ជំងឺផ្លូវចិត្ត ឬវិបត្តិផ្លូវចិត្ត មានច្រើនណាស់ ហើយលក្ខណៈសម្គាល់របស់វាអាចនឹងច្រលំគ្នាសម្រាប់អ្នកអានដែលមិនទាន់បានសិក្សាច្បាស់។ នៅក្នុងនោះ ជំងឺថប់អារម្មណ៍ និងជំងឺបាក់ទឹកចិត្ត គឺជាជំងឺនៃវិបត្តិផ្លូវចិត្ត២ផ្សេងគ្នាដាច់ ប៉ុន្តែនៅតែមានអ្នកច្រលំថាវាជាជំងឺផ្លូវចិត្តតែ១។ បើតាមការឱ្យនិយមន័យរបស់ Mental Health Foundation ជំងឺថប់អារម្មណ៍គឺជាជំងឺផ្លូវចិត្តមួយប្រភេទដែលបារម្ភខ្លាំងទៅកាន់អនាគត គិតច្រើនទៅលើរឿងដែលមិនទាន់កើតឡើង ដោយឡែកជំងឺបាក់ទឹកចិត្តគឺជាវិបត្តិផ្លូវចិត្តម្យ៉ាងដែលធ្វើឱ្យអ្នកជំងឺមានអារម្មណ៍សោកស្តាយ ស្តាយក្រោយនូវរឿងអតីត នៅជាប់ក្នុងរឿងដែលកន្លងហួស។

ប្រភពដដែលបានឱ្យដឹងបន្ថែមថា ការថប់អារម្មណ៍ មិនមែនជារឿងអាក្រក់ទាំងស្រុងនោះទេ ពេលខ្លះវាអាចជំរុញយើង, ជួយយើងឱ្យប្រុងប្រយ័ត្ន, ធ្វើឱ្យយើងដឹងពីហានិភ័យ និងជំរុញយើងឱ្យដោះស្រាយបញ្ហាទុកជាមុន។ ប៉ុន្តែទោះជាយ៉ាងណាក៏ដោយ ការថប់អារម្មណ៍អាចក្លាយជាបញ្ហា ប្រសិនបើវាប៉ះពាល់ដល់សមត្ថភាពក្នុងការរស់នៅរបស់អ្នក។ ប្រសិនបើការថប់បារម្ភរបស់អ្នកកំពុងបន្តធ្ងន់ធ្ងរ ពិបាកគ្រប់គ្រង ឬហួសសមាមាត្រទៅនឹងស្ថានភាព វាអាចជាសញ្ញានៃបញ្ហាសុខភាពផ្លូវចិត្តដែលត្រូវការការដោះស្រាយពីអ្នកជំនាញហើយ។

ដើម្បីដឹងខ្លួនឯង ជំងឺថប់អារម្មណ៍របស់អ្នកមានកម្រិតធ្ងន់ធ្ងរឬត្រូវទៅពិគ្រោះយោបល់ជាមួយពេទ្យឯកទេសយ៉ាងណានោះ, ខាងក្រោមនេះគឺជារោគសញ្ញាសំខាន់ៗដែលតែងតែលេចឡើងលើផ្នែករាងកាយ និងផ្នែកផ្លូវចិត្តផ្ទាល់។

រោគសញ្ញាជំងឺថប់អារម្មណ៍ ដែលលេចចេញតាមរយៈរាងកាយមានដូចជា៖ អត់ឃ្លានអាហារ, មានអារម្មណ៍វិលមុខ ឬឈឺក្បាលកម្រិតស្រាល, ញ័រដៃ ញ័រជើងពិបាកគ្រប់គ្រង, ដង្ហើមខ្លី ឬ hyperventilating, ញ័រទ្រូង (បេះដូងលោតញាប់ខ្លាំង គួរឱ្យកត់សម្គាល់), ចង្អោរ (មានអារម្មណ៍ដូចឈឺៗ), ចូលបន្ទប់ទឹកញឹកញាប់ ឬតិចខុសធម្មតា, បែកញើស, បញ្ហានៃការគេងពេលយប់ និងឆាប់ភ័យស្លន់ស្លោ។

ចំណែកឯរោគសញ្ញាជំងឺថប់អារម្មណ៍ ដែលលេចចេញតាមរយៈផ្លូវចិត្ត ផ្លូវអារម្មណ៍មានដូចជា៖ មានអារម្មណ៍ភ័យខ្លាច ឬខ្លាចអ្វីដែលអាក្រក់បំផុតកើតឡើង, អារម្មណ៍ស្លុតៗ ឬភ័យស្លន់ស្លោ, លំបាកក្នុងការផ្តោតអារម្មណ៍, ឆាប់ខឹង និងអាចមានអារម្មណ៍ឯកោពីខ្លួនឯងឬពិភពលោកជុំវិញជាដើម។

យ៉ាងណាមិញ ប្រសិនបើអ្នកជួបប្រទះនូវរោគសញ្ញាតិចឬច្រើនដូចបានរៀបរាប់ខាងលើអ្វីដែលអ្នកត្រូវធ្វើ គឺឆាប់ពិគ្រោះជាមួយអ្នកជំនាញ​ ឬអាចរកមនុស្សជំនិតដើម្បីចែករំលែករឿងក្នុងចិត្ត, រៀនសមាធិ សិក្សាពីចិត្តខ្លួនឯង ឬអាចរកគ្រូពេទ្យឯកទេសខាងផ្លូវចិត្តផ្ទាល់ដើម្បីពិគ្រោះយោបល់បន្ថែម។ សូមរម្លឹកនិងលើកទឹកចិត្តថា ជំងឺផ្លូវចិត្តគ្មានអ្វីត្រូវខ្មាសគេទេ វាប្រៀបដូចជាជំងឺផ្នែករាងកាយដូច្នេះដែរ ហើយមនុស្សដែលស្រលាញ់សុខភាពមិនទុកឱ្យផ្លូវចិត្តវាយលុកពួកគេធ្ងន់ធ្ងរទេ ការស្វែងរកជំនួយកាន់តែលឿន កាន់តែល្អសម្រាប់សុខភាពអ្នក៕

អត្ថបទដោយ៖ កញ្ញា លីហួយ