មនុស្សជាច្រើនពិបាកព្រោះខ្លួនរកចំណូលបានតិច តែអាយុកើនរហូត ហើយមានទំនួលខុសត្រូវច្រើនជាងមុន។ តាមសៀវភៅ មេដែក ដែលនិពន្ធដោយលោកគ្រូ សំ កុសល បានលើកឡើងថា មនុស្សច្រើននាក់ណាស់កំពុងជួបនឹងបញ្ហាធំបំផុតផ្ទាល់ខ្លួននោះគឺ អាយុកាន់តែច្រើន ចំណូលនៅតិច។ អ្នកខ្លះអាយុសាមផ្លាយហើយ តែ មិនដឹងថាគោលដៅរបស់ខ្លួននៅទីណាឡើយ រស់នៅគិតតែសប្បាយ ស៊ីផឹកដោយយល់ច្រឡំថាការសប្បាយបែបនេះហើយជាគោលដៅជីវិតខ្លួន”។ នេះជាការបញ្ជាក់ថា រស់នៅគ្មានគោលច្បាស់ ចំណូលតិចមិនខានឡើយ។ បើយើងប្រើជីវិតរស់នៅពឹងលើប្រាក់ វាអាចធ្វើឱ្យអ្នកពិបាកចិត្ត ពេលអ្នកមានទំនួសខុសត្រូវច្រើនឡើង។
បើអ្នកចង់ដោះស្រាយបញ្ហាចំណូលច្រើន លុះត្រាអ្នកមានសមត្ថភាព មានគោលដៅច្បាស់។ ពេលអ្នកមានគោលដៅច្បាស់ហើយ វាជាកម្លាំងចិត្តដើម្បីជម្រុញចិត្តរបស់អ្នកឱ្យខំធ្វើការកាន់តែខ្លាំងឡើង។ តាមលោកគ្រូ សំ កុសល បានបញ្ជាក់ថា សាកនាំគ្នាធ្វើតាមខ្ញុំមើលរកគោលដៅអ្នកឲ្យឃើញ ហើយនឹកពីគោលដៅនោះរាល់ថ្ងៃ ខ្ញុំធានាថាចំណង់របស់អ្នកនឹងកើនឡើងជាមិនខាន។ បើអ្នកនៅមិនទាន់ដឹងថា អ្វីជាគោលដៅ ហើយគោលដៅ របស់ខ្លួននៅទីណានោះទេ អ្នកគួរប្រញាប់រកគោលដៅឱ្យឃើញ ហើយកំណត់វាឱ្យច្បាស់។ សម្រាប់អ្នកមានគោលដៅច្បាស់លាស់ហើយ សូមធ្វើតាមខ្ញុំដោយសរសេរគោលដៅនោះដាក់លើក្រដាស ហើយថតចម្លងឲ្យបានច្រើនសន្លឹក អាចឌីហ្សាញវាឲ្យស្អាត ឲ្យមានភាពទាក់ទាញខ្លាំងនោះរឹតតែប្រសើរ។ ពេលអ្នកឃើញគោលដៅរាល់ថ្ងៃ ឬរាល់ព្រឹក ឬរាល់យប់ វាជាដាស់ចំណង់របស់អ្នកនឹងកើនឡើងជាមិនខានទេ។
ហើយលោកគ្រូបានបន្ថែមថា ចំណង់កើនឡើងហើយ អ្នកនឹងធ្វើដំណើរឆ្ពោះទៅរកគោលដៅខ្លួន កាន់តែជិតជាងមុនជាមិនខាន។ នៅតាមផ្លូវទៅរកគោលដៅនោះ អ្នកនឹងឃើញផ្ទាល់នឹងភ្នែកថា ចំណូលចាប់ផ្តើមកើនឡើងជាមិនខាន។ ពេលចំណង់អ្នកកើនហើយសូមរួសរាន់ផ្តោតលើសកម្មភាពណា ដែលធ្វើឲ្យអ្នកក្លាយជាមនុស្សដែលមានតម្លៃបំផុតក្នុងទីផ្សារ។ សូមសួរខ្លួន ឯងថា ដើម្បីទៅដល់គោលដៅខ្លួន តើអ្នកនឹងត្រូវក្លាយជានរណាគេ នៅឆ្នាំនេះ? ហើយធ្វើបែបណា ដើម្បីឲ្យខ្លួនក្លាយជាមនុស្សដែលមានតម្លៃបំផុតបានក្នុងជំនាញដែលខ្លួនបានរើស។ ការដែលមានតម្លៃបំផុតក្នុងទីផ្សារនេះហើយ ដែលនឹងធ្វើឲ្យមនុស្សក្នុងទីផ្សារនោះ ពួកគាត់សុខចិត្តចំណាយច្រើនទៅលើអ្នកវិញដោយមិនបាច់បង្ខំ មិនបាច់ខំទៅផ្សព្វផ្សាយអូសទាញនោះឡើយ។ នេះហើយជាទំនាញនៃច្បាប់មេដែក!” រស់តាមច្បាប់មេដែកមានគោលដៅច្បាស់ បានអ្នកដុះចំណង់ ខំធ្វើការឱ្យខ្លាំង បានចំណូលរបស់អ្នកកើនឡើង៕ អត្ថបទដោយ៖ ទ្រ សុភាព