អ្នកវិទ្យាសាស្ត្រអ៊ីស្រាអែល ដែលជាអ្នកផលិតថ្នាំបង្ការជំងឺមហារីកដំបូងគេនៅក្នុងពិភពលោក បានអះអាងពីភាពជោគជ័យនៃដំណើរការពិសោធន៍លើសត្វកណ្ដុរ ដោយលោកបាននិយាយថា សារធាតុសកម្មនេះបានបង្ហាញពីប្រសិទ្ធភាពជាង៩០% ចំពោះសត្វកណ្តុរ ខណៈថ្នាំមហារីកនេះកំពុងតែបង្ហាញក្ដីសង្ឃឹមយ៉ាងធំធេងក្នុងការស្រោចស្រង់ជីវិតមនុស្សរាប់លាន។ នេះបើយោងតាមការចុះផ្សាយរបស់សារព័ត៌មាន Timesofisrael ។

ក្រុមស្រាវជ្រាវរបស់សាកលវិទ្យាល័យ Bar Ilan បានផលិតថ្នាំមហារីកម្យ៉ាងដែលជាសារធាតុ Peptide ខ្សែសង្វាក់នៃអាស៊ីតអាមីណូ ខណៈថ្នាំនេះត្រូវបានផលិតឡើងក្នុងគោលបំណងដើម្បីបញ្ឈប់កោសិកាមហារីក (ដុំសាច់) មិនឱ្យចូលទៅក្នុងឈាមបញ្ឈប់ការផ្លាស់ទីដុំសាច់ជុំវិញរាងកាយ។

យ៉ាងណាមិញយោងតាមការឲ្យដឹងរបស់សាស្រ្តាចារ្យ Jordan Chill នៃសាកលវិទ្យាល័យ Bar Ilan បាននិយាយថា ថ្នាំមហារីកដែលកំពុងពិសោធន៍ទៅកណ្ដុរនោះអត្រាប្រសិទ្ធភាពមានរហូតទៅដល់៩០% ដែលមានន័យថា សត្វកណ្តុរមានជំងឺមហារីកសុដន់ដែលបានទទួល សារធាតុ Peptide យ៉ាងហោចណាស់ ៩០% បានបញ្ឈប់ការវិវត្តនៃដុំសាច់យ៉ាងគួរឲ្យកត់សម្គាល់។

ជាក់ស្ដែងលោកបានសង្កត់ធ្ងន់ថា ទោះបីជាការសិក្សាពិសោធន៍ផ្តោតលើជំងឺមហារីកសុដន់ក៏ដោយ សារធាតុ Peptide ត្រូវបានគេរំពឹងនឹងមានប្រសិទ្ធភាពលើដុំសាច់រឹងទាំងអស់ដូចជាមហារីកក្រៅពីឈាម ខួរឆ្អឹង ឬកូនកណ្តុរ។

ការស្រាវជ្រាវពីមុនបានបង្ហាញថា ១២% នៃអ្នកជំងឺដែលមានរោគវិនិច្ឆ័យជំងឺមហារីកសុដន់បន្តវិវត្តទៅជាជំងឺមេតាស្ទិក ដែលអត្រារស់រានមានជីវិតយ៉ាងយូររយៈពេល៥ឆ្នាំ ខណៈការព្យាបាលដោយប្រើគីមីត្រូវបានប្រើដើម្បីសម្លាប់កោសិកាមហារីកឱ្យបានច្រើនតាមតែអាចធ្វើទៅបាន ប៉ុន្តែវាមិនអាចការពារកោសិកាដែលនៅសេសសល់បាននោះទេ។

ដោយឡែកវេជ្ជបណ្ឌិត Hava Gil-Henn បានលើកឡើងដូច្នេះថា ការរីកចម្រើននៃថ្នាំការពារជំងឺមហារីកគឺគួរឱ្យរំភើបខ្លាំងណាស់ ព្រោះថាសព្វថ្ងៃនេះមិនមានថ្នាំណាមួយនៅក្នុងការផលិតដែលអាចការពារការរីករាលដាលនៃកោសិកាមហារីកនោះទេ គឺមានតែថ្នាំដែលផលិតដោយប្រទេសអ៊ីស្រាអែលប៉ុណ្ណោះ ដែលរកឃើញថាមានប្រសិទ្ធភាពខ្ពស់ហួសពីការរំពឹង ៕

អត្ថបទដោយ៖ ស្រីណុច