឆ្លងកាត់ទងសុកយ៉ាងឆាប់រហ័ស ។ កម្រិតនៃជាតិ caffeine ខ្ពស់ អាចបង្អាក់ការលូតលាស់របស់កូន​ក្នុងផ្ទៃ និងបង្កហានិភ័យខ្ពស់ ក្នុងការសម្រាលកូនមិនគ្រប់ទម្ងន់​។

អ្វីដែលស្រ្តីមានផ្ទៃពោះគួរធ្វើ៖

១.គេងឱ្យបានគ្រប់គ្រាន់៖ការផ្លាស់ប្ដូរអរម៉ូន ស្ត្រេស គិតច្រើនអាចធ្វើឱ្យស្រ្តីមានផ្ទៃពោះពិបាកនៅក្នុងការគេង ដូច្នេះគួរតែព្យាយាម គេងឱ្យបានគ្រប់គ្រាន់​ដើម្បីធ្វើឱ្យរាងកាយបានធូរស្បើយមានកម្លាំង​កំហែង មិនស្លេកស្លាំង ហត់នឿយដែលជាហេតុធ្វើឱ្យប៉ះពាល់ដល់កូនក្នុងផ្ទៃបានប្រសិនណាគេងមិនគ្រប់គ្រាន់។

២.ញុំាប្រភេទវីតាមីន៖​ដូចជាថ្នាំគ្រាប់ជាតិដែក​ កាល់ស្យូម វីតាមីនឌី …ដែលវីតាមីនទាំងអស់នេះហើយស្រ្តីមានផ្ទៃពោះមិនគួររំលងឡើង​​ព្រោះវាបានធ្វើឱ្យរាងកាយស្រ្តីនិងទារកនៅក្នុងផ្ទៃមានសុខភាពល្អ មិនធ្វើឱ្យស្រ្តីស្លេកស្លាំង​អស់កម្លាំង ជួយឱ្យទារកលូតលាស់ប្រកបដោយសុខភាពល្អ ។

៣.បន្លែបៃតង៖ វាមានផ្ទុកវីតាមីន ស៊ី កាល់ស្យូម ជាតិដែក ម៉ាញេស្យូម វីតាមីន k និងប៉ូតាស្យូម ដែលជួយដល់កូនក្នុងផ្ទៃមានសុខភាពល្អ និងមាំមួន។ ជាពិសេសវាជួយដល់ប្រព័ន្ធរំលាយអាហាឲ្យមានដំណើរការល្អងាយស្រួលក្នុងការបន្ទោរបង់។

៤.ទឹក៖ ការញុំាទឹកឲ្យបានគ្រប់គ្រាន់គឺជួយដល់សារពាង្គកាយពីការហេវ ហត់អស់កម្លំាង និងផ្ដល់ឲ្យស្បែកមានសំណើម មិនថែមទាំងប៉ុណ្ណោះវាជួយឲ្យប្រព័ន្ធរំលាយអាហារមានដំណើរការបានល្អ និងលាងសម្អាតជាតិពុលពីក្នុងខ្លួនបានថែមទៀតផង។ បរិមាណនៃការញុំាទឹកឲ្យបានត្រឹមត្រូវគឺ២ លីត្រឡើងទៅ។ 

ជាការពិតណាស់ មុនពេលមានផ្ទៃពោះស្រ្តីគួរតែដឹង អ្វីដែលគួរតែចៀសវាងនិងគួរធ្វើដើម្បីឱ្យកូន​នៅក្នុងផ្ទៃឱ្យមានសុខភាពល្អ ក៏ដូចជាមិនបង្កជាផលប៉ះពាល់ដល់កូន ដោយសារមិនដឹង។

អត្ថបទដោយ៖ប៉ែត​ ធីតា