ថ្ងៃនេះជាថ្ងៃពិសេសទិវាបុណ្យនៃក្តីស្រឡាញ់ វាមិនមែនស្ថិតលើតែដៃគូតែមួយមុខនោះទេ អ្នកគួរតែផ្តល់ក្តីស្រឡាញ់ទៅកាន់ឪពុកម្តាយ កូនប្រពន្ធ បងប្អូន មិត្តភក្តិ និងក្រុមការងារជាដើម។ ប៉ុន្តែនៅអត្ថបទនេះខ្ញុំសុំលើកពីបុរសគួជូនវត្ថុ ឬរបស់អ្វីខ្លះទៅកាន់នារីក្នុងទិវានៃក្តីស្រឡាញ់នេះ។ ជាពិសេសបុរសៗ កុំយកថ្ងៃនេះជាថ្ងៃចំណេញលើនារីខុសក្រមសីលធម៌របស់ខ្មែរយើងអី។ ក្តីស្រឡាញ់ជាភាពស្មោះត្រង់ដ៏មានតម្លៃក្នុងភាពជាដៃក្នុងជីវិត។

បុរសៗ គួរតែជូនរបស់មានតម្លៃឱ្យបេះដូងនារីរំភើបបំផុតគឺផ្កា។ ផ្តាតំណាងឱ្យភាសានៃបេះដូងជាក្តីស្រឡាញ់ទៅកាន់នារីដ៏មានតម្លៃក្នុងជីវិតរបស់អ្នក។ តាមគេហទំព័អន្តរជាតិ forbes បានចុះផ្សាយថា នៅក្នុងឱកាសទិវាបុណ្យនៃសេចក្តីស្រឡាញ់ អ្នកគួរតែទិញអំណោយណាមួយតាមលទ្ធភាពអាចទិញបាន ឬធ្វើដោយខ្លួនឯង តែវាពិតមានអត្ថន័យចេញពីបេះដូងរបស់អ្នកទៅនារី។ អ្នកអាចវេចខ្ជប់កាដូដូចជាផ្កាកុលាប ជាសៀវភៅ ជាកាបូប និងឆាតជូនពរជាកំណាព្យនៃក្តីស្រឡាញ់ក៏បានដែរ។ បើអ្នកទិញកាដូផ្គាប់ចិត្តនារីលើសពីសមត្ថភាពរបស់ខ្លួនខ្លាំងពេក វាបែបជាការដាក់សម្ពាធលើខ្លួនឯងទៅវិញ នេះមិនមែនគេហៅក្តីស្រឡាញ់នោះទេ។  

សូម្បីតែអ្នកគ្រូ គីម ស៊ីដដាវីស ជាអ្នកនិពន្ធនិងជាអ្នកផលិតមាតិកាលើបណ្តាញបានបានសរសេរថា ចូរប្រើប្រាស់ក្តីស្រលាញ់ឱ្យបានត្រឹមត្រូវ(ទិវាបុណ្យនៃក្តីស្រឡាញ់)

- កុំប្រើក្តីស្រលាញ់ដែលអ្នកមាន ដាក់សម្ពាធខ្លួនឯង និងមនុស្សដែលខ្លួនឯងស្រលាញ់។

- កុំប្រើក្តីស្រលាញ់ដែលអ្នកមាន បង្កើតបញ្ហាឱ្យខ្លួនឯង និងមនុស្សដែលខ្លួនឯងស្រលាញ់។

- កុំប្រើក្តីស្រលាញ់ដែលអ្នកមាន ធ្វើឱ្យបាត់បង់កត្តិយសខ្លួនឯង និងមនុស្សដែលខ្លួនឯងស្រលាញ់។

- កុំប្រើក្តីស្រលាញ់ដែលអ្នកមាន បង្ករភាពឈឺចាប់ឱ្យខ្លួនឯង និងមនុស្សដែលខ្លួនឯងស្រលាញ់។

ចូរកុំយកការស្រលាញ់ដែលខ្លួនមានចំពោះអ្នកណាម្នាក់មកបំផ្លាញជីវិតខ្លួនឯង ឬបំផ្លាញជីវិតមនុស្សដែលខ្លួនឯងស្រលាញ់ឱ្យសោះណា! រីករាយថ្ងៃនៃសេចក្តីស្រលាញ់។

តាមកំពូលតារាចម្រៀងលោកស្រី ឱក សុគន្ធកញ្ញា បានសរសេរសារខ្លីមួយលើបណ្តាញសង្គមថា រីករាយទិវានៃក្តីស្រឡាញ់! ក្តីស្រឡាញ់មានអត្ថន័យទូលំទូលាយចំពោះឪពុកម្តាយ បងប្អូន លោកគ្រូអ្នកគ្រូ មិត្តភក្រ័ ប្តីប្រពន្ធ មនុស្សជាទីស្រឡាញ់ ។ល។ ក្តីស្រឡាញ់ទាំងនេះជាផ្នែកចូលមកបំពេញជីវិតរបស់យើងគ្រប់ៗគ្នា ចូលរក្សានូវក្តីស្រឡាញ់ដែលកំពុងមានឲ្យបានល្អ។

ដូច្នេះហើយ បុរសគួរតែចំណាយពេលខ្លះក្នុងទិវាបុណ្យក្តីស្រឡាញ់នេះ បន្ថែមពីលើការទិញកាដូឱ្យគូស្នេហ៍ គួរប្រើពេលវេលាឱ្យមានគុណភាពទៅដើរលេង និងញ៉ាំអាហារពេលល្ងាចជាមួយគ្នាឱ្យរ៉ូមែនទិក ដើម្បីនិយាយរឿងក្នុងចិត្តកាន់តែបន្ថែមស្នេហ៍ទៅលើដៃគូផងដែរ៕ អត្ថបទដោយ៖ ទ្រ សុភាព