ថ្គាមទាល់ ឬធ្មេញថ្គាមធំទី៣ ជាធ្មេញដែលដុះក្រោយគេ ស្ថិតនៅក្នុងចន្លោះអាយុពី១៨ ទៅ២០ឆ្នាំ។ គ្រប់ធ្មេញថ្គាមមិនមែនដុះចេញមកតម្រូវឲ្យដកចោលទាំងអស់នោះទេមានលក្ខខណ្ឌច្រើនទៀតដែលអ្នកមិនចាំបាច់ដកធ្មេញថ្គាមចោលប្រសិនបើ៖ ថ្គាមទាល់នោះ មានសុខភាពល្អ (មិនពុក និងអញ្ចាញជុំវិញ មិនរលាក) ដុះចេញមកពេញលេញស្អាត ដុះចេញមកត្រង់ទីតាំងត្រឹមត្រូវ មិនទើស មិនជ្រៀត ជាមួយធ្មេញដទៃជិតខាង។យោងតាមការលើកឡើងរបស់មន្ទីរកាល់ម៉ែត្របានឲ្យដឹងថា ធ្មេញថ្គាមទាល់មានចំនួន៤ គឺខាងលើ២ និងខាងក្រោម២ ហើយជាញឹកញាប់ យើងសង្កេតឃើញថា ធ្មេញថ្គាមទាល់ខាងក្រោមភាគច្រើនដុះផ្អៀង ឬកប់មួយផ្នែក ឬកប់ទាំងមូលនៅក្នុងឆ្អឹង ដែលប្រឈមនឹងការវះកាត់យកចេញ។ ខណៈការវះកាត់ថ្គាមទាល់អាចធ្វើឡើងក្នុងករណីដូចខាងក្រោម៖
- ការរលាកអញ្ចាញ ឬហើមសាច់ដែលគ្របលើធ្មេញថ្គាមទាល់ញឹកញាប់
- ធ្មេញថ្គាមទាល់ដែលពុកផុយមិនអាចប៉ះបាន
- ធ្មេញថ្គាមទាល់ដែលបង្ករោគនៅចុងរឹសធ្មេញ
- ធ្មេញថ្គាមទាល់ដែលធ្វើអោយថ្គាមធំទី២ពុក ឬបង្កជំងឺរលាកជាលិការជុំវិញធ្មេញដែលមានជំរៅលើសពី ៥ម.ម
- ធ្មេញថ្គាមទាល់ដែលបង្កជាគីសធ្មេញ ឬដុំសាច់ផ្សេងៗ
- មុនពេលពត់តម្រង់ធ្មេញ ឬវះកាត់កែរតម្រូវឆ្អឹងថ្គាម
- ធ្មេញថ្គាមទាល់ដែលស្ថិតនៅតំបន់ឆ្អឹងបាក់បែក។
បន្ថែមពីលើនោះទៀតពេលវេលាដ៏សាកសមដកថ្គាមទាល់បំផុត គឺពេលអ្នកជំងឺនៅវ័យក្មេង ព្រោះថា អាយុនៅក្មេងគឺងាយស្រួលយកចេញ ជាងមនុស្សចាស់ដែលមានកំហាប់ឆ្អឹងក្រាស់ វាអាចនឹងឆាប់ជាសះស្បើយ និងជួបនូវគុណវិបត្តិតិចតួច ដើម្បីជៀសវាងផលវិបាកផ្សេងៗ បង្កឡើងដោយថ្គាមទាល់ទៀតផង។ ម្យ៉ាងវិញទៀតការវះកាត់ថ្គាមទាល់ចេញលុះត្រាមុនពេលអ្នកជំងឺព្យាបាលសុខភាពមួយចំនួនដូចជា មុនពេលបាញ់កាំរស្មីដើម្បីព្យាបាលជំងឺមហារីកតំបន់ក និងក្បាល វះកាត់ផ្លាស់ប្តូរសរីរាង្គ ព្យាបាលដោយថ្នាំគីមី ទទួលយកការព្យាបាលដោយថ្នាំ Biphosphonate។
សរុបសេចក្តីមក ការថែរក្សាសុខភាពមាត់ធ្មេញពិតជាសំខាន់ណាស់ ព្រោះវាមិនត្រឹមតែធ្វើឲ្យយើងមានអាយុវែង និងគេចផុតពីជំងឺគ្រោះថ្នាក់ជាច្រើនប៉ុណ្ណោះទេ ប៉ុន្តែ ថែមទាំងជួយឲ្យយើងរីករាយជាមួយនឹងសកម្មភាពជាច្រើនទៀតក្នុងពេលយើងមានវ័យកាន់តែចាស់ ៕
អត្ថបទដោយ៖ ស្រីណុច