កាលពីថ្ងៃព្រហស្បតិ៍ខែមីនា ឆ្នាំ២០២៣ ម្សិលមិញនេះ ក្រសួងសុខាភិបាល ថៃ បានចុះផ្សាយថា ប្រជាជនខ្លួន ធ្លាក់ខ្លួនឈឺចូលដេកពេទ្យប្រមាណ២០មុឺននាក់ ដោយសារស្រូបខ្យល់ពុល និងប្រមាណ១.៣លាននាក់ទៅហើយ ដែលបានធ្លាក់ខ្លួនឈឺចាប់តាំងពីដើមឆ្នាំមកម្ល៉េះ នេះបើយោងតាមរយៈប្រភព bangkokpost។
គួរបញ្ជាក់ឱ្យដឹងថា ប្រភេទខ្យល់ពុលនេះ គឺសម្បូរដោយធូលី ដែលតូចល្អិតបំផុតប្រហែល២.៥មីក្រូម៉ែត្រ ឬអង្កត់ផ្ចិតតិចជាង (PM២.៥)ហើយកើតឡើងនៅខាងជើង ភាគឦសាន ក្រុងបាងកក និងខេត្តជុំវិញកាលពីថ្ងៃព្រហស្បតិ៍នេះ ដែលបណ្ដាលឱ្យប្រជាជនថៃ ប្រមាណ២០មុឺននាក់មានបញ្ហាផ្លូវដង្ហើម។
អាជ្ញាធរថៃ បានណែនាំប្រជាពលរដ្ឋឱ្យពាក់ម៉ាស់ការពារ ដើម្បីសុវត្តិភាព និងហាមមិនឱ្យប្រជាជនដុតកាកសំណល់ រហូតដល់ស្ថានភាពបរិយាកាសអួរអាប់ដោយសារធូលីតូចល្អិតបានប្រសើរឡើងវិញ។ លោកវេជ្ជបណ្ឌិត Kriangkrai Namthaisong ថៃបានណែនាំមិន ឱ្យកុមារ រួមទាំងស្រ្តីមានផ្ទៃពោះ ចេញក្រៅផ្ទះព្រោះអាចប៉ះពាល់សុខភាពបាន។
ជាការពិតណាស់ ធូលីដ៏ល្អិតល្អន់ បានគ្របដណ្តប់លើសង្កាត់កោះរតនៈកូស៊ីន ជាប្រវត្តិសាស្ត្រនៃទីក្រុងបាងកកកាលពីថ្ងៃព្រហស្បតិ៍ ដែលមិនធ្លាប់មានពីមុនមក។ យោងតាមលោក Pinsak Surasawadi អគ្គនាយកនៃនាយកដ្ឋានត្រួតពិនិត្យការបំពុល (PCD) បានឱ្យដឹងថា កម្រិតនៃភាគល្អិត២.៥ មីក្រូម៉ែត្រ ឬអង្កត់ផ្ចិតតិចជាង (PM២.៥) បានកើនឡើងនៅគ្រប់តំបន់នៃខេត្តភាគខាងជើងចំនួន ១៧កាលពីព្រឹកថ្ងៃព្រហស្បតិ៍ផងដែរ។ នៅភាគខាងជើងប្រទេសថៃ តំបន់ចំនួន១៧នេះ ត្រូវបានចាត់ថ្នាក់នៅក្នុងតំបន់ពណ៌ទឹកក្រូច ជាកម្រិតចាប់ផ្តើមប៉ះពាល់ដល់សុខភាព និង ១៥តំបន់នៅក្នុងតំបន់ក្រហមនៃផលប៉ះពាល់សុខភាពធ្ងន់ធ្ងរ អាជ្ញាធរថៃ បានណែនាំឱ្យប្រជាជនថៃនៅតែបង្កើនការប្រុងប្រយ័ត្នរហូតចាប់ពីថ្ងៃទី១៤ដល់ទី១៦ខែមីនានែះ ដើម្បីធានាសុវត្ថិភាព៕
អត្ថបទដោយ៖ ប៉ែត ធីតា
