ធ្លាក់ ស គឺជាដំណើរធម្មជាតិនៃសរីរាង្គភេទរបស់ស្រ្តី ដើម្បីបញ្ចេញចោលនូវប្រភេទបាត់តេរី មេរោគមិនល្អ ចេញមកខាងក្រៅស្បូនតាមទ្វារមាស។ ធ្លាក់ ស មាន២ប្រភេទ គឺធ្លាក់ ស ធម្មជាតិដែលស្រ្តីតែងតែមានប្រចាំខែអំឡុងពេលមករដូវ និងធ្លាក់ ស ជំងឺ ដែលបង្កឱ្យមានការរមាស់ ក្រហាយ ក្តៅទ្វារមាស ដែលជាសញ្ញាបង្ហាញថាទ្វារមាសកំពុងតែឆ្លងមេរោគ ឬមានមេរោគផ្ទុក។ មេរោគដែលអាចផ្ទុកនៅក្នុងការធ្លាក់ ស ក៏មានរួមបញ្ចូលទាំងមេរោគHPV ដែលអាចបង្កជាជំងឺមហារីកស្បូននៅថ្ងៃអនាគតផងដែរ។

យ៉ាងណាមិញ យោងតាមការសម្ភាសដោយផ្ទាល់ជាមួយនឹងវេជ្ជបណ្ឌិត ស៊ី សូដាវី មានឯកទេសផ្នែកសម្ភព និងរោគស្រ្តី​ប្រចាំនៅមន្ទីរព្យាបាលស្រ្តី និងកុមារដំរី បានឱ្យដឹងថា មានទម្លាប់អាក្រក់ៗមួយចំនួនដែលស្រ្តីខ្លួនឯងបានធ្វើ ហើយមិនដឹងខ្លួនថាវាជាទម្លាប់ដែលអាចធ្វើឱ្យទ្វារមាសខ្លួនឯងជួបបញ្ហាជាច្រើនចេញពីការធ្លាក់ ស រ៉ាំរ៉ៃនោះ។ បញ្ហាដែលអាចកើតចេញពីការធ្លាក់ ស រ៉ាំរ៉ៃសម្រាប់ស្រ្តី មានដូចជា រលាកទ្វារមាស រមាស់ទ្វារមាស ហើមទ្វារមាស ស្អិតស្បូន រលាកស្បូន ឬករណីអាក្រក់បំផុតដែលអាចកើតមាននោះគឺ ពិបាកក្នុងការមានកូនទៀតផង។  

តាមការសង្កេតក្នុងចំណោមអ្នកជំងឺជាច្រើនដែលបានទៅជួបជាមួយនឹងវេជ្ជបណ្ឌិតផ្ទាល់, ពួកគាត់តែងតែធ្វើរឿងមួយដូចៗគ្នានោះគឺ ការអនាម័យនៅតំបន់ទ្វារមាសមិនបានល្អ​និងមិនបានត្រឹមត្រូវ។ វេជ្ជបណ្ឌិត សូដាវី ថែមទាំងបានលើកឧទាហរណ៍ជាក់ស្តែងដូចជា ការចូលបន្ទប់ទឹករួចមិនបានលាងសម្អាតប្រដាប់ភេទ មិនបានជូតឱ្យស្ងួតធ្វើឱ្យសើមប្រដាប់ភេទ សើមខោក្នុង ដែលទាំងនេះអាចបង្កទៅជាផ្សិតនៅទ្វារមាស និងបង្ករោគរាល់ថ្ងៃនោះឯង។ ទម្លាប់មួយវិញទៀត ស្រ្តីខ្លះគាត់យល់ច្រលំលើការប្រើទឹកអនាម័យ ឬយកសាប៊ូមានក្លិនក្រអូបប្រើនៅតំបន់ទ្វារមាស ដើម្បីកុំឱ្យទ្វារមាសមានក្លិន ការធ្វើបែបនេះវាបានប៉ះពាល់ដល់PHនៅក្នុងជញ្ជាំងទ្វារមាស ដែលធ្វើឱ្យមេរោគអាចឆ្លងចូលទៅកាន់ស្បូនកាន់តែលឿន។

លើសពីនេះ ក៏មានទម្លាប់ជាច្រើនទៀតដូចជា ការប្រើប្រាស់សំឡីអនាម័យមិនបានត្រឹមត្រឹមក្នុងអំឡុងពេលមករដូវ ដែលសំឡីអនាម័យមួយតម្រូវឱ្យប្រើត្រឹម៣ទៅ៤ម៉ោងប៉ុណ្ណោះ​បើគាត់មិនបានប្តូរក៏នឹងធ្វើឱ្យងាយឆ្លងមេរោគចូលស្បូនផងដែរ។ រីឯ ទម្លាប់ចូលចិត្តត្រាំទឹកសាប៊ូក្រអូបៗ រាប់ម៉ោង ក៏ធ្វើឱ្យខូចនូវកម្រិតPHនៅក្នុងជញ្ជាំងស្បូនដូចគ្នា ឬករណីខ្លះទៀត ស្រ្តីបោកសម្អាតខោក្នុងមិនបានត្រឹមត្រូវ ហាលមិនត្រូវថ្ងៃ ក៏សុទ្ធតែជាកត្តារួមចំណែកនៃការបណ្តោយឱ្យខ្លួនកើតមានជំងឺធ្លាក់ ស រ៉ាំរ៉ៃនេះផងដែរ។

ជាសរុបមកវិញ បើចង់កុំឱ្យស្បូនមានបញ្ហាធ្លាក់ ស រ៉ាំរ៉ៃ បង្ករោគហានិភ័យផ្សេងៗដល់សុខភាព គឺត្រូវជម្រុះចោលនៅទម្លាប់ដូចខាងលើ ហើយងាកមកធ្វើផ្ទុយពីទម្លាប់អាក្រក់ៗទាំងនោះវិញ។ ស្រ្តីៗត្រូវចេះអនាម័យតំបន់ទ្វារមាសគ្រប់ពេលវេលា ប្រើសំឡីអនាម័យឱ្យបានត្រឹមត្រូវ ប្រើខោក្នុងដែលសម្អាតត្រឹមត្រូវ និងកុំប្រើផលិតផលដែលមានជាតិក្រអូប ជាត់កាត់នៅតំបន់ទ្វារមាសឱ្យសោះ។

ជាចុងក្រោយ ប្រសិនបើបងប្អូនមិនទាន់អស់ចម្ងល់ជាមួយនឹងប្រធានបទខាងលើ បងប្អូនអាចទាក់ទងទៅកាន់អ្នកគ្រូផ្ទាល់តាមរយៈហ្វេសប៊ុកផេក មន្ទីរព្យាបាលស្រ្តី និងកុមារដំរី ឬលេខទូរស័ព្ទ: 023 90 22 79 / 092 37 70 00៕