កុំយកគំនិតសង្គមខាងក្រៅមកគិតជំនួយកូនថា កូនឱ្យតម្លៃសម្ភារៈនិយម ទើបមានក្តីសុខ។ ការពិត! កូនត្រូវការវត្តមានរបស់ឪពុកម្តាយជាងរបស់អ្វីៗ ទាំងអស់។ ព្រោះសម្ភារៈជួយផ្លូវចិត្តកូនមានភាពកក់ក្តៅមួយពេលតែប៉ុណ្ណោះ។ សម្រាប់វត្តឪពុកម្តាយជួយឱ្យកូនកក់ក្តៅ មានក្តីស្រឡាញ់អស់មួយជីវិត។ នេះជាសម្តីបងស្រី សំ យុវតី ជាម្ចាស់ Super Depo ជាភរិយារបស់លោកគ្រូ សំ កុសល ម្ចាស់ក្រុមហ៊ុនបក្សីផងដែរ។ ហើយគាត់បានលើកឡើងថា ធ្វើជារកស៊ីផង មើលកូនផង សួរថា ហត់ទេ? គឺហត់ណាស់ ប៉ុន្តែដើម្បីកូន ដើម្បីគ្រួសារ យើងត្រូវតែខំប្រឹងបន្ត។ ការប្រឹងនេះ ជាការប្រឹងហើយក្តីស្រឡាញ់ ធ្វើឱ្យខំដោយមានន័យណាស់ក្នុងជីវិតនេះ។
ទោះបីជាបងស្រី សំ យុវតី រវល់ការងារក៏ដោយ ក៏ត្រូវតែឆ្លៀតពេលនៅក្បែរខ្លះដែរ។ ឪពុកម្តាយខ្លះតែងនិយាយប្រាប់កូនថា ខ្លួនរវល់ការងារណាស់ ប៉ាម៉ាក់ធ្វើគ្រប់យ៉ាងដើម្បីកូន…! កូនក៏ឆ្លើយថា សូមប៉ាម៉ាក់ទៅធ្វើការចុះ! ប៉ុន្តែនៅក្នុងចិត្តកូនសួរថា ម៉ាក់ប៉ាធ្វើគ្រប់យ៉ាងដើម្បីមែន ហេតុអ្វីប៉ាម៉ាក់គ្មានពេលឱ្យត្រឹមតែ ៥នាទីនៅជាមួយកូន? ឪពុកម្តាយកុំរវល់គ្មានពេលវេលាឱ្យកូន នៅក្បែរកូនផងណា! នេះជារឿងទី១.
សម្រាប់រឿងទី២. បង្វឹកកូនឱ្យមានវិន័យ។ បងស្រី សំ យុវតី បានប្រាប់ថា ចូរបង្វឹកកូននៅតូចឱ្យមានវិន័យ កុំឱ្យកូនរស់តាមអារម្មណ៍គឺលេសច្រើនជាអ្នកដឹកនាំជីវិត។ ពេលព្រឹកឡើងភ្ញាក់ពីគេង កូនស្រីបង យុវតី បានប្រាប់ដោយសំឡេងតិចៗ ថា ថ្ងៃនេះកូនផ្តាសា កូនឈឺក កូនអត់ទៅរៀនទេ ហើយកូនក៏អត់ទៅរៀនហែលទឹកដែរ។ ដោយឃើញកូនបែបនេះ បង យុវតី បារម្ភពីកូនក៏បានឆ្លើយថា អ៊ីចឹងថ្ងៃនេះ កូននៅផ្ទះណា! បើកូនអត់ស្រួលខ្លួនទេ ចាំម៉ាក់សុំច្បាប់សាលាឱ្យឈប់សម្រាកមួយថ្ងៃ ឈប់យំទៅណាកូនស្រីម៉ាក់!
ស្អែកឡើង! ស្រាប់តែខាងសាលាសុំអញ្ចើញឪពុកម្តាយមកដល់សាលាដោយសន្ទនាជាមួយបង សំ យុវតី ថា កូនបងស្រីផ្តាសាមែនទេ? គាត់ឆ្លើយថា បាទ!...។ បងស្រីនាំកូនទៅជួបពេទ្យ ឬបានលេបថ្នាំតិចតូចដែរទេ? គាត់ឆ្លើយថា អត់បានលេបថ្នាំទេ! ហើយអ្នកគ្រូសួរបន្តថា ពេលនេះ! កូនបងជាហើយ? គាត់ឆ្លើយថា ជាហើយ…។ នេះជាមេរៀនមួយមានតម្លៃបញ្ជាក់ថា ក្តីស្រឡាញ់និងការបាម្ភរបស់ឪពុកម្តាយចំពោះសុខភាពកូនពិតជាសំខាន់ណាស់។ ការពិត! មានក្មេងច្រើន អត់ចង់ទៅរៀនតែងបង្កើតលេសឈឺក្បាល អត់ស្រួលខ្លួន និងយំ…ជាដើម។
ពេលឪពុកម្តាយគាំទ្រសកម្មភាពកូនបែបនេះ លេសនេះក៏ចូលក្នុងខួរក្បាលកូន។ ពេលណាកូនបងគ្មានអារម្មណ៍ល្អទេ អ័រម៊ូនខួរក្បាលក៏បញ្ចេញមកប្រាប់ថា ថ្ងៃនេះ គួរឈប់សម្រាក…ហើយកូនក៏បង្កើតលេសថា ឈឺ…។ ក្មេងមានបញ្ហាធំទៅថ្ងៃអនាគត មិនមែនគេគ្មានសមត្ថភាពនោះទេ មកពីគេសម្បូរលេសដើម្បីការពារខ្លួនកុំឱ្យជីវិតរុលទៅមុខ។ តើនរណាជាអ្នកបង្កើតលេសធំក្នុងជីវិតកូន? គឺឪពុកម្តាយជាអ្នកគាំទ្រកូននេះឯង។ រឿងខ្លះ ឪពុកម្តាយកុំការពារកូនច្រើនពេក ត្រូវប្រាប់កូនថា ការរៀនសូត្រជាវិន័យ ធ្វើឱ្យកូនចេះដឹងទៅថ្ងៃអនាគត។ ពេលកូនមានវិន័យ កូនក្លាយជាមនុស្សរឹងមាំ ទោះបីមានបញ្ហាក៏គ្មានបញ្ហាដែរ។ រស់ក្នុងវិន័យ ធ្វើកូនក្លាយជាធនធានមានតម្លៃសម្រាប់គ្រួសារ និងសង្គមជាតិផងដែរ៕ បងស្រី សំ យុវតី ជាម្ចាស់ Super Depo និងលេខ ០៩៩ ៤៥៦ ៤៥