នៅក្នុងអន្តរទំនាក់ទំនងសង្គម ដំណើរការផ្លូវចិត្ត ឬធម្មជាតិនៃចិត្តរបស់បុគ្គលអាចនឹងត្រូវបានគេកត់សម្គាល់បានដោយងាយ តាមរយៈលំនាំអាកប្បកិរិយាដែលមានលក្ខណៈដដែលៗដ៏មានអត្ថន័យ ខណៈដែលមនុស្សភាគច្រើន រួមទាំងបុគ្គលខ្លួនឯងផ្ទាល់ បាននិងកំពុងមើលរំលង។ រាល់អាកប្បកិរិយាដែលបុគ្គលបានស្ដែងចេញក្នុងពេលបច្ចុប្បន្ន មិនត្រឹមតែឆ្លុះបញ្ចាំងពីដំណើរការផ្លូវចិត្តរបស់គេនោះទេ តែថែមទាំងមានទំនាក់ទំនងជាមួយនឹងបទពិសោធន៍ពីអតីតកាលរបស់បុគ្គលនោះផងដែរ។ ខាងក្រោមនេះជាឧទាហរណ៍មួយចំនួនដែលអ្នកអាចធ្វើការសង្កេតក្នុងកំឡុងពេលអន្តរទំនាក់ទំនងសង្គម៖
១. បុគ្គលដែលស្រឡាញ់អំណាចខ្លាំងខុសពីធម្មតា អាចជាអ្នកដែលធ្លាប់រងគ្រោះពីការរំលោភបំពានដោយការប្រើប្រាស់អំណាច។
២. បុគ្គលដែលស្រឡាញ់ឬឱ្យតម្លៃលុយខ្លាំងខុសពីធម្មតា អាចជាអ្នកដែលធ្លាប់រងគ្រោះដោយសារអំណាចទឹកប្រាក់យ៉ាងធ្ងន់ធ្ងរ។
៣. បុគ្គលដែលចូលចិត្តនិយាយល្អពីខ្លួនឯងច្រើនខុសពីធម្មតា អាចជាអ្នកដែលធ្លាប់រងគ្រោះពីការរើសអើង ឬមើលងាយពីអ្នកដទៃយ៉ាងធ្ងន់ធ្ងរ។
៤. បុគ្គលដែលមិនចូលចិត្តស្តាប់យោលបល់របស់អ្នកដទៃខុសពីធម្មតា អាចជាអ្នកដែលធ្លាប់រងគ្រោះពីការស្ដីបន្ទោសយ៉ាងធ្ងន់ធ្ងរទាក់ទងទៅនឹងការបញ្ចេញមតិយោបល់ផ្សេងៗ។
៥. បុគ្គលដែលចូលចិត្តចង់ដឹងរឿងរបស់អ្នកដទៃច្រើនខុសពីធម្មតា អាចជាអ្នកដែលធ្លាប់រងគ្រោះពីទង្វើរអយុត្តិធម៌មួយចំនួនកាលពីមុនយ៉ាងធ្ងន់ធ្ងរ។
៦. បុគ្គលដែលចូលចិត្តធ្វើការវាយតម្លៃអ្នកដទៃខុសពីធម្មតា អាចជាអ្នកដែលធ្លាប់រងគ្រោះពីការវាយតម្លៃអវិជ្ជមានយ៉ាងធ្ងន់ធ្ងរមកលើខ្លួន។
៧. បុគ្គលដែលចូលចិត្តប្រើប្រាស់អ្នកដទៃខុសពីធម្មតាដើម្បីប្រយោជន៍ផ្ទាល់ខ្លួន អាចជាអ្នកដែលធ្លាប់រងគ្រោះពីការដែលត្រូវបានគេប្រើប្រាស់យ៉ាងអយុត្តិធម៌។ល។
ចំណាំ៖ លំនាំអាកប្បកិរិយាដែលមានលក្ខណៈដដែលៗនឹងត្រូវបានកត់សម្កាល់ និងធ្វើការផ្លាស់ប្តូរទៅរកភាពប្រក្រតីឡើងវិញ លុះត្រាតែបុគ្គលចេះធ្វើការកត់សម្គាល់ ស្វែងយល់ និងទទួលស្គាល់ពីធម្មជាតិនៃអាកប្បកិរិយាទាំងនោះបន្តិចម្ដងៗដោយខ្លួនឯង ឬដោយមានការជួយតម្រង់ទិសពីអ្នកឯកទេសខាងផ្នែកផ្លូវចិត្ត៕
ប្រភព៖ អ្នកចិត្តសាស្រ្តការងារ និងស្ថាប័ន
អត្ថបទ៖ ភោគ ម៉ារី