មនុស្សភាគច្រើន មិនទាន់ឱ្យតម្លៃសុខភាពប៉ុន្មានទេ លុះត្រាកើតជំងឺ និងធ្លាក់ខ្លួនឈឺ ទើបនិយាយថា ខ្ញុំស្រឡាញ់សុខភាព។ បញ្ហាជំងឺបេះដូង ត្រូវបានគេសង្កេតឃើញថាមានអត្រាកើតច្រើន ជាពិសេសបញ្ហាគាំងបេះដូង អាចបណ្តាលឱ្យស្លាប់ ឬគេងស្លាប់ម្នាក់ឯងជារឿយៗ។ 

យោងតាមមជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក www.cdc.gov បានឱ្យដឹងថា រោគសញ្ញានៃជំងឺបេះដូងជួនកាលជំងឺបេះដូងអាច "ស្ងាត់" ហើយមិនត្រូវបានគេធ្វើរោគវិនិច្ឆ័យទេ រហូតទាល់តែមនុស្សម្នាក់មានសញ្ញា ឬរោគសញ្ញានៃការគាំងបេះដូង ជំងឺខ្សោយបេះដូង ឬចង្វាក់បេះដូងលោតខុសប្រក្រតី។

ប្រភពដដែលបានបញ្ជាក់ថា រោគសញ្ញាដែលយើងអាចកត់សម្គាល់បានពាក់ព័ន្ធបញ្ហាគាំងបេះដូងមានដូចជា ឈឺទ្រូង ឬមិនស្រួល ឈឺខ្នងផ្នែកខាងលើ ឬការរំលាយអាហារ ក្រហាយទ្រូង ចង្អោរ ឬក្អួត អស់កម្លាំងខ្លាំង មិនស្រួលរាងកាយផ្នែកខាងលើ វិលមុខ និងដង្ហើមខ្លី។ ចង្វាក់បេះដូងលោតញាប់ (Arrhythmia)៖ ញ័រទ្រូង (ញ័រទ្រូង)។ សម្រាប់អ្នកជំងឺខ្សោយបេះដូង៖ ដង្ហើមខ្លី អស់កម្លាំង ឬហើមជើង កជើង ពោះ ឬសរសៃក។

ចំណែកកត្តាហានិភ័យនៃជំងឺបេះដូងកើតឡើងនៅពេល សម្ពាធឈាមខ្ពស់ កូលេស្តេរ៉ុលក្នុងឈាមខ្ពស់ និងការជក់បារី គឺជាកត្តាហានិភ័យចម្បងនៃជំងឺបេះដូង។តាមការសិក្សាស្រាវជ្រាវកន្លងមកបានឱ្យដឹងថា ប្រហែលពាក់កណ្តាលនៃប្រជាជននៅសហរដ្ឋអាមេរិក(៤៧%)មានយ៉ាងហោចណាស់កត្តាហានិភ័យមួយក្នុងចំណោមកត្តាហានិភ័យទាំងបីនេះ។

សម្រាប់កត្តាហានិភ័យផ្សេងទៀត អាចកើតមានជំងឺបេះដូងបាន ដោយសារអ្នកជំងឺមានជំងឺទឹកនោមផ្អែម, បញ្ហាលើសទម្ងន់ ឬធាត់, របបអាហារមិនល្អ,អសកម្មរាងកាយ និងការប្រើប្រាស់គ្រឿងស្រវឹងច្រើនពេក។

សូមបញ្ជាក់ថា ដើម្បីជៀសឆ្ងាយពីជំងឺបេះដូង ក្រុមវេជ្ជបណ្ឌិតជំនាញបានណែនាំឱ្យអ្នកជំងឺបេះដូងស្រាប់ និងមិនទាន់កើតជំងឺនេះ ត្រូវធ្វើលំហាត់ប្រាណ វាជាវិធីដ៏ល្អបំផុត ក្នុងការព្យាបាល និងការពារជំងឺបេះដូង។ រួមទាំងការបរិភោគអាហារដែលមានសុខភាពល្អ ការប្រើថ្នាំតាមវេជ្ជបញ្ជា និងវិធីជួយអ្នកឱ្យឈប់ជក់បារី ការប្រឹក្សាដើម្បីស្វែងរកវិធីបំបាត់ភាពតានតឹង និងធ្វើអោយសុខភាពផ្លូវចិត្តប្រសើរឡើង រួមទាំងការថែទាំសុខភាពរបស់អ្នក ជួបជាមួយអ្នកឯកទេសផ្នែកលំហាត់ប្រាណ និងអ្នកឯកទេសផ្នែកអាហារូបត្ថម្ភ អ្នកព្យាបាលរាងកាយ និងអ្នកប្រឹក្សា ឬអ្នកជំនាញសុខភាពផ្លូវចិត្តបន្ថែម។

សារលើកទឹកចិត្ត៖ បងប្អូនគួរប្រុងប្រយ័ត្ន កុំឱ្យជួបបញ្ហាដូចខាងលើនេះ អ្វីដែលបងប្អូនគួរធ្វើនោះគឺ គ្រប់គ្រងទម្ងន់ ប្រយុទ្ធប្រឆាំងនឹងជំងឺធាត់ និងគ្រប់គ្រងកម្រិតជាតិស្ករក្នុងឈាម និងកូលេស្តេរ៉ុលផងដែរ ជាពិសេសទៀតនោះបើចំពោះក្រុមមនុស្សចាស់បងប្អូនគួរមើលថែឱ្យបានល្អបំផុតនិងនាំគាត់ទៅធ្វើលំហាតប្រាណជាប្រចាំ ហើយជូនគាត់ទៅជួបជាមួយនឹងគ្រូពេទ្យ ដើម្បីពិនិត្យសុខភាពគាត់ជាប្រចាំ ៕

អត្ថបទដោយ ៖ ជុជ ណាំឃីម