ប្លាកែត គឺជាកោសិកាឈាមដែលបង្កើតជាកំណកឈាម ដើម្បីជួយបញ្ឈប់ការហូរឈាម។ ប្រសិនបើអ្នកខ្វះប្លាកែត គឺវាធ្វើឱ្យចរន្តឈាមក្នុងរាងកាយរបស់អ្នករត់ខុសប្រក្រតី អាចហូរចូលទៅខួរក្បាល ហូរចេញតាមរាងកាយផ្សេងៗ ពិបាកក្នុងការបញ្ឈប់ ហើយមានគ្រោះថ្នាក់។ ហានិភ័យខ្ពស់មួយទៀតនោះគឺ អាចគាំងបេះដូចលឿនបំផុត។

ជាការពិតណាស់ បើតាមការឱ្យដឹងពីគេហទំព័រ clevelandclinic បានបញ្ជាក់ថា ជំងឺខ្វះប្លាកែតនេះត្រូវបានគេចាត់ទុកជាជំងឺលាក់មុខមួយប្រភេទ ពីព្រោះអ្នកដែលកើតជំងឺនេះ ខ្លះមានបញ្ចេញជារោគសញ្ញាសម្រាប់សម្គាល់ ខ្លះទៀតមិនមានរោគសញ្ញាទេ គឺកើតភ្លាមៗតែម្តង។ យ៉ាងណាមិញ រោគសញ្ញាមួយចំនួនដែលអាចបញ្ជាក់ថាអ្នកកំពុងមានជំងឺខ្វះប្លាកែត មានដូចជា៖

·      ការហូរឈាមតាមច្រមុះ

·      ហូរឈាមអញ្ចាញធ្មេញ ៖ អ្នកអាចសម្គាល់ឃើញមានឈាមនៅលើច្រាសដុសធ្មេញ និងអញ្ចាញធ្មេញរបស់អ្នកញឹកញាប់

·      ឈាមក្នុងលាមក

·      ឈាម​ក្នុងទឹកនោម ​៖ មានន័យថានៅពេលអ្នកបត់ជើងតូច ហើយមានឈាមហូរមកជាមួយទឹកនោមតិចៗញឹកញាប់នេះហើយជាសញ្ញាខ្វះប្លាកែត

·      ឈាម​ក្នុង​កំអួត

·      ការមករដូវខ្លាំង ៖ ស្រ្តីដែលមករដូវយូរខ្លាំង រយៈពេលយូរជាងប្រាំពីរថ្ងៃ ឬហូរឈាមច្រើនជាងធម្មតា ក៏ជារោគសញ្ញាខ្វះប្លាកែតដែរ

·      មានស្នាមអុចតូចៗនៅលើស្បែក៖ មានអុចតូចៗនៅលើស្បែក អាចជាពណ៌ក្រហម ពណ៌ស្វាយ ឬពណ៌ត្នោត លេចឡើងញឹកញាប់បញ្ជាក់ថាអ្នកកំពុងខ្វះប្លាកែតហើយ

·      ស្នាមជាំលើស្បែក ៖ ដែលខ្មែរយើងតែងនិយមហៅថា ខ្មោចខាំ ប្រសិនជាកើតឡើងញឹកញាប់នោះបញ្ជាក់ថាអ្នកកំពុងខ្វហប្លាកែត។

មូលហេតុដែលបណ្តាលឱ្យអ្នកកើតជំងឺខ្វះប្លាកែតនេះគឺបណ្តាលមកពី ខួឆ្អឹងរបស់អ្នកបង្កើតប្លាកែតមិនគ្រប់គ្រាន់។ ពីព្រោះជាធម្មតា នៅក្នុងរាងកាយមនុស្សពេញវ័យអាចមានប្លាកែត 150,000 ទៅ 450,000 ប្លាកែត នៅក្នុងឈាម១មីលីលីត្រ។ បើករណីចំនួនប្លាកែតរបស់អ្នកតិចជាងនេះ នោះមានន័យថាអ្នកកំពុងប្រឈមមុខជាមួយជំងឺខ្វះប្លាកែត។ កត្តាផ្សេងៗទៀត ដែលបណ្តាលឱ្យអ្នកកើតជំងឺខ្វះប្លាកែតគឺអាចបណ្តាលមកពី អ្នកកំពុងមានជំងឺមហារីកគ្រាប់ឈាមក្រហម ដែលបង្ករឡើងពីអ្នកបរិភោគគ្រឿងស្រវឹងលើសចំនួន សារធាតុគីមីច្រើននៅក្នុងខ្លួនតាមរយៈការញ៉ាំអាហារទម្លាប់នៃការរស់នៅប្រចាំថ្ងៃមិនល្អ។

ដើម្បីបញ្ចៀស និងការពារខ្លួនឯងកុំឱ្យកើតជំងឺខ្វះប្លាកែតអ្នកត្រូវ៖

·      ផ្លាស់ប្តូររបៀបរស់នៅ៖ ប្រសិនបើអ្នកជក់បារី ចូរឈប់។ ការជក់បារីបង្កើនហានិភ័យនៃជំងឺខ្វះប្លាកែត។ ប្រសិនបើអ្នកផឹកស្រា ចូរផឹកក្នុងបរិមាណតិចបំផុត ការប្រើប្រាស់គ្រឿងស្រវឹងខ្លាំងអាចប៉ះពាល់ដល់កម្រិតប្លាកែត។ អនុវត្តអនាម័យមាត់ធ្មេញឱ្យបានល្អ ដើម្បីជៀសវាងការព្យាបាលធ្មេញដែលអាចបណ្តាលឱ្យហូរឈាម។

·      ប្រយ័ត្នជាមួយថ្នាំ(OTC) ៖ ថ្នាំ OTC មួយចំនួនមានផ្ទុក ibuprofen ឬអាស្ពីរីន ដែលអាចធ្វើឱ្យអ្នកកើតជំងឺខ្វះប្លាកែត

·      ជៀសវាងសកម្មភាពដែលអាចបណ្តាលឱ្យមានស្នាមជាំ និងហូរឈាម

·      ញ៉ាំអាហារដែលមានជីវជាតិគ្រប់គ្រាន់ បន្លែ ផ្លែឈើ ត្រី សាច់ ចៀសវាងការញ៉ាំអាហារកែច្នៃច្រើន អាហារផ្អែមពេក ប្រៃពេក ខ្លាញ់ពេក៕

អត្ថបទដោយ៖ មឿន គន្ធា