លៀសហាល គឺជាអាហារមួយប្រភេទដែលពលរដ្ឋខ្មែរភាគច្រើននិយមចូលចិត្តហូប ជាពិសេសនៅកំលុងពេលរដូវក្ដៅ។ ប៉ុន្តែអាហារសម្រន់ លៀសហាលនេះគឺទាមទារឱ្យមានការយកចិត្តទុកដាក់ក្នុងការចម្អិនក៏ដូចជាមានបច្ចេកទេសក្នុងការហាលច្បាស់លាស់ បើពុំនោះទេវាអាចបណ្តាលឱ្យអ្នកបរិភោគរាគឬឆ្លងមេរោគពីលៀសបាន។

យោងតាមប្រសាសន៍របស់អ្នកឧកញ៉ាវេជ្ជបណ្ឌិត គួច ម៉េងលី ធ្លាប់បានលើកឡើងថា លៀសធម្មតាដែលឆ្លងកាត់ការសម្អាត ការចម្អិន ការហាលត្រូវកម្តៅថ្ងៃត្រឹមត្រូវគឺ គ្មានមេរោគនោះទេ។ ប៉ុន្តែចំពោះប្រភេទលៀសដែលញ៉ាំហើយអាចបណ្តាលឱ្យអ្នកញ៉ាំ ជួបបញ្ហារាក និងឆ្លងមេរោគមិនល្អគឺជា ប្រភេទលៀសដែលគ្មានអនាម័យ និងលៀសស្អុយជាដើម។ លៀសប្រភេទនេះគឺវាផ្ទុកទៅដោយ ប្រភេទបាក់តេរី Escherichia coli។ នៅពេលយើងហូបប៉ះចំលៀសស្អុយហ្នឹង បាក់តេរីនោះនឹងធ្វើឱ្យយើងចុកពោះ រាករូសភ្លាមៗ។

បើតាមការបញ្ជាក់ពីគេហទំព័រ VDH (Virginia Department of Health) បានឱ្យដឹងថា កាលណាអ្នកញ៉ាំប៉ះចំលៀសដែលគ្មានអនាម័យឬចំលៀសស្អុយញឹកញាប់ គឺពពួកបាក់តេរី Escherichia coli វានឹងជ្រៀតចូលទៅក្នុងរាងកាយហើយបង្កជាទៅជា ជំងឺពោះវៀន មេរោគក្នុងក្រពះ ករណីធ្ងន់ធ្ងរអាចប៉ះពាល់ដល់សួត ហើយអាចទៅជាមហារីកថែមទៀតផង។

ជាមួយគ្នានេះដែរ លោកវេជ្ជបណ្ឌិត គួច ម៉េងលី បានសូមណែនាំថា ដើម្បីហូបលៀសកុំឱ្យប៉ះពាល់សុខភាព អ្នកហូប ត្រូវជ្រៀសហូបលៀសណា ដែលមានអនាម័យ ពោលគឺលៀសដែលបានឆ្លងកាត់ការលាងជម្រះដោយទឹកស្អាតឱ្យជ្រះល្អ ហាលនឹងកម្ដៅថ្ងៃឱ្យឆ្អិនល្អ។ ប្រសិនបើពុំសូវមានកម្ដៅថ្ងៃ ត្រូវតែយកលៀសស្រុះទឹកក្ដៅមួយ៣នាទី រួចសឹមប្រឡាក់គ្រឿង ដាក់ហាល។

ដើម្បីឱ្យកាន់តែសុវត្ថិភាព អ្នកប្រកបអាជីវកម្មលក់លៀសហាលទាំងអស់ ត្រូវធ្វើតាមការណែនាំខាងលើ ជាពិសេសទៅទៀតនោះ ត្រូវចៀសវាងយកលៀសហាលសល់ពីរបីថ្ងៃមុនឬលៀសស្អុយមកលាយលក់។ ចំណែកអ្នកហូបវិញ ក៏គួរទិញហូបឱ្យត្រូវរដូវកាលដែរ ពោលបើខែភ្លៀងធ្លាក់ គួរកាត់បន្ថយឬកុំទិញលៀសហាលហូបអី ព្រោះវាអាចធ្វើឱ្យរាករូស។ គួរទិញហូបនៅខែដែលមានធាតុអាកាសក្ដៅ។

អត្ថបទដោយ៖ មឿន គ​ន្ធា