តារាសម្តែងសញ្ជាតិកូរ៉េ Lee Young-ae បានបរិច្ចាគសម្បត្តិផ្ទាល់ខ្លួនចំនួន 100 លានវ៉ុន (83,470 ដុល្លារ) ដល់អ៊ុយក្រែន ខណៈដែលខ្លួននិងគ្រួសារធ្លាប់ឆ្លងកាត់ជីវិតក្នុងភ្លើងសង្គ្រាមមកពីមុន នេះបើយោងតាមការបង្ហោះនៅលើប្រព័ន្ធផ្សព្វផ្សាយសង្គមដោយឯកអគ្គរដ្ឋទូតអ៊ុយក្រែនប្រចាំនៅកូរ៉េកាលពីថ្ងៃអង្គារ។

 ឯកអគ្គរដ្ឋទូត Dmytro Ponomarenko បាននិយាយថា “យើងពិតជារំភើបនិងរំភើបយ៉ាងខ្លាំងចំពោះលិខិតនេះ និងការរួមចំណែកផ្នែកហិរញ្ញវត្ថុដ៏អស្ចារ្យរបស់តារាស្រីកូរ៉េដ៏ល្បីល្បាញ Lee Young-Ae ក្នុងការគាំទ្រអ៊ុយក្រែន និងការទាមទារឱ្យបញ្ចប់សង្រ្គាមឱ្យបានឆាប់តាមដែលអាចធ្វើទៅបាន!” ។ លោក​បាន​បន្ថែម​ថា អំណោយ​ទាំង​នោះ​នឹង​ត្រូវ​ប្រើ​ដើម្បី​បម្រើ​សេចក្តី​ត្រូវការ​របស់​ជន​រង​គ្រោះ​អ៊ុយក្រែន​ពី​ការ​ឈ្លានពាន​របស់​រុស្ស៊ី។

ឯកអគ្គរដ្ឋទូត Dmytro Ponomarenko បានបញ្ចូលរូបថតនៃមូលប្បទានប័ត្រដែលត្រូវបានផ្ញើដោយតារាសម្តែងស្រីLee និងសំបុត្ររបស់នាងដែលបានសរសេរថា “ក្នុងនាមគ្រួសារអតីតយុទ្ធជនដែលបានឆ្លងកាត់សង្រ្គាម ខ្ញុំអាណិតអាសូរនឹងភាពរន្ធត់នៃស្ថានភាពបច្ចុប្បន្នច្រើនជាងអ្នកផ្សេងទៀត”។

នាង​បន្ត​ថា “ខ្ញុំ​សង្ឃឹម​យ៉ាង​មុតមាំ​ថា សង្គ្រាម​នៅ​អ៊ុយក្រែន​នឹង​ឈាន​ដល់​ការ​បញ្ចប់​ក្នុង​ពេល​ឆាប់ៗ ហើយ​បួងសួង​សុំ​សុខុមាលភាព និង​សុវត្ថិភាព​ដល់​ពលរដ្ឋ​អ៊ុយក្រែន​ទាំង​អស់​ដែល​កំពុង​ទាមទារ​សេរីភាព និង​សន្តិភាព ខ្ញុំ​សង្ឃឹម​ថា​អ្នក​មិន​បាត់បង់​ភាព​ក្លាហាន និង​ក្តី​សង្ឃឹម​របស់​អ្នក​ឡើយ។ ក្នង​នាម​ជា​ពលរដ្ឋ​កូរ៉េ​ម្នាក់​ដែល​ចង់​បាន​សន្តិភាព និង​សេរីភាព ខ្ញុំ​សូម​បង្ហាញ​ពី​ដួង​ចិត្ត​របស់​ខ្ញុំ​តាម​រយៈ​អំណោយ​ដ៏​តូច​មួយ​នេះ សូម​ព្រះ​គង់​នៅ​ជា​មួយ​អ្នក​ជានិច្ច។

សូមរម្លឹកផងដែរថា Lee Young-Ae គឺជាតារាសម្តែងជើងចាស់អាយុ 51 ឆ្នាំដែលបានបង្ហាញខ្លួនជាលើកដំបូងតាមរយៈការផ្សាយពាណិជ្ជកម្មសូកូឡាក្នុងឆ្នាំ 1990 ។ នាងបានចាប់ផ្ដើមអាជីពសម្តែងរបស់នាងតាមរយៈរឿងភាគរបស់ទូរទស្សន៍ KBS រឿង "How's Your Husband?" ក្នុងឆ្នាំ 1993 ។ ស្នាដៃលេចធ្លោមួយចំនួនរបស់នាងចាប់តាំងពីពេលនោះមករួមមានរឿង "Last Present" (2001) "Lady Vengeance" (2009) និង "Bring Me Home" (2018) និងរឿង "Dae Jang Geum" (2003) និង "Saimdang , Memoir of Colors" (2016)៕