នៅថ្ងៃទី១៧ ខែធ្នូ ឆ្នាំ២០២២កន្លងមកនេះ ក្រុមការងារHealthy Cambodia បានធ្វើការជួបសម្ភាសដោយផ្ទាល់ជាមួយនឹងវេជ្ជបណ្ឌិតឯកទេសបេះដូង និងពង្រីកសរសៃឈាមបេះដូងមកពីមន្ទីរពេទ្យបាងកកប្រទេសថៃ គឺវេជ្ជបណ្ឌិតWichai Jiraroj-ungkun លើប្រធានបទជំងឺសរសៃឈាមបេះដូង និងកត្តានាំឱ្យកើតមានជំងឺសរសៃឈាមបេះដូងដើម្បីចែករំលែកចំណេះដឹងសុខភាពបន្ថែមជូនដល់ប្រជាជនកម្ពុជា។

នៅក្នុងកិច្ចសម្ភាសផ្ទាល់មួយនេះ លោកវេជ្ជបណ្ឌិតបានពន្យល់ថា ជំងឺសរសៃឈាមបេះដូងបែងចែកជា២ប្រភេទគឺ ស្ទះសរសៃឈាមបេះដូង និងដាច់សរសៃឈាមបេះដូង។ វេជ្ជបណ្ឌិតWichai Jiraroj-ungkun បានពន្យល់លម្អិតថា កត្តាដែលធ្វើឱ្យមនុស្សកើតមានជំងឺនេះមាន២កត្តាធំៗ ពោលគឺកត្តាដែលអាចគ្រប់គ្រងបាន និងកត្តាដែលមិនអាចគ្រប់គ្រងបាន។

កត្តាដែលអាចគ្រប់គ្រងបាន មានន័យថាជំងឺសរសៃឈាមបេះដូងនេះកើតចេញពីទម្លាប់ ការរស់នៅប្រចាំថ្ងៃ ប្រសិនបើមានទម្លាប់ល្អ ការរស់នៅល្អភាគរយនៃការកើតជំងឺនេះក៏មានភាគរយទាបផងដែរ។ កត្តាដែលអាចគ្រប់គ្រងបានរួមមានដូចជា ជំងឺប្រចាំកាយ(លើសសម្ពាធឈាម ឬទឹកនោមផ្អែម), បរិមាណខ្លាញ់ក្នុងរាងកាយ, ការញ៉ាំចំណីរអារហារប្រចាំថ្ងៃ និងការហាត់ប្រាណជាដើម។ ហេតុនេះ ប្រសិនបើបងប្អូនមានទម្លាប់ល្អលើការញ៉ាំ ការគេង ការហាត់ប្រាណ ភាគរយនៃការរងផលប៉ះពាល់នៃជំងឺនេះក៏មានតិចផងដែរ។

ដោយឡែក កត្តាដែលមិនអាចគ្រប់គ្រងបានវិញ រួមមានដូចជាកត្តាហ្សែនពីកំណើត, កត្តាអាយុ, កត្តាភេទ និងកត្តាពូជសាសន៍ជាដើម។ មានន័យថា ប្រសិនបើជំងឺសរសៃឈាមបេះដូងរបស់បងប្អូនកើតចេញពីកត្តាទាំងនេះគឺមិនអាចគ្រប់គ្រងបាននោះទេ មានវិធីតែម្យ៉ាងគឺការពារកុំឱ្យធ្ងន់ធ្ងរ និងព្យាបាលឱ្យបានឆាប់បំផុតតាមដែលអាចធ្វើទៅបាន។

ក្រៅពីកត្តានាំឱ្យកើតមានជំងឺសរសៃឈាមបេះដូងនេះ សូមបង្ហាញឱ្យឃើញពីព័ត៌មានខ្លះៗនៃមន្ទីរពេទ្យបាងកក នៅក្នុងប្រទេសថៃ ដែលជាមន្ទីរពេទ្យដែល វេជ្ជបណ្ឌិតWichai Jiraroj-ungkun កំពុងតែបម្រើការ។ បងប្អូនដឹងទេថា មន្ទីរពេទ្យបាងកកប្រទេសថៃ កើតមានឡើងតាំងពីឆ្នាំ១៩៧២ឯណោះ ពោលគឺមកដល់ពេលនេះមានអាយុកាលជាង៥០ឆ្នាំទៅហើយ។ បច្ចុប្បន្ននៅក្នុងមន្ទីរពេទ្យមានគ្លីនិកចំនួន២០ធំៗទៀត ហើយឯកទេសដែលពូកែបំផុតនៅក្នុងមន្ទីរពេទ្យបាងកករួមមានផ្នែកជំងឺមហារីក ជំងឺបេះដូងដែលជាឯកទេសរបស់លោកវេជ្ជបណ្ឌិតផ្ទាល់ និងឯកទេសផ្នែកជំងឺប្រព័ន្ធប្រសាទខួរក្បាល។

សូមរម្លឹកផងដែរថា កិច្ចសម្ភាសផ្ទាល់រវាងក្រុមការងារHealthy Cambodia និងវេជ្ជបណ្ឌិតឯកទេសដ៏ល្បីនិងមានបទពិសោធន៍យូរឆ្នាំនេះអាចធ្វើទៅបាន ដោយសារមានការសម្របសម្រួលពីការិយាល័យមន្ទីរពេទ្យអន្តរជាតិប្រចាំប្រទេសកម្ពុជាគឺ MedCreate។ MedCreate គឺជាការិយាល័យតំណាងមន្ទីរពេទ្យអន្តរជាតិប្រចាំនៅប្រទេសកម្ពុជា ដែលប្រៀបដូចជាបុគ្គលិកប្រចាំកាយរបស់ពេទ្យក្រៅស្រុកនៅក្នុងប្រទេសខ្មែរផងដែរ។ រាល់ព័ត៌មាន ការសាកសួរយោបល់ ប្រឹក្សាពេទ្យ និងការរៀបចំឯកសារផ្សេងៗជាច្រើនអំពីពេទ្យនៅក្រៅប្រទេសមិនថាប្រទេសថៃ សិង្ហបុរី ឥណ្ឌា គឺបងប្អូនអាចទំនាក់ទំនងទៅក្រុមការងារMedCreateបានដោយឥតមានគិតថ្លៃមួយកាក់មួយសេនឡើយ៕

អត្ថបទដោយ៖ កញ្ញា លីហួយ