នៅក្នុងជីវិតគូស្នេហា និងប្តីប្រពន្ធ តែងមានជម្លោះ ឬមិនត្រូវរ៉ូវនឹងគ្នា ក៏ព្រោះតែមិនយល់ពីគ្នានៅចំណុចណាមួយមិនខានទេ។ ពេលសុភាពនារី និងប្រពន្ធ មិនទាន់ស្គាល់ធម្មជាតិរបស់បុរសជាដៃគូរបស់ខ្លួន នាំឱ្យទំនាក់ទំនងគ្មានភាពស្និតស្នាល ហើយក៏ដល់ផ្លូវបំបែកជាពីរផងដែរ។ ថ្ងៃនេះ យើងមកស្វែងយល់ពីចរិតនិស្ស័យបុរស ដែលសុភាពនារីត្រូវតែដឹង ដើម្បីរួមរស់ជាមួយគ្នាចុះសម្រុងបានល្អ៖

បើតាមអ្នកចិត្តវិទ្យាលោក John Gray ជាអ្នកនិពន្ធសៀវភៅ Men Are from Mars, Women Are from Venus បានលើកឡើងថា ពេលខ្លះ នារី និងបុរស មានលក្ខណៈផ្ទុយគ្នាដែរ។ ដូចជាពេលមានបញ្ហា នារីចូលនិយាយច្រើន ដើម្បីឱ្យបុរសជាដៃគូស្តាប់ និងយកចិត្តទុកដាក់តែប៉ុណ្ណោះ។ សម្រាប់បុរសវិញ ពេលមានបញ្ហាផ្នែកអារម្មណ៍ គេចង់ដកខ្លួនចេញពីនារីខ្លះ ព្រោះតែចង់មានសេរីភាព ឬចង់មានភាពជាម្ចាស់លើខ្លួនឯង។ ពេលនៅម្នាក់ឯងអស់ចិត្តហើយ គេក៏ចូលមកជិតនាងវិញ ធ្វើឱ្យស្នេហាកាន់តែកក់ក្តៅ។ 

លោក John Gray គូសបញ្ជាក់បន្ថែមថា ពេលនារីគ្រប់រូបយល់អំពីអត្តចរិតបុរសនៅត្រង់ចំណុចនេះ ក៏ជួយកាត់បន្ថែមបញ្ហាស្មុគស្មាញយ៉ាងច្រើន។ មានគូសង្សារមួយ មែកគី និងចន ជាមិត្តប្រុសរបស់នាងបានស្គាល់អស់ពេល ៦ខែមកហើយ អ្វីៗដូចជាមានភាពផ្អែមល្ហែម និងស្និតស្នាលគ្នាខ្លាំងណាស់។ នៅសុខៗស្រាប់តែចនដកខ្លួនគេចពីមែកគី។ មែកគី ចាប់ផ្តើមមិនយល់សោះថា ហេតុអ្វីនៅសុខៗ ចនបែរជាដកឃ្លាចេញឆ្ងាយពីខ្លួនបែបនេះ។ ធ្វើឱ្យអារម្មណ៍មែកគី ព្រួយបារម្ភ ខ្វាយខ្វល់ និងចង់ដឹងបញ្ហាកាន់តែលឿនឡើងហើយនាងនិយាយថា ខ្ញុំព្យាយាមធ្វើអ្វីគ្រប់យ៉ាងដើម្បីតែចន ប៉ុន្តែបញ្ហាកាន់តែអាក្រក់លើសដើម ពេលខ្ញុំឡូកដៃក្នុងរឿងនេះ។ ចនហាក់ដូចជាព្រងើយកន្តើយនឹងមែកគីខ្លាំងណាស់ មិនដឹងថា តើមែកគីធ្វើអ្វីខុសនោះទេ រឿងនេះធ្វើឱ្យមែកគីកាន់តែភ័យខ្លាចខ្លាំងណាស់។

មានសុភាពនារីជាច្រើន មានចម្លល់ថា ហេតុអ្វីបានជាខ្ញុំមានទំនាក់ទំនងជាមួយគេ (បុរសជាគូស្នេហ៍) ស្រាប់តែគេដកឃ្លាចេញពីខ្ញុំចឹង? នៅត្រង់ចំណុចនេះ ខ្ញុំចង់ឱ្យអ្នកយល់ពីចំណុចមួយរវាងបុរស និងនារី ហើយខ្លួនអ្នក(សុភាពនារី) ក៏ស្គាល់ច្បាស់ដែរថា ពេលអ្នកមានអារម្មណ៍មិនល្អ ភាពស្មុគស្មាញ និងរងសម្ពាសផ្លូវចិត្ត សុភាពនារី ចូលចិត្តនិយាយច្រើន ទៅកាន់ដៃគូរបស់ខ្លួន ប៉ុន្តែអ្នកកម្រចង់ទទួលចម្លើយពីបុរសខ្លាំងណាស់ ព្រោះអ្នកនិយាយនេះ ដើម្បីឱ្យដៃគូទទួលស្តាប់ និងយកចិត្តទុកដាក់លើខ្លួន ហើយខ្លួនអ្នកមានអារម្មណ៍ថា ស្រាលខ្លួន។

ព្រោះបុរស គេដកខ្លួនចេញ ពេលមានបញ្ហានេះ គេមិនចង់ឱ្យប្រពន្ធ ឬនារីដែលខ្លួនស្រឡាញ់មានបញ្ហាជាមួយនេះដែរ។ គេសុខចិត្តដលឃ្លាមួយពេលសិន ដើម្បីដោះស្រាយ និងម្ចាស់លើខ្លួនឯងឡើងវិញ ព្រោះបុរសចូលចិត្តសេរីភាព និងអំណាចរបស់ខ្លួន។ នេះជាធម្មជាតិរបស់បុរសភាគច្រើន ហើយក៏មិនចង់ឱ្យនារីឡូកដៃចូលក្នុងកិច្ចការ និងដោះស្រាយបញ្ហាណាមួយរបស់ខ្លួនដែរ។ ពេលនារីធ្វើបែបនេះ ធ្វើឱ្យបុរសមានអារម្មណ៍ថា ខ្លួនអន់ណាស់។ សុភាពនារីៗ គួរយល់ពីចំណុចនេះឱ្យបានល្អបំផុតចំពោះបុរសគ្រប់គ្នា៕ អត្ថបទដោយ៖ ទ្រ សុភាព