ជំងឺបេះដូងគឺជាជំងឺមួយ ដែលអាចសម្លាប់អ្នកកើតបានយ៉ាងលឿន ជំងឺនេះទៀតសោតទុកយូរក៍អាចប្រឈមជំងឺផ្សេងៗទៀតដូចបញ្ហាតម្រងនោមឡើងមកជាដើមសុទ្ធសឹងជាបញ្ហគ្រោះថ្នាក់សម្រាប់សុខភាពពេលកើត។

ជាការពិតណាស់គ្មានវិធីណាដែលគេអាច ទប់ស្កាត់មិនឱ្យជំងឺបេះដូងកើតឡើងមកឡើយ តែមានវិធីដើម្បីការពារជំងឺ​ឬក៏កាត់បន្ថយជំងឺបេះដូងបាន មានដូចជា៖ ទម្លាប់ហាត់ប្រាណយ៉ាងតិច៣០នាទីក្នុង១ថ្ងៃ កុំប្រើប្រាស់ប្រភេទថ្នាំផ្ដេសផ្ដាស កាត់បន្ថយអារម្មណ៍ស្រ្តេស គ្រប់គ្រងទម្ងន់(មានន័យថាកុំឱ្យធាត់ខ្លាំងពេកឬក៏ស្គមខ្លាំងពេក) ដុះក្បាលពោះ ការពារជំងឺទឹកនោមផ្អែម លើសឈាម ព្រោះជំងឺទាំងនេះ គឺជាមូលហេតុនាំឱ្យបេះដូងមានបញ្ហា។ នេះបើយោងតាមរយៈគេហទំព័រ mayoclinic បានបញ្ជាក់ឱ្យដឹងពីរោគសញ្ញានៃជំងឺគាំងបេះដូង ប្រយ័ត្នមិនដឹងថាខ្លួនកើត ទុករហូតធ្វើទុក្ខខ្លាំងដល់កម្រិតអាចគ្រោះថ្នាក់បាន។ ចំពោះរោគសញ្ញានៃជំងឺបេះដូងគឺមានច្រើនណាស់និងមានបែងចែកតាមប្រភេទនៃជំងឺផ្ទាល់ដូចជា៖

រោគសញ្ញាជំងឺបេះដូងបង្កមកពីចង្វាក់បេះដូងលោតខុសធម្មតាមានដូចជា៖

-វិលមុខ ឈឺទ្រូង ដួលសន្លប់

-វង្វេងស្មារតី ញ័រក្នុងទ្រូង ដង្ហើមខ្លី

-ចង្វាក់បេះដូងអាចលោតញាប់ពេក​ ឬក៏លោតយឺតខ្លាំង

រោគសញ្ញាជំងឺបេះដូងបង្កមកពីពិការភាពពីកំណើត មានដូចជា៖

-ហើមជើង និងក្បាលពោះ ឬតំបន់ជុំវិញភ្នែក

-ស្បែកឬបបូរមាត់ពណ៌ស្លេក

-បើចំពោះទារកវិញអាចមានដង្ហើមខ្លីខុសធម្មតា

រោគសញ្ញាជំងឺបេះដូងបង្កមកពីជំងឺសាច់ដុំបេះដូង មានដូចជា៖

-ថប់ដង្ហើមពេលធ្វើសកម្មភាព ឬក៏ពេលសម្រាក

-វិលមុខ អស់កម្លាំង អាចឈានដល់សន្លប់

-ពេលយប់ពេលគេង អាចពិបាកដកដង្ហើម

គូសបញ្ជាក់ឱ្យដឹងថា ប្រសិនណាអ្នកមានបញ្ហារហូតដល់ដួលសន្លប់ គួរប្រញាប់ទៅជួបពេទ្យដើម្បីព្យាបាលឱ្យទាន់ពេលចៀសវាងមានបញ្ហាធ្ងន់ធ្ងរលើសនេះ៕

អត្ថបទដោយ៖ ប៉ែត ធីតា