យោងតាមការចុះផ្សាយនៅលើកាសែតអេឡិចត្រូនិច CNA នៅថ្ងៃទី៧ ខែកញ្ញា ឆ្នាំ២០២២នេះ គិតត្រឹមម៉ោងនេះប្រទេសកូរ៉េខាងត្បូងកំពុងតែរងទុក្ខ ដោយសារមានព្យុះបក់បោកនៅក្នុងទីក្រុងនៃប្រទេសរបស់ខ្លួន ដែលបង្កឱ្យមានការចលាចល ជម្លៀសប្រជាជនរាប់ពាន់នាក់ មានប្រជាជនរងរបួស និងស្លាប់ថែមទៀតផង។

អាជ្ញាធរបាននិយាយគិតត្រឹមថ្ងៃនេះ​ចំនួនអ្នកស្លាប់ដោយសារព្យុះទីហ្វុងHinnamnorបានកើនឡើងដល់១០នាក់នៅក្នុងប្រទេសកូរ៉េខាងត្បូងបន្ទាប់ពីព្យុះនេះបានវាយលុកឆ្នេរសមុទ្រភាគខាងត្បូងជាមួយនឹងរលកដ៏ធំ ព្រមទាំងមានភ្លៀងធ្លាក់ខ្លាំងក្នុងសប្តាហ៍នេះ។

សូមបញ្ជាក់ផងដែរថា ព្យុះទីហ្វុងដែលជាកម្លាំងព្យុះដែលខ្លាំងបំផុតមួយដែលអាចវាយប្រហារប្រទេសនេះក្នុងរយៈពេលជាច្រើនទស្សវត្សរ៍ ពោលគឺវាបានបង្កឱ្យមានទឹកជន់លិចផ្លូវ និងអគារនានាគ្រាន់តែវាឆ្លងកាត់ចូលក្នុងប្រទេសកូរ៉េខាងត្បូង កាលពីថ្ងៃចន្ទ និងថ្ងៃអង្គារកន្លងមក។

ឥទ្ធិពលនៃព្យុះទីហ្វុងHinnamnor នេះបានបង្ខំមនុស្សជាង ៤,៧០០នាក់ឱ្យភៀសខ្លួនចេញពីផ្ទះដើម្បីរកទីទួលសុវត្ថិភាព ហើយវាបានបំផ្លាញផ្ទះនិងអគារប្រហែល១២,០០០ខ្នងហើយ។ អាជ្ញាធរបាននិយាយថា យ៉ាងតិចមានគ្រួសារជិត៩ម៉ឺនគ្រួសារ បានប៉ះពាល់នៅទូទាំងប្រទេស ខណៈដែលព្យុះបានវាយប្រហារ។

សូមរម្លឹកថា មុនពេលព្យុះទីហ្វុងបានបោកបក់មកដល់ អាជ្ញាធរកូរ៉េខាងត្បូងក៏បានបិទសាលារៀនជាង៦០០នៅទូទាំងប្រទេស ដើម្បីជាការប្រុងប្រយ័ត្ន ហើយក្រុមហ៊ុនអាកាសចរណ៍ក្នុងស្រុកបានលុបចោលជើងហោះហើរក្នុងស្រុកប្រមាណ២៥០ជើងទៀតផង៕

អត្ថបទដោយ៖ កញ្ញា លីហួយ