ជំងឺមហារីកមិនថាជំងឺមហារីកអ្វីនោះទេ​គឺប្រឈមគ្រោះថ្នាក់ខ្លាំងណាស់ គឺងាយនឹងគ្រោះថ្នាក់ដល់អាយុជីវិត​ ដូច្នេះហើយ ការឧស្សាហ៍តាមដានសុខភាពរបស់ខ្លួនឯងគឺជារឿងល្អមួយដែលអ្នកមិនគួររំលងនោះទេ។

នេះបើយោងតាមរយៈរបស់មន្ទីរពេទ្យកាល់ម៉ែត បានឱ្យដឹងថា ជំងឺមហារីកឆ្អឹង(Ostéosarcome) គឺជាជំងឺសាច់កាចដែលកើតនៅលើឆ្អឹង ភាគច្រើនកើតលើក្មេងជំទង់អាយុចន្លោះពី១៣ ទៅ១៦ឆ្នាំ តែករណីខ្លះក៏អាចកើតមានលើមនុស្សពេញវ័យផងដែរ។ ជំងឺមហារីកឆ្អឹង ច្រើនកើតនៅលើឆ្អឹងវែងដូចជា ឆ្អឹងដើមដៃ ឆ្អឹងភ្លៅ និងឆ្អឹងស្មងជើងជាដើម។

ជំងឺមហារីកឆ្អឹងមានរោគសញ្ញាដូចជា៖

   - ឈឺចាប់នៅកន្លែងដុំមហារីក

   - ហើម រឺឡើងដុំពកឆ្អឹងបន្តិចម្ដងៗ

   - ពិបាកធ្វើចលនា

   - ងាយបាក់ឆ្អឹង (បាក់ដោយឯកឯង រឺនៅពេលប៉ះទង្គិចតិចតួច)

ដើម្បីធ្វើរោគវិនិច្ឆ័យជំងឺមហារីកឆ្អឹង យើងត្រូវច្រឹបយកជាលិកាដែលសង្ស័យយកទៅវិភាគ។ ក្រៅពីនេះយើងត្រូវធ្វើការវិភាគអមវេជ្ជសាស្រ្តមួយចំនួន ដើម្បីកំណត់ទីតាំង ទំហំ និងការរីករាលដាលនៃជំងឺដូចជា ការថតវិទ្យុសាស្រ្ត ស្កែននែរ (Scanner) និង អ៊ីអែអិម (IRM)ជាដើម។

-វិធីព្យាបាលជំងឺមហារីកឆ្អឹង

ជំងឺមហារីកឆ្អឹង ត្រូវព្យាបាលដោយចាក់ថ្នាំគីមី និងធ្វើការវះកាត់ដោយវេជ្ជបណ្ឌិតជំនាញ។ ការព្យាបាលមានប្រសិទ្ធិភាពខ្ពស់បំផុតនៅពេលជំងឺស្ថិតក្នុងដំណាក់កាលដំបូង មិនទាន់មានការរីករាលដាលទៅសរីរាង្គដ៏ទៃ និងទទួលបានការវះកាត់ត្រឹមត្រូវ។

ដូច្នេះបើសិនបងប្អូនមានរោគសញ្ញាដូចបានរៀបរាប់ខាងលើ គួរប្រញាប់មកជួប ជាមួយក្រុមវេជ្ជបណ្ឌិតឯកទេសជំនាញ ផ្នែកជំងឺមហារីកនៃមន្ទីរពេទ្យកាល់ម៉ែត ដើម្បីធ្វើរោគវិនិច្ឆ័យ និងព្យាបាលអោយទាន់ពេលវេលា ដើម្បីចៀសវាងហានិភ័យកាន់តែខ្លាំងពិបាកទប់ស្កាត់៕