ទម្លាប់ទី១. ទម្លាបគិតពីខ្លួនឯង

ខ្ញុំមានសំណួរថា អ្នកចង់ដឹងពីខ្លួនឯងរីកចម្រើន តើអ្នកដឹងដោយរបៀបណា? បើអ្នកមិនដឹងពីខ្លួនឯងរីកចម្រើនទេ អ្នកមិនសប្បាយចិត្ត អ្នកខំធ្វើការខ្លាំង និងបាក់ទឹកចិត្តថែមទៀត។ តាមលោក ជីម រ៉ូន បានលើកឡើងថា ចូរអ្នករៀនពីព្រឹត្តិការណ៍ក្នុងជីវិតមួយចំនួនដែលកើតឡើងក្នុងជីវិត។ កុំរៀនរស់ឲ្យបានផុតតែមួយថ្ងៃៗ ផ្ទុយមកវិញត្រូវ រៀនទាញប្រយោជន៍ពីថ្ងៃនីមួយៗ ដោយផ្ចង់ស្មារតីថា ពេលនេះខ្លួនមានអ្វីខ្លះកំពុងកើតឡើងនៅជុំវិញខ្លួន ហើយព្យាយាមផ្តិតយកព្រឹត្តិការណ៍ទាំងអស់នោះ ដែលកើតក្នុងថ្ងៃនីមួយៗ ដោយសតិបំផុត”។

មានពេលខ្លះ អ្នកត្រូវវក់វីនឹងការងារមិនបានចំណាយពេលដើម្បីឆ្លុះមើលខ្លួនឯង វាធ្វើឱ្យអ្នកមានសម្ពាធផ្លូវចិត្ត។ ប៉ុន្តែអ្នកគួរចំណាយពេល១០ទៅ២០នាទីដើម្បីពិនិត្យមើលខ្លួនឯងឡើងវិញ ដើម្បីដឹងពីចំណុចខ្សោយ បន្ថែមសមត្ថភាព។ ព្រោះគុណតម្លៃនៃអនាគតរបស់អ្នក ត្រូវការសមត្ថភាព និងពេលវេលាសន្សឹមៗ ដើម្បីដល់គោលដៅនេះឯង។ អ្នកត្រូវចាំថា ការរីកចម្រើនសមត្ថភាពរបស់អ្នក ព្រោះតែអ្នកមានភាពក្លាហាននិងការសម្រេចចិត្ត ដើម្បីប្រឈមមុខនឹងកំហុសទាំងអស់នេះឯង។

ទម្លាប់ទី២. ព្យាយាមរៀនពីអ្នកដទៃ បង្កើនវិជ្ជាគុណ

ពេលអ្នកដាក់ខ្លួនព្យាយាមរៀនពីអ្នកដទៃ គឺដើម្បីបង្កើនចំណេះដឹងនិងសមត្ថភាពរបស់អ្នកបន្ថែម។ តាមលោក ជីម បានលើកឡើងថា បើអ្នកមានទម្លាប់មួយនេះ គឺទម្លាប់រៀនពីអ្នកដទៃនោះ គុណតម្លៃនៃជីវិតរបស់អ្នកនឹងកើន។ អ្នកត្រូវតែរៀនទាំងភាពជោគជ័យ និងបរាជ័យ។ មួយផ្នែកសម្រាប់ជីវិតរបស់អ្នកខ្វះអត់បានទេនោះគឺរៀនពីអ្នកដទៃបន្ថែមវិជ្ជមានឱ្យខ្លួនឯង ធ្វើជាគំរូល្អម្នាក់។ បើរឿងជីវិតរបស់អ្នកនឹងត្រូវគេសរសេរចូលក្នុងសៀវភៅ ចូរអ្នកត្រូវប្រាកដថាវាជាគំរូល្អ មិនមែនជាគំរូអាក្រក់ទេ។

ការរៀនមួយទៀត គឺរៀនតាមរយៈការអានពីបុគ្គលជោគជ័យទាំងអស់ដែលខ្ញុំបានជួបសុទ្ធតែជាអ្នកពូកែអានទាំងអស់។ គេអានគ្មានថ្ងៃឈប់ទេគឺអានជាប្រចាំ។ ព្រោះតែគេមានអារម្មណ៍ការចង់ចេះចង់ដឹងខ្លាំងណាស់។ ការចង់ដឹងនេះចង់ដឹងនេះហើយ បានជាគេតែងតែស្វែងរកមធ្យោបាយថ្មីៗ ដើម្បីក្លាយជាមនុស្សកាន់តែប្រសើរឡើង៕ អត្ថបទដោយ៖ ទ្រ សុភាព