ផ្សិតរុំារ៉ៃគឺមានន័យថាបុគ្គលម្នាក់អាចកើតជំងឺនេះ៤ដងឡើង ក្នុង១ឆ្នាំ គឺគេហៅថាកើតផ្សិតរុំារ៉ៃ ហើយជំងឺផ្សិតរុំារ៉ៃនេះមិនមែនកើតលើតែមនុស្សស្រីនោះទេ មានន័យថាមនុស្សប្រុសក៏ប្រឈមកើតរោគផ្សិតក្នុងប្រដាប់ភេទផងដែរ នេះបើយោងតាមរយៈការចែករំលែករបស់ អ្នកគ្រូពេទ្យ ង៉ែត គឹមសយ។
ខាងក្រោមនេះគឺជាមូលហេតុធំៗ៣យ៉ាងធ្វើឱ្យកើតរោគផ្សិតរុំារ៉ៃឡើងមក។
មូលហេតុទី១នោះគឺ កង្វះអនាម័យ និងធ្វើអនាម័យមិនបានត្រឹមត្រូវ ទាក់ទងនឹងប្រដាប់បន្ដពូជរាប់ទាំងបុរសនិងស្រ្តី គឺមានន័យថាពេលបត់ជើងតូចហើយ លាងសម្អាតឬលាងសម្អាតរួចមិនបានជូតឱ្យស្ងួតល្អ អត់បានលាងសម្អាតមុននិងក្រោយពេលរួមភេទ ឬក៏ទឹកដែលយលមកសម្អាតហ្នឹងមិនស្អាតមានមេរោគ ឬក៏ទឹកដែលយកមកសម្អាតនិងទៅបំផ្លាញពពួកបាក់តេរីល្អៗក្នុងនៅក្នុងប្រដាប់ភេទបុរសនិងស្រ្តីក៏នាំឱ្យកើតមានជាបញ្ហារោគផ្សិតឡើងមក។មួយវិញទៀតចំពោះនឹងបុរសដែលមានស្បែកចុងលិង្គមិនពន្លាត់ ហើយមិនបានធ្វើអនាម័យសម្អាតឱ្យបានស្អាតក៏មានបញ្ហារោគផ្សិតឡើងមកបែបនឹងផងដែរ។
មូលហេតុទី២ មនុស្សមានជំងឺប្រចាំកាយ ឬប្រព័ន្ធភាពសុំាចុះខ្សោយ ចំពោះប្រភេទជំងឺប្រចាំកាយដែលគេបានរកឃើញថាបង្កឱ្យកើតរោគផ្សិតគឺជំងឺទឹកនោមផ្អែម អេដស៍ ជំងឺ២នេះ មេរោគផ្សិតងាយនឹងកើតមានឡើងខ្លាំងណាស់ ព្រោះមនុស្សប្រភេទនេះប្រព័ន្ធរាងកាយរបស់គាត់ទន់ខ្សោយ។ ម្យ៉ាងវិញទៀត អ្នកដែលប្រើប្រាស់ថ្នាំផ្សះរយៈពេលយូរ មានន័យថា ជូនកាលគាត់ឈឺជំងឺអ្វីផ្សេងពីរោគផ្សិត ហើយគាត់ហូបថ្នាំផ្សះ២ទៅ៣សប្ដាហ៍ឡើងទៅ ហើយក្រោយពីជាពីជំងឺអាចនឹងកើតរោគផ្សិតមកតាមក្រោយ។ មួយវិញទៀតស្រ្តីដែលមានផ្ទៃពោះ អ្នកមានបញ្ហាស្រ្តេស គេងមិនគ្រប់គ្រាន់ ញុំាអាហារអត់សូវមានជីវជាតិ ងាយនឹងធ្វើឱ្យប្រព័ន្ធភាពសុំាគាត់ចុះខ្សោយងាយកើតរោគផ្សិតមកដូចគ្នា។
មូលហេតុទី៣ កើតជំងឺរោគផ្សិតរួចហើយ តែមិនព្រមទៅព្យាបាល ឬក៏ មិនបានព្យាបាលឱ្យបានត្រឹមត្រូវ មានន័យថាមិនបានធ្វើតាមការណែនាំរបស់គ្រូពេទ្យជំនាញមានន័យថាថ្នាំគ្រូពេទ្យឱ្យមកប្រើ១សប្ដាហ៍ តែគាត់ប្រើបាន២ទៅ៣ថ្ងៃមិនបាត់ឈប់ប្រើ ឬក៏ប្រើបាន២ទៅ៣ថ្ងៃបាត់រោគសញ្ញាឈប់ប្រើ ។ ចំណែកអ្នកខ្លះទៀតពេលកើតរោគផ្សិតឡើងមកហើយចាំៗអូសបន្លាយរហូតកន្លះខែដល់១ខែមិនព្រមទៅព្យាបាល ជំងឺក៏បាត់ដោយខ្លួនឯងតែសូមចាំថាមេរោគវានៅក្នុងខ្លួនដដែល ដល់ពេលណាមួយវានឹងកើតមានឡើងវិញមិនខាន។
ជាចុងក្រោយអ្នកគ្រូពេទ្យ ង៉ែត គឹមសយ បើមានធ្លាក់សខុសប្រក្រតី សូមឈប់ទៅផ្សំថ្នាំលេបផ្តេសផ្តាស បើមិនចង់អោយជម្ងឺនោះវិវត្តន៍ទៅជារ៉ាំរ៉ៃ ជាជម្រើសដ៏ល្អនិងត្រឹមត្រូវ គឺត្រូវទៅជួបពិគ្រោះ ពិនិត្យ និងទទួលការព្យាបាលដែលត្រឹមត្រូវជាមួយគ្រូពេទ្យជំនាញ៕
អត្ថបទដោយ៖ ប៉ែត ធីតា