បច្ចុប្បន្ននេះមនុស្សយើងជាច្រើនបានងាកយកបន្លែ ផ្លែឈើស្រស់មួយចំនួនមកកិនលាយចូលគ្នាធ្វើជាភេសជ្ជៈផឹកជាប្រចាំ។ ផ្អែកតាមប្រភពវែបសាយ Mayo ការផឹកទឹកផ្លែឈើស្រស់ៗជួយឲ្យរាងកាយរបស់អ្នកអាចស្រូបយកសារធាតុចិញ្ចឹមបានល្អប្រសើរជាងការទទួលទានផ្លែឈើ និងបន្លែទាំងមូល។ ទឹកផ្លែឈើអាចកាត់បន្ថយហានិភ័យនៃជំងឺមហារីក បង្កើនប្រព័ន្ធការពាររបស់អ្នក ជួយកម្ចាត់ជាតិពុលចេញពីរាងកាយ ជួយដល់ការរំលាយអាហារ និងជួយសម្រកទម្ងន់។

១. ភេសជ្ជៈគីនឆាយ៖ ភេសជ្ជ១នេះគឺសម្អាតដល់មុខងារតម្រងនោម ដែលស្លឹកគីនឆាយសម្បូរទៅដោយជាតិកាកសរសៃមានកាឡូរីទាប ប្រឆាំងអុកស៊ីតកម្ម ការរលាក និងមានប្រយោជន៍សម្រាប់ជំងឺរលាកសន្លាក់ និងជំងឺអូតូអ៊ុយមីន។ របៀបធ្វើ យើងត្រូវការផ្លែប៉ោម១ផ្លែ ផ្លែសារី១ផ្លែ និងស្លឹកគីនឆាយមួយគុម្ព រួចចិតជាចំណិតៗ ដាក់ចូលម៉ាស៊ីនក្រឡុករួចដាក់ទឹក១កែវ ផឹកក្រោយអាហារពេលព្រឹកជាការល្អ។

២. ភេសជ្ជៈស្ពៃក្តោបពណ៌ស្វាយ៖ ការសិក្សាបានរកឃើញថា ការញ៉ាំស្ពែក្តោបពណ៌ស្វាយរាល់ថ្ងៃក្នុងបរិមាណ៩០ក្រាម ទៅ១០០ក្រាម គឺជួយកាត់ជាតិស្ករលើសក្នុងឈាមបានយ៉ាងល្អ ជំនួយក្រពះ ពោះវៀន ធ្វើឱ្យប្រព័ន្ធរំលាយអាហារដំណើរការបានល្អ។ របៀបធ្វើ យើងត្រូវស្ពៃក្ដោបពណ៌ស្វាយ១ចំហៀង និងផ្លែសារីចំនួន២ផ្លែ ហាន់ជាចំណិតៗ ដាក់ចូលម៉ាស៊ីនក្រឡុករួចថែមទឹក១កែវ ផឹកក្រោយអាហារថ្ងៃត្រង់ជាការល្អ។

៣. ភេសជ្ជៈត្របែក៖ តាមការសិក្សាស្រាជ្រាវបានបង្ហាញថាផ្លែត្របែកមានតួនាទីជួយការពារយើងពីជំងឺដូចជា កាត់បន្ថយកម្រិតជាតិស្ករក្នុងឈាម ជួយការពារពីបេះដូង ជួយបំបាត់ការឈឺចាប់នៃការមករដូវ និងបញ្ចុះទម្ងន់រក្សាសម្រស់ឲ្យក្មេងជាងវ័យ។ របៀបធ្វើ យើងត្រូវការត្របែកចំនួន១ផ្លែកន្លះ ប៉ោមខៀវ១ផ្លែ និងសារី១ផ្លែដូចគ្នា រួចចិតជាចំណិតៗ ដាក់ចូលម៉ាស៊ីនក្រឡុករួចដាក់ទឹក១កែវ ផឹកក្រោយអាហារពេលល្ងាចជាការល្អ។

៤. ភេសជ្ជៈមើមយេន៖ មើមយេន(Beetroot) គឺជារុក្ខជាតិម៉ើមដែលគេយកទៅក្រឡុកធ្វើជាភេសជ្ជៈលេខ១ជំនួយគ្រាប់ឈាមក្រហមក្នុងរាងកាយ បឺតជាតិពុលចេញពីតម្រងនោម ថែសុខភាពតម្រងនោមកុំឱ្យខ្សោយ។ របៀបធ្វើ យើងត្រូវការចំនួន៣ផ្លែ ប៉ោមចំនួន២ផ្លែ ស្លឹកគីនឆាយ១ដើម រួចចិតជាចំណិតៗ ដាក់ចូលម៉ាស៊ីនក្រឡុករួចដាក់ទឹក១កែវ ផឹកក្រោយអាហារពេលព្រឹកជាការល្អ ៕

អត្ថបទដោយ៖ ស្រីណុច