ស្នាមខ្មៅតូចៗដែលកើតមាននៅលើប្រអប់ដៃ ភាគច្រើនកើតទៅលើមនុស្សស្រីមានស្បែកខ្សោយ ជាពិសេសមនុស្សដែលធ្វើការនៅក្នុងម៉ាស៊ីនត្រជាក់ឬធ្វើការនៅកន្លែងត្រជាក់ នៅពេលដែលចេញក្រៅត្រូវកម្តៅថ្ងៃម្តងៗ គឺតែងតែកើតមានស្នាមអុចខ្មៅនេះមិនខាន។ ជាទូទៅវាចំណាយពេលចាប់ពី ២ ទៅ ៣ ខែទើបរលុបបាត់ទៅវិញ។

ជាការពិតណាស់ ស្នាមខ្មៅដែលតែងតែកើតនៅលើប្រអប់ដៃដែលមនុស្សគ្រប់គ្នាតែងឆ្ងល់ គឺវាបណ្តាលមកពីស្បែករបស់យើងកំពុងខ្វះជាតិទឹក។ ស្បែករបស់មនុស្សយើងគ្រប់គ្នា កាលណាខ្វះជាតិទឹកគឺធ្វើឱ្យកោសិការការពារស្បែកចុះខ្យោយ ងាយរងប្រតិកម្មពីអាការធាតុខាងក្រៅដូចជាស្នាមអុចខ្មៅ និងជាំជាដើម។ មួយវិញទៀត អំឡុងពេលស្បែកកំពុងខ្វះជាតិទឹក ហើយស្បែករបស់យើងទៅប៉ះជាមួយកម្តៅថ្ងៃដែលមានកម្រិត UV ខ្ពស់ គឺធ្វើឱ្យស្បែកកើតស្នាមអុចខ្មៅ ភាគច្រើនកើតនៅត្រង់ ប្រអប់ដៃ កំភួនដៃ ខ្នង ស្មា និងនៅលើទ្រូងជាដើម។ ស្នាមអុចខ្មៅនេះវាកើតបានទៅលើមនុស្សគ្រប់វ័យទាំងអស់ ឱ្យតែស្បែករបស់យើងទៅប៉ះជាមួយកម្តៅថ្ងៃខ្លាំង។

តាមការបញ្ជាក់របស់វេជ្ជបណ្ឌិតស្បែកនៅសហរដ្ឋអាមេរិកបានឱ្យដឹងថា ស្នាមអុចខ្មៅដែលតែងតែកើតនៅលើប្រអប់ដៃនេះមាន២ប្រភេទខុសគ្នា។ ប្រភេទទី១ ជាប្រភេទធម្មតាមានឈ្មោះថា Age Spots បង្កឡើងពីកម្តៅថ្ងៃធ្វើឱ្យស្បែកប្រអប់ដៃលេចចេញនូវស្នាមអុចខ្មៅតូចៗ រយៈពេលចាប់ពី ២ ទៅ ៣ ខែវាបាត់ទៅវិញហើយមិនមានបញ្ហាអ្វីដល់ស្បែកនោះទេ។ ប្រភេទទី២ ឈ្មោះថា Melanoma ជាស្នាមអុចខ្មៅដែលបង្កឡើងពីកម្តៅព្រះអាទិត្យដូចគ្នា ប៉ុន្តែវាមានសមត្ថភាពខ្លាំង ធ្វើឱ្យស្បែកដៃរបស់យើងឡើងស្នាមអុចពណ៌ខ្មៅដិត រូបរាងធំ ហើយវាក៏អាចបង្កទៅជាជំងឺមហារីកស្បែកផងដែរប្រសិនព្យាបាលមិនទាន់ពេល។

របៀបការពារស្បែកកុំឱ្យកើតអុចខ្មៅពេលត្រូវកម្តៅថ្ងៃ៖

- ត្រូវលាបឡេការពារកម្តៅថ្ងៃជាប្រចាំនៅពេលចេញក្រៅ ដូចជាទៅលេងទឹក ទៅសមុទ្រ ឬទៅកន្លែងកំសាន្តផ្សេងៗ ដែលមានពន្លឺព្រះអាទិត្យខ្លាំង។ នៅពេលជ្រើសរើសឡេការពារកម្តៅថ្ងៃមកលាប​ អ្នកត្រូវប្រាកដថាឡេនោះអាចការពារកាំរស្មី UVA និង UVB ទើបទទួលបានផល។

-ត្រូវលាបឡេការពារកម្តៅថ្ងៃយ៉ាងហោចណាស់ ៣០ នាទីមុនពេលអ្នកចេញទៅត្រូវកម្តៅថ្ងៃ ហើយត្រូវលាបម្តងទៀតនៅរៀងរាល់ ២ ម៉ោងម្តង។

-លាបជែលការពារដៃឱ្យបានគ្រប់ពេលចេញទៅក្រៅ ពីព្រោះនៅក្នុងជែលវាមានសារជាតិប្រេងផ្តល់សំណើមដល់ស្បែកដៃ ធ្វើឱ្យស្បែករលោង ការពារកម្តៅថ្ងៃ។

- ពាក់អាវដៃវែង ឬពាក់ស្រោមដៃឱ្យជិតមុនពេលចេញទៅក្រៅ ហាមពាក់អាវពណ៌ខ្មៅឬស្រោមដៃពណ៌ខ្មៅដាច់ខាត ពីព្រោះពណ៌ខ្មៅជាពណ៌ដែលស្រូបពន្លឺថ្ងៃខ្លាំង៕

អត្ថបទដោយ៖ មឿន គន្ធា

ប្រភពស្រាវជ្រាវ៖ skinassociatesfl