ការរកស៊ីតែងមានបញ្ហា ឬវិបត្តិសេដ្ឋកិច្ចក្នុងកាលៈទេសៈណាមួយ ការពង្រឹងផ្លូវចិត្តជារឿងសំខាន់ក្នុងការដឹកនាំគំនិតយើងឱ្យមើលឃើញឱកាស ដើម្បីដឹកនាំអាជីវកម្មឱ្យរីក។ តាមលោកគ្រូ ខាំ ពិសិដ្ឋ ជាសហគ្រិន គ្រូបង្ហាត់បង្ហាញ និងអ្នកយុទ្ធសាស្រ្តជីវិត បានបញ្ជាក់ថា មនុស្សយើងមាន ៣ប្រភេទ៖

១. ជាមនុស្សដេកចាំឱកាស

២. ជាមនុស្សពូកែចាប់ឱកាស

៣. ជាមនុស្សដែលបង្កើតឱកាស

យើងអាចសង្កេតមើលនៅពេលដែលមានបញ្ហាកូវីដចាប់ផ្តើមភ្លាមនោះ មានអាជីវកម្មមួយចំនួនបានផ្អាកដំណើរការ ហើយមានអាជីវកម្មមួយចំនួនទៀតបានបំប្លែងខ្លួន ហើយបន្តការជួយដល់អតិថិជន ទោះបីជាមានកត្តារារាំងក៏ដោយ! ជាលទ្ធផលអ្នកដែលគាត់បានសម្រាកផ្អាកមួយរយៈ រង់ចាំកូវីដចាកចេញ គាត់អាចបន្តបិទរាងយូរ ឬបើកដំណើរការសាឡើងវិញក្នុងអំឡុងពេលមួយ។

តែដោយឡែកអ្នកដែលគាត់ខំខ្នះខ្នែង គិតរកគំនិតច្នៃប្រឌិត និងធ្វើការផ្លាស់ប្តូរបានលឿនទៅតាមកាលៈទេសៈ ក៏ចាប់យកឱកាស ដែលមានការប្រកួតប្រជែងធ្លាក់ចុះ គាត់មានភាពរីកចម្រើនជាខ្លាំង។ ហើយមានអ្នកខ្លះទៀត គាត់បានបង្កើតឱកាសឱ្យខ្លួនឯង ចាប់ផ្តើមអាជីវកម្មថ្មី ដោយមើលឃើញនូវបញ្ហាក្នុងសង្គម ហើយចាប់ផ្តើមដោះស្រាយបញ្ហាប្រកបដោយគំនិតឆ្នៃប្រឌិត និងសុវត្ថិភាព។

ចុះអ្នកវិញ? ក្នុងរយៈពេល ៣ឆ្នាំកន្លងមកនេះ មិនថាក្នុងកាលៈទេសៈណាក៏ដោយ ក៏យើងបន្តក្នុងការផ្តល់ការអប់រំជូនដល់មនុស្សជាច្រើនដែលគាត់មានការតាំងចិត្តក្នុងការអភិវឌ្ឍខ្លួនទៅរកភាពរីកចម្រើន។ ព្រោះការសិក្សារៀនសូត្រមានការវិវត្តទៅកាន់បច្ចេកវិទ្យាថ្មី បានជួយអ្នកម្ចាស់អាជីវកម្មមានប្រសិទ្ធភាពខ្ពស់។ ខ្ញុំសុំលើកទឹកឱ្យបងប្អូនបន្តសិក្សារៀនសូត្រឱ្យបានទាន់ពេលវេលា កុំនិយាយថាចាំសិន ចាំនេះ ចាំនោះ ក្លាយជាទម្លាប់ ដែលធ្វើឱ្យបងប្អូនពិបាករីកចម្រើនសមត្ថភាព។ គប្បីបើកចិត្តសិក្សាអ្វីដែលល្អៗថ្មីៗ ជួយអ្នកឱ្យដើរទាន់បច្ចុប្បន្នភាព ចំណេះដឹងម្សិលមិញអាចអស់សុពលភាព លែងប្រើប្រាស់បាននៅថ្ងៃនេះ។ ដូចនេះ ត្រូវតែរៀនឱ្យបានលឿន ឱ្យសម្របដើម្បីតាមកាលៈទេសៈឱ្យទាន់ ក្នុងការបង្កើតអាជីវកម្មឱ្យរស់បានយូរ៕ អត្ថបទដោយ៖ ទ្រ សុភាព

គេហទំព័រ៖ Kham Piseth លេខទូរស៍ព្ទ៖ 096 6364 096