សព្វថ្ងៃនេះ មានបញ្ហាមួយយ៉ាងធំគឺការមើលងាយគ្នា។ មានអ្នកខ្លះលេងសើចបែបមើលងាយ ឬនិយាយបែបឱ្យគេឈឺចាប់ក៏មានដែរ។ ដើម្បីកុំឱ្យសម្តីអ្នកដទៃមានឥទ្ធិពលមកលើបេះដូងរបស់អ្នក អ្នកគិតតាមគំនិតរបស់ព្រះអង្គ គូ សុភាព បានលលើកឡើងថា គេគិតយ៉ាងណាមកលើរូបអ្នកជារឿងរបស់គេ អ្នកមិនអាចហួងការគិតរបស់អ្នកដទៃបាននោះទេ។ និយាយទៅ! វាអាចជាកម្មពៀជាមួយបុគ្គលនោះពីមុនក៏អាចដែរឬអាចថាធ្វើឱ្យប៉ះពាល់ផលប្រយោជន៍របស់គេផងដែរ។ បើគេស្អប់អ្នក ចិត្តគេបានប្រលាក់បាប តែបើអ្នកខឹង ស្អប់នឹងគេវិញនោះ ចិត្តអ្នកក៏ប្រលាក់បាបវិញដែរ។ តាមពិតទៅ! គួរតែមានក្តីអាណិតបុគ្គលនោះវិញ ព្រោះគេជាអ្នកសន្សំភ្លើង  សន្សំបាបដែលនាំឱ្យមានទុក្ខទាំងបច្ចុប្បន្ន​និងអនាគតផងដែរ”។ តាមគតិបណ្ឌិតរបស់ព្រះអង្គបានបញ្ជាក់ថា គេមិនអាចធ្វើឱ្យអ្នកឈឺចាប់នោះទេ ពេលអ្នកគិតបែបវិជ្ជមានហើយមានចិត្តមេត្តាដល់គេនោះ។

មានបញ្ហាមួយទៀត ធ្វើឱ្យមនុស្សជាច្រើនរងសម្ពាធផ្លូវចិត្តគឺគ្រួសារនិងការងារច្រើននោះ អ្នកគួរគិតតាមព្រះអង្គ គូ សុភាព សម្តែងថា សម្ពាធការងារផង សម្ពាធគ្រួសារផង សម្ពាធផ្លូវចិត្តផង យូរៗ ទៅ យើងយោងខ្លួនស្ទើរមិនរួច។ ដូចនេះហើយ បើធ្ងន់កាយ មេត្តាកុំឱ្យធ្ងន់ចិត្តពេក បើហត់ខ្លាំង ត្រូវសម្រាកខ្លះ កុំបង្ខំខ្លួនឯងខ្លាំងពេករហូតធ្វើបាបខ្លួនឯងឡើយ។ អ្នកត្រូវសម្រាកចិត្តខ្លះ រៀនព្រមតាមសមត្ថភាពដែលខ្លួនមាន រៀនញញឹម ទទួលស្គាល់ការពិត រៀនអនុញ្ញាតឱ្យធម្មជាតិប្រព្រឹត្តទៅតាមដំណើររបស់វាផង ទើបចិត្តអ្នកមិនធ្ងន់ណា”! បើបញ្ហាណាមិនបានទេ បណ្តោយតាមបញ្ហានោះទៅ ព្យាយាមដោះស្រាយបញ្ហាអាចដោះបាន វាធ្វើឱ្យអ្នកសប្បាយចិត្តជាង៕ អត្ថបទដោយ៖ ទ្រ សុភាព