ក្បាលពោះធំ គ្មានចង្កេះ ស្លៀកអ្វីក៏មិនសមមិនស្អាត គឺជាបញ្ហាធំណាស់សម្រាប់អ្នកមានគីឡូធ្ងន់ ដូច្នេះការសម្រកគីឡូគឺជារឿងចម្បងដែលត្រូវធ្វើ ។ ចំពោះវិធីសម្រកវិញមានច្រើនរបៀប ដូចជាការហាត់ប្រាណសម្រកក្បាលពោះ ហាត់យកចង្កេះS រួមទាំងរបបអាហារដែលជួយឱ្យការសម្រកគីឡូបានជោគជ័យ ។
ជាការពិតណាស់ក្រុមការងារចាបបៃតងសូមលើកយករបបអាហារញុំាជួយសម្រកក្បាលពោះ ដុតរំលាយខ្លាញ់ ចង្កេះតូចរួមទាំងមានសុខភាពល្អបំផុតពេលញុំា មិនបង្កជាគ្រោះថ្នាក់ដល់រាងកាយ។ នេះបើយោងតាមរយៈគេហទំព័រ stylecraze បានបញ្ជាក់ឱ្យដឹងថា អាហារគួរញុំាដើម្បីជួយអ្នកឱ្យសម្រកគីឡូបានមានដូចជា៖
១.ស៊ុបផ្សិត៖ យោងតាមរយៈលោក Julieanna Hever ដែលជាអ្នកនិពន្ធសៀវភៅ The Vegiterranean Diet បាននិយាយបញ្ជាក់ឱ្យដឹងថា ការទទួលទានស៊ុបមុនចាប់ផ្ដើមញុំាអាហារគឺអាចជួយកាត់បន្ថយកម្រិតញុំារបស់អ្នកបានច្រើន ជួយសម្រកគីឡូ ប្រភេទស៊ុបអាចញុំាបានមានដូចជាស៊ុបសាច់មាន់ ស៊ុបផ្សិតសុទ្ធជាដើម។ដូច្នេះអាចសាកល្បងញុំាស៊ុបមុនញុំាអាហារតាមក្រោយដើម្បីជួយសម្រកគីឡូ។
២.ដើមខាត់ណាខៀវ៖ ដើមខាត់ណាខៀវគឺ សម្បូរដោយវីតាមីនល្អសម្រាប់សុខភាពល្អ រួមទាំងអ្នកមានបំណងចង់សម្រកគីឡូ ដើម្បីដុតរំលាយខ្លាញ់ក្បាលពោះចេញ បានរាងស្អាត ស្រកគីឡូលឿនអាចញុំាបន្លែដើមខាត់ណាខៀវទៅមិនខុសទេ។
៣.គ្រាប់CHIA៖ យោងតាមរយៈអ្នកជំនាញ ឈ្មោះ Olesiak បាននិយាយថា គ្រាប់CHIAគឺប្រយោជន៍ជួយសម្រកគីឡូ សម្រាប់អ្នកបំណងចង់សម្រកអាចសាករកគ្រាប់CHIAញុំា ជួយឱ្យអ្នកឆ្អែតបានយូរ កាត់បន្ថយការញុំាអាហារច្រើន ជាហេតុនាំឱ្យអ្នកឆាប់ស្រកគីឡូលឿន។ ដូច្នេះប្រសិនណាអ្នកមិនចង់ក្បាលពោះធំ ស្លៀកអ្វីក៏មិនសមដូចគេ អាចសាកល្បងញុំាគ្រាប់CHIAដើម្បីសម្រកគីឡូបាន។
៤.យ៉ាអ៊ួរ៖ តាមរយៈការសិក្សាមួយបានចេញផ្សាយនៅទស្សនាវត្តី British Journal of Nutrition បានរកឃើញថា យ៉ាអ៊ួសម្បូរដោយប្រូបាយអូទិក ល្អសម្រាប់សុខភាពរបស់ក្រពះពោះវៀន រួមទាំងអ្នកវិទ្យាសាស្រ្តបានរកឃើញថា អ្នកញុំាទឹកដោះគោជូរ អាចសម្រកទម្ងន់២ដងលើសអ្នកមិនបានញុំា ។ ដូច្នេះប្រសិនណាអ្នកមិនចង់ក្បាលពោះធំដោយសារគីឡូធ្ងន់អាចសាកល្បងញុំាទឹកដោះគោជូរបាន។
យ៉ាងណាមិញនេះបើតាមរយៈវិធីសម្រកគីឡូរបស់តារាស្រីថៃ មៃ ដាវីកា(Mai-Davika) បានចែករំលែកវិធីសម្រកគីឡូ៣យ៉ាងរបស់នាងដែលជួយឱ្យរាងស្លីម ចង្កេះតូច ស្លៀកពាក់អ្វីក៏សមស្អាតគ្មានទាស់។ វិធីទាំង៣នោះមានដូចជា៖
-ការតមអាហារបែបIF ៖មានច្រើនទម្រង់ដូចជា ការតមបែប18/6បានន័យថា ញុំាអាហារ៦ម៉ោង តម១៨ម៉ោង ហើយអំឡុងពេលតមអ្នកអាចផឹកទឹក តែ កាហ្វេអ្វីបានតាមចិត្ត តែមិនត្រូវថែមជាតិស្ករឡើយ។
-កាត់ជាតិម្សៅ៖ មានន័យថារបបអាហារដែលមានជាតិម្សៅត្រូវកាត់ចេញ ដូចជានំបុ័ង គុយទាវ ឈីស….ជាដើមដោយប្ដូរមកញុំាប្រភេទអាហារមានកាប៊ូអ៊ីដ្រាតទាបដូចជាស៊ុត បន្លែបៃតងជំនួសវិញ។
-ផឹកទឹក៖ ការផឹកទឹកគឺសំខាន់សម្រាប់ជួយសម្រកគីឡូបានច្រើនណាស់ ទឹកគឺមានតួនាទីជួយទ្រទ្រង់សរីរាង្គខួរក្បាល សម្ពាធឈាម ការរំលាយអាហារវិញគឺកាន់តែត្រូវការទឹកចូលរួម ដូច្នេះការផឹកទឹក១.៥លីត្រ ក៏២លីត្រអាស្រ័យលើទម្ងន់ខ្លួនអាចជួយជំរុញឱ្យការសម្រកគីឡូបានជោគជ័យលឿនផងដែរ៕
អត្ថបទដោយ៖ ប៉ែត ធីតា