បញ្ហាសុខភាពដើមទ្រូង គឺជាផ្នែកសំខាន់មួយដូចគ្នាសម្រាប់មនុស្សស្រីគ្រប់រូបផងដែរ ខណៈដែលមានមនុស្សស្រីមិនតិចនោះទេ ដែលត្រូវប្រឈមមុខទៅនឹងបញ្ហាដើមទ្រូងយាធ្លាក់ មិនស្អាត និងខ្លះទៀតបែរជាកើតដុំគីស ឬកើតមហារីកប៉ះពាល់ដល់អាយុជីវិតក៏មាន។

យ៉ាងណាមិញ ដើម្បីទប់ស្កាត់នូវការកើតបញ្ហា និងជួយពង្រឹងទៅដល់សុខភាពដើមទ្រូងឱ្យមានការលូតលាស់ល្អ ប្រភពចេញផ្សាយ WebMD បានបង្ហាញនូវក្រុមអាហារចំនួន៥ក្រុមដែលមានប្រសិទ្ធភាពធំជំនួយដល់ដើមទ្រូងប្រសិនញុំាជាប្រចាំថ្ងៃ៖

១. ខាត់ណា៖ ផ្កាខាត់ណាខៀវ ផ្កាខាត់ណាស និងដើមខាត់ណា មានផ្ទុកទៅដោយវីតាមីន A និង C ខ្ពស់ ដោយវីតាមីនទាំងនេះ គឺជាសារធាតុប្រឆាំងអុកស៊ីតកម្ម ដែលអាចជួយកម្ចាត់ជាតិពុល និងបង្ការសារធាតុបង្កមហារីក ដែលអាចបង្កឱ្យមានជំងឺមហារីកសុដន់។

២. បន្លែផ្លែឈើ ពណ៌ក្រហម និងទឹកក្រូច៖ សារធាតុពណ៌ធម្មជាតិដែលមាននៅក្នុងប៉េងប៉ោះ ផ្លែក្រូច ផ្លែស្ត្របឺរី ការ៉ុត និងដំឡូងផ្អែម រាងកាយនឹងបំប្លែងពួកវាទៅជាវីតាមីន A ដែលមានសារៈសំខាន់ក្នុងការបន្ថយនូវហានិភ័យនៃប្រភេទមហារីកសុដន់មួយចំនួន និងជួយពង្រឹងដល់ការលូតលាស់របស់សុដន់ផងដែរ។

៣. ខ្លាញ់ត្រី៖ ខ្លាញ់ត្រី មានផ្ទុកទៅដោយវីតាមីន D និងអូមេហ្គា ៣ ដែលអាចប្រឆាំងមហារីកស្ទើរតែគ្រប់ប្រភេទនៅក្នុងសរីរាង្គកាយ។​ ទន្ទឹមនឹងនេះទៀតសោត ប្រភេទខ្លាញ់ត្រីនេះ ក៏ត្រូវបានគេរកឃើញថា មានប្រយោជន៍នៅក្នុងការថែរក្សាសុដន់មនុស្សស្រី ឱ្យការលូតលាស់កាន់តែប្រសើរ និងកម្ចាត់នូវមេរោគ បាក់តេរីដែលងាយធ្វើឱ្យកើតជាដុំគីស ឬរាលដាករោគមហារីក។

៤. សណ្តែក៖ សណ្តែកទាំងអស់សុទ្ធតែត្រូវបានគេចាត់ចូលជាក្រុមអាហារដែលជំនួយដល់សុខភាពបានខ្ពស់។ តួយ៉ាងមានការសិក្សាស្រាវជ្រាវពិសេសមួយទៅលើសណ្តែកខ្មៅ ត្រូវបានគេរកឃើញនូវកម្រិតអង់ទីអុកស៊ីដង់ខ្ពស់ ដោយអាចជួយកាត់បន្ថយហានិភ័យនៃជំងឺមហារីកសុដន់ ប្រភេទផ្សេងទៀតនៃជំងឺមហារីក ក៏ដូចជាទប់ស្កាត់ជំងឺមួយចំនួនកុំឱ្យវិវត្តន៍ផងដែរ។ បន្ថែមជាមួយគ្នានេះ សណ្តែកខ្មៅក៏ជាប្រភពដ៏រឹងមាំនៃ ergothioneine ដែលជាអាស៊ីតអាមីណូដែលការពារ DNA ដូចគ្នា។

៥. គ្រាប់វ៉ាលណាត់ (Walnut)៖ គ្រាប់ធញ្ញជាតិប្រភេទនេះ មានផ្ទុកជាមួយនឹងសារជាតិសម្បូរបែបរួមមាន អូមេហ្គា៣ វីតាមីន B6 ប្រូតេអ៊ីន ជាតិដែក និងម៉ាញ៉េស្យូម ដោយមានសមត្ថភាពក្នុងការការពារសុដន់ មិនឱ្យកើតមហារីក និងកាត់បន្ថយការកកើតនូវប្រភេទសាច់គីស។

គូសបន្ថែមផងដែរ សម្រាប់ស្រ្តីគ្រប់រូបដែលស្រលាញ់ដើមទ្រូងរបស់ខ្លួន និងចង់រក្សាឱ្យវាស្ថិតនៅក្នុងទម្រង់មូលក្លំស្អាត មិនងាយយារ ធ្លាក់ គួរតែមានទម្លាប់បាក់អាវក្នុងរឹបតឹងពេក កុំព្យាយាមប្រើប្រាស់នូវផលិតពង្រីក បង្រួមដើមទ្រូងដោយគ្មានប្រភពច្បាស់លាស់ គ្មានការណែនាំឬផលិតផលមិនបានចេញការអនុញ្ញាតពីក្រសួងសុខាភិបាល។ មួយវិញទៀតនៅយប់គួរតែព្យាយាមគេងដោយគ្មានអាវក្នុងល្អ ពីព្រោះវាមិនត្រឹមតែជួយរក្សាដើមទ្រូងប៉ុនណោះទេ គឺអាចជួយសម្រួលដល់ខ្យល់ដង្ហើមនាពេលយប់បានមួយកម្រិតទៀត៕

អត្ថបទដោយ៖ ប៉ាវ ភក្តី​