តើបងប្អូនដឹងឬទេថា ប្រទេសកម្ពុជាស្ថិតនៅក្នុងតំបន់ត្រូពិច ដែលអាកាសធាតុក្តៅហើយសើមបែបនេះងាយធ្វើឱ្យពពួកមេរោគ វីរុស ប៉ារ៉ាសិត បាក់តេរី ឬផ្សិតអាចឆ្លងចូលទៅប្រព័ន្ធផ្លូវដង្ហើម ប៉ះពាល់សួតយើងបានដោយងាយ។ វេជ្ជបណ្ឌិត ហឿន លក្ខិណា ដែលជាវេជ្ជបណ្ឌិតឯកទេសជំងឺសួត និងផ្លូវដង្ហើមប្រចាំនៅមន្ទីរសំរាកព្យាបាលអ៊ែរ ផ្លឹស បានប្រាប់ឱ្យដឹងថាក្នុងបទពិសោធន៍ព្យាបាលជំងឺជាច្រើនឆ្នាំមកនេះ ជំងឺរលាកសួត និងជំងឺរលាកទងសួតគឺជាជំងឺដែលកើតញឹកញាប់បំផុត ហើយវាអាចបង្កគ្រោះថ្នាក់ធ្ងន់ដល់សួតនិងជីវិត បើគ្មានការព្យាបាលត្រឹមត្រូវនិងទាន់ពេលវេលា។ 

វេជ្ជបណ្ឌិត ហឿន លក្ខិណា បានបន្ថែមថា ជំងឺរលាកសួតឬរលាកទងសួតកើតមិនរើសវ័យនោះទេ មិនថាទារក កុមារ មនុស្សពេញវ័យ ឬមនុស្សចាស់សុទ្ធតែជាក្រុមមនុស្សប្រឈមអាចកើតបានទាំងអស់។ មូលហេតុធំបំផុតដែលនាំឱ្យរលាកនោះគឺការឆ្លងមេរោគ រួមមានដូចជា មេរោគរបេង, បាក់តេរី, វីរុស, ប៉ារ៉ាសិត ហើយករណីកំរគឺអាចឆ្លងមេរោគរលាកសួតចេញពីផ្សិតមួយចំនួនផងដែរ។ បន្ថែមពីការឆ្លងមេរោគ សូម្បីតែផ្សែងពុល ឧស្ម័នមិនល្អទាំងអស់ក្នុងបរិយាកាស, ផ្សែងចេញពីឡាន ម៉ូតូ រោងចក្រ សុទ្ធតែជាប្រភពនៃការឆ្លងមេរោគចូលសួតទាំងអស់។

វេជ្ជបណ្ឌិត ហឿន លក្ខិណា ព្រមទាំងបានបញ្ជាក់ពីរោគសញ្ញានៃការឆ្លងមេរោគដែលបណ្តាលឱ្យមានការរលាកសួតឱ្យដឹងទៀតថា វាអាចចេញរោគសញ្ញាគួរឱ្យកត់សម្គាល់មួយចំនួនដូចជា ក្អកគ្រប់ប្រភេទ, ក្អកស្ងួត, ក្អកស្លេស្ម៍, ក្តៅខ្លួន, ហត់ ពិបាកដកដង្ហើម និងអាចធ្វើឱ្យថប់ទ្រូងផងដែរ។

បន្ថែមពីមូលហេតុនៃការឆ្លង និងរោគសញ្ញា វេជ្ជបណ្ឌិត ហឿន លក្ខិណា ក៏មិនភ្លេចផ្តល់នូវអនុសាសន៍ដើម្បីឱ្យបងប្អូនប្រជាជនខ្មែរទាំងអស់គ្នាថែទាំសុខភាពខ្លួននៅផ្ទះដោយខ្លួនឯង ដើម្បីចៀសឆ្ងាយពីជំងឺស្រាលធ្ងន់ ក៏ដូចជាជំងឺសួតផ្ទាល់តែម្តង។ បើស្រឡាញ់សុខភាព ចង់ឱ្យសុខភាពរឹងមាំ ត្រូវរក្សាឱ្យបាននូវប៉ុន្មានចំណុចខាងក្រោមនេះ៖

-  ត្រូវរស់នៅស្អាត មានអនាម័យ គឺញ៉ាំស្អាត ផឹកស្អាត គេងស្អាត

-  អនាម័យផ្លូវដង្ហើម ដោយពាក់ម៉ាស់រៀងរាល់ពេលចេញទៅខាងក្រៅ ជាពិសេសនៅទីប្រជុំជន

-  កុំពិសារបារី កាត់បន្ថយស្រា ព្រោះ២មុខនេះធ្វើឱ្យប្រព័ន្ធភាពស៊ាំថយចុះលឿន ងាយឆ្លងជំងឺផ្សេងៗ

-  ហាត់ប្រាណឱ្យបានយ៉ាងតិច៣ដងក្នុងសប្តាហ៍ ម្តង៣០នាទី

-  ចាក់វ៉ាក់សាំងការពារឱ្យគ្រប់ចំនួន រួមមានដូចជា វ៉ាក់សាំងផ្តាសាយ វ៉ាក់សាំងរលាកសួត និងវ៉ាក់សាំងការពារកូវីដ១៩ជាដើម។

ជាមួយគ្នានេះ ក្រុមការងារចាបបៃតងសូមបញ្ជាក់ផងដែរថា មន្ទីរសំរាកព្យាបាលអ៊ែរ ផ្លឹស គឺជាមន្ទីរពហុព្យាបាលមួយកន្លែងដែលបង្កើតឡើងដោយក្រុមគ្រូពេទ្យឯកទេស ស្របតាមស្តង់ដារអន្តរជាតិ មានឯកទេសជាច្រើនដូចជា ឯកទេសជំងឺសួតនិងផ្លូវដង្ហើម, ឯកទេសជំងឺទឹកនោមផ្អែម, ឯកទេសជំងឺប្រព័ន្ធរំលាយអាហារ, ឯកទេសជំងឺផ្លូវចិត្ត និងឯកទេសផ្សេងៗទៀត។ សម្រាប់ការទំនាក់ទំនងទៅកាន់វេជ្ជបណ្ឌិត ហឿន លក្ខិណា ឬមន្ទីរសំរាកព្យាបាលអ៊ែរ ផ្លឹស បងប្អូនអាចទាក់ទងបានតាមរយៈហ្វេសប៊ុកផេក: មន្ទីរសំរាកព្យាបាលអ៊ែរ ផ្លឹស, លេខទូរស័ព្ទ: 098 933 533 / 092 633 533 / 071 6 333 455, តេលេក្រាមគ្រុប: https://t.me/airplusgroup ឬទៅដល់គ្លីនិកដោយផ្ទាល់តាមអាសយដ្ឋាន៖ ផ្ទះលេខ 55B, ផ្លូវ 113, សង្កាត់បឹងកេងកង III, រាជធានីភ្នំពេញ៕

អត្ថបទដោយ: កញ្ញា លីហួយ