ក្រោយពីបញ្ចប់ការប្រលងបាក់ឌុប ក៏ដូចជាបានដឹងពីលទ្ធផល ពេលវេលាក្នុងការប្រលងចូលវិស័យសុខាភិបាលបានកាន់តែខិតជិតមកដល់។ មិនមែនទាល់តែទទួលបាននិទ្ទេសខ្ពស់A B C ទើបអាចប្រលងពេទ្យបាននោះទេ ប៉ុន្តែប្អូនៗឱ្យតែជាប់បាក់ឌុប គឺអាចមានឱកាសចូលប្រលងបានគ្រប់គ្នា។ ការប្រលងចូលសាកលវិទ្យាល័យវិទ្យាសាស្ត្រសុខាភិបាលអាចថាជាការពិបាកបន្តិច ដោយសារជារៀងរាល់ឆ្នាំមានបេក្ខជនជាច្រើនពាន់នាក់ ចូលរួមប្រលងប៉ុន្តែមានតែបេក្ខជនខ្ទង់រយនាក់ប៉ុណ្ណោះដែលត្រូវបានជ្រើសរើសយក។

ឆ្លងកាត់បទពិសោធន៍ជាក់ស្តែង កញ្ញា ប៉េងធី គីមសាង ជានិស្សិតអាហាររូបករណ៍ផ្នែកវេជ្ជសាស្ត្រនៃសាលកវិទ្យាល័យវិទ្យាសាស្ត្រសុខាភិបាល(សាលាក្រហម) បានចែករំលែកពីទិចនិកខ្លះៗក្នុងការ ប្រលងជាប់ក្នុងវិស័យសុខាភិបាល ក៏ដូចជាទទួលបានអាហាររូបករណ៍នៅសាលាក្រហម។ ដំបូងបំផុតត្រូវដឹងថា ការប្រលងពេទ្យមានការប្រឡង៣មុខវិជ្ជា គឺគណិត គីមី និងជីវៈ។ ហេតុនេះអ្វីដែលអ្នកត្រូវធ្វើមានដូចជា៖

១ ផ្ដោតរៀនឱ្យបានច្បាស់ពីលើមុខវិជ្ជា៣មុខជាធំៗដូចជាគណិត គីមី និងជីវៈ។

២ ព្យាយាម​ឆ្លើយសំណួរ និងរៀនធ្វើលំហាត់ក្នុងសៀវភៅពុម្ពឱ្យអស់ កុំរំលងដាច់ខាត។ ព្រោះថាវិញ្ញាសារប្រលងពេទ្យដូចឬស្រដៀងគ្នានឹងលំហាត់ក៏ដូចជាសំណួរក្នុងសៀវភៅពុម្ពថ្នាក់ទី១២។

៣ គួរព្យាយាមយកវិញ្ញាសារចាស់ៗ ទាំងវិញ្ញាសារប្រលងពេទ្យឆ្នាំមុនៗ មករៀនធ្វើឱ្យអស់ ដើម្បីឱ្យដឹងថាតើខ្លួនឯងនៅខ្សោយមេរៀន ឬលំហាត់ណា ងាយស្រួលទៅរៀនឡើងវិញឬសួរគ្រូបន្ថែម។ ជាពិសេស គួររម្លឹកឡើងវិញឱ្យអស់មុនប្រលងបាក់១ទៅ២ខែ។

៤ ក្នុងអំឡុងពេលរៀនទី១២ កុំបោះបង់ចោលការរៀនភាសាបរទេសឱ្យសោះ។

៥ អំឡុងពេលរងចាំ លទ្ធផលបាក់ឌុប ចូរព្យាយាមយកវិញ្ញាសារប្រលងពេទ្យចាស់ៗ ក៏ដូចជាសំណួរមេរៀន លំហាត់ ក្នុងសៀវភៅពុម្ពថ្នាក់ទី១២មកធ្វើ ហើយកំណត់ម៉ោងនាទីឱ្យដូចជាការប្រលងមែនទែន។

៦ ចំពោះរបៀបសរសេរ ពេលប្រលងជាក់ស្តែង គួរព្យាយាមសរសេរឱ្យមានសណ្ដាប់ធ្នាប់ កុំសរសេរកាត់ៗខ្លីៗពេក ព្រោះកំណែគេឱ្យពិន្ទុតាមចំណុចនីមួយៗ។

ចំពោះលក្ខខណ្ឌខ្លះ ប្រសិនបើសិស្សនិស្សិតចង់ក្លាយជាគ្រូពេទ្យ វេជ្ជបណ្ឌិត ឱសថការី ឬអ្នកជំនាញក្នុងវិស័យសុខាភិបាល ដើម្បីទទួលបានអាហាររូបករណ៍១០០% នៅសាកលវិទ្យាល័យវិទ្យាសាស្ត្រសុខាភិបាល ត្រូវគោរពតាមលក្ខខណ្ឌទាំងនេះដូចជា៖

១ បេក្ខជនទាំងអស់ត្រូវតែជាសិស្សដែលទើបតែប្រលងជាប់បាក់ឌុបថ្មីៗ ឬទើបប្រលងជាប់ក្នុងឆ្នាំតែ១ដែលអ្នកប្រលងពេទ្យ។

២ ដាច់ខាតបេក្ខជនត្រូវតែមិនមានទទួលបានអាហារូបករណ៍ពីក្រសួងនៅសាលាផ្សេងៗ ដែលជាអាហារូបករណ៍ពីក្រសួង ព្រោះមនុស្សម្នាក់អាចទទួលបានអាហារូបករណ៍ពីក្រសួងតែ១ប៉ុណ្ណោះ។

៣ អ្នកត្រូវតែជាបេក្ខជនដែល ប្រលងជាប់លំដាប់ពិន្ទុខ្ពស់ជាងគេ១០%នៃ បេក្ខជនដែលត្រូវជ្រើសរើសសរុបតាមជំនាញ។ មានន័យថា​ បើសាលាក្រហមរើសសិស្សនិស្សិតឱ្យជាប់ផ្នែកវេជ្ជសាស្រ្ត៣៥០នាក់ នោះមានតែសិស្ស៣៥នាក់ដែលមានពិន្ទុខ្ពស់ជាងគេប៉ុណ្ណោះដែលនឹងទទួលបានអាហារូបករណ៍។

មួយវិញទៀត អ្វីដែលមិនអាចភ្លេចៗបានប្អូនៗគួរតែ ថែរក្សាសុខភាពឱ្យបានល្អ ចៀសវាងខ្សោយ ឈឺនៅថ្ងៃប្រលង។ សង្សឹមថាគន្លឹះខ្លះ ខាងលើនេះនឹងអាចជួយអ្នកឱ្យសម្រេចក្តីស្រមៃលើវិស័យសុខាភិបាលបាន៕

អត្ថបទដោយ៖ Senghong